ବାଲେଶ୍ୱର ଅଫିସ,୧୪।୫: ପ୍ରବଳ ଗରମରେ ଅସ୍ତବ୍ୟସ୍ତ ଜନଜୀବନ। ଘରୁ ବାହାରିବା ଏକପ୍ରକାର ଅସମ୍ଭବ ହୋଇପଡିଛି। ଦିନ ୧୨ଟା ସୁଦ୍ଧା ବାଲେଶ୍ୱରରେ ତାପମାତ୍ରା ୩୪ ଡିଗ୍ରୀ ଉପରେ ରହୁଥିବା ବେଳେ ଅସହ୍ୟ ଗୁଳୁଗୁଳି ହେଉଛି। ଟିକିଏ ଗଛ ମୂଳର ଛାଇ ଦେଖି ଅଟକି ଯାଉଛନ୍ତି ପଥଚାରୀ। ଏଥିରେ ପ୍ରାଣୀପକ୍ଷୀଙ୍କୁ ମଧ୍ୟ ନିସ୍ତାର ନାହିଁ। ପ୍ରବଳ ଖରାରେ ପାଣି ଟୋପେ ପାଇଁ ମଧ୍ୟ ଛଟପଟ ହେଉଛନ୍ତି। ବାଲେଶ୍ୱର ସହର ଦାମୋଦରପୁର ଅଞ୍ଚଳର କେତେଜଣ ମିଶି ନିରୀହ ପକ୍ଷୀମାନଙ୍କ ପାଇଁ ଛୋଟ ପ୍ରୟାସଟିଏ ଆରମ୍ଭ କରିଛନ୍ତି। ତାତିକୁ ଦୃଷ୍ଟିରେ ରଖି କଲେଜ ଓ ସ୍କୁଲ ପିଲାମାନେ ପକ୍ଷୀଙ୍କ ପାଇଁ ପାନୀୟଜଳ ବ୍ୟବସ୍ଥା କରିଛନ୍ତି। ଯୁବ ସାମାଜିକ କର୍ମୀ ଚିତ୍ତରଞ୍ଜନ ନାୟକଙ୍କ ତତ୍ତ୍ୱାବଧାନରେ କଲେଜ ଛାତ୍ରୀ ପିଙ୍କି ଦାସ ଓ ଦଶମ ଶ୍ରେଣୀ ଛାତ୍ର ଭାଗିରଥି ନାୟକ, ଗୃହିଣୀ ସୂଚନା ସାମଲ, ଛାତ୍ରୀ ଋତୁକ୍ରିଷ୍ଣା ପରିଡ଼ା, ସୁରେନ୍ଦ୍ର କୁମାର ସିଂ, ସାଏନ ଦାସ ଓ ରୋହିତ ଦାସ ପ୍ରମୁଖ ସହଦେବଖୁଣ୍ଟା ଓ ଦାମୋଦରପୁରର ବିଭିନ୍ନ ସ୍ଥାନରେ ମାଟିପାତ୍ର ଝୁଲେଇ ପକ୍ଷୀଙ୍କ ପିଇବା ପାଣି ବ୍ୟବସ୍ଥା କରିଛନ୍ତି। ଯାହା ଅନ୍ୟମାନଙ୍କ ପାଇଁ ଉଦାହରଣ ସାଜିଛି। ଏଥିସହିତ ସମସ୍ତେ ନିଜ ଘର ଆଗରେ ତଥା ଛାତରେ ଏପରି ପାଣିପାତ୍ର ରଖି ମଣିଷପଣିଆ ଦେଖାଇବା ପାଇଁ ଏକ ବାର୍ତ୍ତା ଦେଇଛନ୍ତି।
