ବୈଶିଙ୍ଗା,୧୩ା୮(ଡି.ଏନ.ଏ.): ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ କ୍ଷୀରପଦା, ଦଲଦଲି, ମୋହନପୁର, ଖଇରବଣି, ଭୁଡୁରୁବଣି, ହାତୀଝୁରି ଆଦି ଗ୍ରାମରେ ଏକ ଗୋଠଛଡ଼ା ଦନ୍ତା ହାତୀ ସପ୍ତାହେ ହେଲା ଉତ୍ପାତ ଚଳାଇଛି। ଫସଲ ନଷ୍ଟ କରିବା ସହ ଘରଦ୍ୱାର ଭାଙ୍ଗି ପକାଉଛି। ହାତୀଟି ଦିନରେ କ୍ଷୀରପଦା ଜଙ୍ଗଲ ମଧ୍ୟରେ ଲୁଚି ରହୁଥିବା ବେଳେ ରାତି ହେଲେ ନିକଟସ୍ଥ ଗାଁରେ ପଶି କ୍ଷୟକ୍ଷତି କରୁଛି। ଅନ୍ୟପକ୍ଷରେ ବଡ଼ାମପୁର ଗାଁ ନିକଟସ୍ଥ ଜଙ୍ଗଲକୁ ମଧ୍ୟ ୧୧ଟି ଝାଡ଼ଖଣ୍ଡି ହାତୀ ଆସି ଆଖପାଖ ଅଞ୍ଚଳରେ ଉପଦ୍ରବ କରୁଛନ୍ତି। ଏନେଇ ଅଞ୍ଚଳବାସୀ ଭୟ ଓ ଆତଙ୍କିତ ଅବସ୍ଥାରେ ରହିଛନ୍ତି।
ହାତୀଙ୍କ ସୁରକ୍ଷିତ ଚଳପ୍ରଚଳ ଲାଗି ପ୍ରଶାସନ ପକ୍ଷରୁ ବିଜୁଳି ସଂଯୋଗ ବିଚ୍ଛିନ୍ନ କରାଯିବା ପାଇଁ ନିର୍ଦ୍ଦେଶ ଦିଆଯାଇଛି। ଏନେଇ ଲୋକେ ଅତିଷ୍ଠ ହୋଇ ପଡ଼ିବା ସହ ଏହା ସେମାନଙ୍କ ପାଇଁ ବେଡ଼ି ଉପରେ କୋରଡ଼ା ସଦୃଶ ହୋଇପଡ଼ୁଛି। ଏନେଇ ଆତ୍ମନିଯୁକ୍ତି ଉଦ୍ଦେଶ୍ୟରେ ସ୍ଥାପନ କରାଯାଇଥିବା ସ୍ଥାନୀୟ ବାସିନ୍ଦାଙ୍କ ମାଛ, ଡାଇରୀ ଫାର୍ମ, ମେଶିନ୍ ପ୍ରସ୍ତୁତ ଶାଳ ପତ୍ର ଖଲି ଦୋନା ଉଦ୍ୟୋଗଗୁଡ଼ିକ ଗୁରୁତର ପ୍ରଭାବିତ ହୋଇଛି। ସନ୍ତରା ପଞ୍ଚାୟତର ମଛପଦାଠାରେ ଥିବା ଅବଧୂତ ମାଛ ଜାଆଁଳ ଉତ୍ପାଦନ କେନ୍ଦ୍ରର ମାଲିକ ଅରବିନ୍ଦ ସାହୁ ଅଭିଯୋଗ କରିଛନ୍ତି ଯେ, ହାତୀଙ୍କ ସୁରକ୍ଷା ନିମନ୍ତେ ବିଜୁଳି କାଟ୍ ହେବା ଫଳରେ ବର୍ଷକ ମଧ୍ୟରେ ତାଙ୍କର ଲକ୍ଷାଧିକ ଟଙ୍କାର କ୍ଷତି ହୋଇଛି। ରାତିରେ ବିଜୁଳି କାଟ୍ ଯୋଗୁ ଆର୍ଥିକ ତଣ୍ଡ ସହିବାକୁ ପଡ଼ୁଥିବା ଯୁବ ଉଦ୍ୟୋଗୀମାନେ କହିଛନ୍ତି। ଏଭଳି ସ୍ଥିତିରେ କ୍ଷତିଗ୍ରସ୍ତଙ୍କୁ ସରକାରୀ ସହାୟତା ପ୍ରଦାନ କରିବାକୁ ଅଞ୍ଚଳର ସତ୍ୟ ନାରାୟଣ ବିନ୍ଧାଣି, ମନୋଜ କୁମାର ପୁହାଣ, ଅରୁଣ ସାହୁ ପ୍ରମୁଖ ଦାବି କରିଛନ୍ତି।
