ଓ୍ବାଶିଂଟନ୍,୧୫।୮:ଭାରତ ଏବଂ ପାକିସ୍ତାନ ମଧ୍ୟରେ ବିବାଦ ଶେଷ ହେବାର ତିନି ମାସ ବିତିଗଲାଣି, କିନ୍ତୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏହାକୁ ନେଇ ନୂଆ ନୂଆ ଦାବି କରୁଛନ୍ତି। ସେ ଏବେ ଦାବି କରିଛନ୍ତି, ଏହି ଯୁଦ୍ଧ ପରମାଣୁ ଯୁଦ୍ଧରେ ପରିଣତ ହୋଇପାରିଥାନ୍ତା। ଦୁଇ ଦେଶ ମଧ୍ୟରେ ଯୁଦ୍ଧବିରତି ତାଙ୍କ ଉଦ୍ୟମ ଦ୍ୱାରା ସମ୍ଭବ ହୋଇପାରିଛି। କିନ୍ତୁ ଭାରତ କହିଛି, ଦୁଇ ଦେଶର ସାମରିକ ମୁଖ୍ୟ (ଡିଜିଏମଓ)ଙ୍କ ମଧ୍ୟରେ ସିଧାସଳଖ ଯୋଗାଯୋଗ ଦ୍ୱାରା ଯୁଦ୍ଧବିରତି ନିଷ୍ପତ୍ତି ନିଆଯାଇଥିଲା। ଟ୍ରମ୍ପ ପୁଣି ଥରେ ହ୍ବାଇଟ ହାଉସରେ ପୁନର୍ବାର ଦୋହରାଇଥିଲେ ଯେ, ତାଙ୍କ ହସ୍ତକ୍ଷେପ ଯୋଗୁ୍ ଏହି ବିବାଦ ଶେଷ ହୋଇଛି।
ତାଙ୍କର ଏହି ଦାବି ଏପରି ସମୟରେ ମଧ୍ୟ ଆସିଛି। ଯେତେବେଳେ ସେ ଭାରତ ଉପରେ ୫୦ ପ୍ରତିଶତ ଟାରିଫ୍ ଲାଗୁ କରିଛନ୍ତି। ଟ୍ରମ୍ପ କହିଛନ୍ତି, ଭାରତ ଏବଂ ପାକିସ୍ତାନର ଲଢ଼ୁଆ ବିମାନ ପରସ୍ପରକୁ ଗୁଳି କରୁଥିଲେ। ୬-୭ଟି ବିମାନ ଖସାଇ ଦିଆଯାଇଥିଲା। ପରିସ୍ଥିତି ଏତେ ଉତ୍ତେଜନାପୂର୍ଣ୍ଣ ଥିଲା ଯେ ସେମାନେ ସମ୍ଭବତଃ ପରମାଣୁ ଅସ୍ତ୍ର ବ୍ୟବହାର କରିବାକୁ ପ୍ରସ୍ତୁତ ଥିଲେ, କିନ୍ତୁ ଆମେ ଏହି ପ୍ରସଙ୍ଗର ସମାଧାନ କରିଛୁ।
ଟ୍ରମ୍ପ ଏହା ମଧ୍ୟ ଦାବି କରିଛନ୍ତି, ୬-୭ ମାସରେ ସେ ଛଅଟି ଯୁଦ୍ଧ ଶେଷ କରିଛନ୍ତି ଏବଂ ସେ ଏଥିରେ ଗର୍ବିତ। ମେ ୧୦ରେ ସେ ସୋସିଆଲ ମିଡିଆରେ ଘୋଷଣା କରିଥିଲେ, ଭାରତ ଏବଂ ପାକିସ୍ତାନ ଯୁଦ୍ଧବିରତି ପାଇଁ ରାଜି ହୋଇଛନ୍ତି। ସେବେଠାରୁ ସେ ଏହି ଦାବିକୁ ଅନେକ ଥର ଦୋହରାଇଛନ୍ତି। ସେ ଉଭୟ ପରମାଣୁ ଶକ୍ତିଶାଳୀ ଦେଶକୁ କହିଥିଲେ ଯେ ଯଦି ସେମାନେ ଯୁଦ୍ଧ ବନ୍ଦ କଲେ, ଆମେରିକା ସେମାନଙ୍କ ସହିତ ଅଧିକ ବାଣିଜ୍ୟ କରିବ।
ଟ୍ରମ୍ପଙ୍କ ଏହି ବିବୃତ୍ତି ଏପରି ଏକ ସମୟରେ ଆସିଛି, ଯେତେବେଳେ ସେ ଆଜି ଅଗଷ୍ଟ ୧୫ ତାରିଖରେ ଆଲାସ୍କାରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବାକୁ ଯାଉଛନ୍ତି। ଏହି ବୈଠକର ଉଦ୍ଦେଶ୍ୟ ରୁଷିଆ-ୟୁକ୍ରେନ ଯୁଦ୍ଧ ସମାପ୍ତ କରିବାକୁ ଚେଷ୍ଟା କରିବା କୁହାଯାଉଛି। ଟ୍ରମ୍ପ କହିଛନ୍ତି, ମୁଁ ଭାବୁଥିଲି ରୁଷିଆ-ୟୁକ୍ରେନ ଯୁଦ୍ଧ ସମାପ୍ତ କରିବା ସବୁଠାରୁ ସହଜ ହେବ, କିନ୍ତୁ ଏହା ସବୁଠାରୁ କଷ୍ଟକର ହୋଇଗଲା। ଯଦି ମୁଁ ରାଷ୍ଟ୍ରପତି ନ ଥାନ୍ତି, ତେବେ ପୁଟିନ ସମଗ୍ର ୟୁକ୍ରେନକୁ ନିଜ ଦଖଲକୁ ନେଇଥାନ୍ତେ। ଏହି ଯୁଦ୍ଧ ହେବା ଉଚିତ୍ ନ ଥିଲା।
