ଝାରସୁଗୁଡା ଅଫିସ,୫।୧୨(ଡି.ଏନ୍.ଏ.): ଝାରସୁଗୁଡ଼ା ଜିଲା ଲଖନପୁର ବ୍ଲକ ଛତିଶଗଡ଼ ସୀମାନ୍ତବର୍ତ୍ତୀ ଲୁହାବଗା ଗ୍ରାମରେ ଗତ ଶନିବାର ରାତିରେ ଏକ ଅଭାବନୀୟ ଘଟଣା ଘଟିଛି । ଦୁର୍ବୃତ୍ତମାନେ ଗ୍ରାମ ନିକଟରେ ବାରହା ମାରିବା ପାଇଁ ୧୧କେଭି ବିଦ୍ୟୁତ ତାର ବିଛାଇଥିଲେ । ତାର ସଂସ୍ପର୍ଶରେ ଆସି ଗ୍ରାମର ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ଜଣଙ୍କ ଲୁହାବଗା ଗ୍ରାମର ଉଦ୍ଧବ ମେହେରଙ୍କ ଏକମାତ୍ର ପୁଅ ଭୂଦେବ ମେହେର(୨୧)ବୋଲି ଜଣାପଡିଛି । ଖବରପାଇ ରେଙ୍ଗାଲି ଥାନା ପୋଲିସ ଓ କନକତୋର ବିଟ ହାଉସ ପୋଲିସ ପହଞ୍ଚି ତଦନ୍ତ ଚଳାଇଛି । ଏ ନେଇ ଗ୍ରାମରେ ଅସନ୍ତୋଷ ଦେଖାଦେଇଛି । ମୃତ ଭୂଦେବଙ୍କ ଘର ନିକଟରୁ ୨ଶହ ମିଟର ଦୂରରେ ତାର ବିଛା ଯାଇଥିଲା । ଭୂଦେବ କୌଣସି କାମରେ ବାହାରକୁ ବାହାରିଥିଲେ। ହେଲେ ସେ ଆଉ ରାତିରେ ଘରକୁ ଫେରି ନ ଥିଲେ । ପରେ ପରିବାର ଲୋକେ ଖୋଜାଖୋଜି କରିଥିଲେ ହେଲେ ତାଙ୍କର କୌଣସି ସନ୍ଧାନ ପାଇ ନ ଥିଲେ । ଘର ନିକଟରୁ ୨ଶହ ମିଟର ଦୂରରେ ଭୂଦେବଙ୍କ ମୃତ ଦେହ ପଡିଥିବା ଘର ଲୋକ ଦେଖିଥିଲେ।
