ପାକିସ୍ତାନୀ ସୁରକ୍ଷା ବାହିନୀ ସୀମାନ୍ତ ଅଞ୍ଚଳରୁ ୨୦୦ କିଲୋଗ୍ରାମ ବିସ୍ଫୋରକ ସାମଗ୍ରୀ ଉଦ୍ଧାର କରିଛି। ଏନେଇ ଆଫଗାନିସ୍ତାନ-ପାକିସ୍ତାନର ଉଚ୍ଚସ୍ତରୀୟ ବୈଠକରେ ଆଲୋଚନା ହୋଇଛି। ବୈଠକରେ ଆତଙ୍କବାଦୀ ଓ ବିସ୍ଫୋରକ ସାମଗ୍ରୀକୁ ସୀମାରେ ନବାଆଣିବା ପ୍ରସଙ୍ଗ ଜୋରଦାର ଚର୍ଚ୍ଚା ହୋଇଥିଲା। ଏହା ପରେ ନିଷ୍ପତ୍ତି ନିଆଯାଇଥିଲା ଯେ ଉଭୟ ଦେଶ ସୀମା ଉପରେ ପାଟ୍ରୋଲିଂ କରିବେ।
ପାକିସ୍ତାନର ଗୁପ୍ତଚର ଏଜେନ୍ସି ଆଇଏସଆଇ ବିରୋଧରେ କାର୍ଯ୍ୟ କରୁଥିବା ତେହେରିକ-ଇ-ତାଲିବାନ ପାକିସ୍ତାନ ଆତଙ୍କବାଦୀମାନେ ଏବେ ପାକିସ୍ତାନକୁ ବିସ୍ଫୋରକ ଆଣିବା ପାଇଁ ନୂଆ ଯୋଗାଡ କରିଛନ୍ତି। ସେମାନେ ବିସ୍ଫୋରକ ଉପରେ ଘାସ, ନଡ଼ା, ଫଳ ଇତ୍ୟାଦି ଥୋଇ ସୀମା ପାର କରୁଛନ୍ତି।
ଯେତେବେଳେ ପାକିସ୍ତାନୀ ସୁରକ୍ଷା ବାହିନୀ ଖାଇବର ପକ୍ତୁନଖୱାର ଖାଇବର ଜିଲାରେ ଗୋଟିଏ ରିକ୍ସାକୁ ଅଟକାଇଥିଲେ। ରିକ୍ସା ଚାଳକ ଗୋରୁ ପାଇଁ ପନିପରିବା ଓ ଘାସ ନେଇ ଯାଉଥିବା କହିଥିଲେ। ସନ୍ଦେହରେ ଯେତେବେଳେ ସୁରକ୍ଷା ବାହିନୀ ଏହି ରିକ୍ସାକୁ ସର୍ଚ୍ଚ କରିଥିଲେ ସେଥିରୁ ୨୦୦ କିଲୋଗ୍ରାମ ବିସ୍ଫୋରକ ମିଳିଥିଲା। ଏହି ବିସ୍ଫୋରକ ଘାସ ତଳେ ବଡ଼ ବଡ଼ କ୍ୟାଣ୍ଟରରେ ରଖାଯାଇଥିଲା। ପଚରାଉଚରା ବେଳେ ଚାଳକ ସ୍ବୀକାର କରିଛି ଯେ ଆତଙ୍କବାଦୀ କାର୍ଯ୍ୟକଳାପ ପାଇଁ ବିସ୍ଫୋରକ ସାମଗ୍ରୀ ପରିବହନ କରାଯାଉଛି।
ଏହି ପରିପ୍ରେକ୍ଷୀରେ ଆଫଗାନିସ୍ତାନର ବୈଦେଶିକ ମନ୍ତ୍ରୀ ଆମୀର ଖାନ ମୁକି ଏବଂ ପାକିସ୍ତାନର ସ୍ବତନ୍ତ୍ର ଦୂତ ଆସିଫ ଅଲି ଦୁରାନୀଙ୍କ ମଧ୍ୟରେ ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇଛି। ଆତଙ୍କବାଦୀ ସଂଗଠନ ତେହେରିକ-ଇ-ତାଲିବାନ ପାକିସ୍ଥାନ (ଟିଟିପି)କୁ ଆଫଗାନିସ୍ତାନ ବିସ୍ଫୋରକ ଓ ଘାତକ ଅସ୍ତ୍ରଶସ୍ତ୍ର ଯୋଗାଉଛି।
ଆତଙ୍କବାଦୀ ସଂଗଠନର କ୍ରମାଗତ ହିଂସାତ୍ମକ କାର୍ଯ୍ୟକଳାପ ଯୋଗୁଁ ଦୁଇ ଦେଶ ମଧ୍ୟରେ ସମ୍ପର୍କ ଖରାପ ହେବା ସହ ସୀମାରେ ମଧ୍ୟ ସମସ୍ୟା ଉପୁଜିଛି, ଯେଉଁ କାରଣରୁ ଉଭୟ ଦେଶର ବାଣିଜ୍ୟ ଖରାପ ହେଉଛି। ପାକିସ୍ତାନ ବାରମ୍ବାର ଏହି ପ୍ରସଙ୍ଗ ଉଠାଇବା ପରେ ଏକ ଉଚ୍ଚ ସ୍ତରୀୟ ବୈଠକରେ ନିଷ୍ପତ୍ତି ନିଆଯାଇଛି ଯେ ଉଭୟ ଦେଶର ସୀମାରେ ଉପସ୍ଥିତ ଥିବା ସୁରକ୍ଷା ବାହିନୀ କ୍ରମାଗତ ଭାବରେ ନିଜ ନିଜ ସୀମାରେ ପାଟ୍ରୋଲିଂ କରିବେ, ଯାହା ଦ୍ୱାରା କୌଣସି ବିସ୍ଫୋରକ ଓ ଅସ୍ତ୍ରଶସ୍ତ୍ର ଚାଲାଣ ହୋଇ ପାରିବ ନାହିଁ।
