ନୂଆଦିଲ୍ଲୀ,୭।୮: ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଗୁରୁବାର କହିଛନ୍ତି ଯେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଖୁବ ଶୀଘ୍ର ଭାରତ ଗସ୍ତରେ ଆସିବେ। ମସ୍କୋରେ ଥିବା ଡୋଭାଲ ତାରିଖ ଉଲ୍ଲେଖ କରି ନାହାଁନ୍ତି, କିନ୍ତୁ ଇଣ୍ଟରଫ୍ୟାକ୍ସ ନ୍ୟୁଜ ଏଜେନ୍ସି ଅନୁଯାୟୀ, ପୁଟିନଙ୍କ ଗସ୍ତ ଅଗଷ୍ଟ ଶେଷ ଭାଗରେ ହେବାର ସମ୍ଭାବନା ଅଛି।
ଏନଏସଏ ଅଜିତ ଡୋଭାଲ କହିଛନ୍ତି, ‘ଭାରତ ଏବଂ ରୁଷିଆ ମଧ୍ୟରେ ଏକ ବିଶେଷ ସମ୍ପର୍କ ଅଛି, ଯାହାକୁ ଆମେ ବହୁତ ଗୁରୁତ୍ୱ ଦେଉଛୁ। ଆମର ଉଚ୍ଚସ୍ତରୀୟ ଯୋଗାଯୋଗ ହୋଇଛି। ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତ ବିଷୟରେ ଜାଣି ଆମେ ବହୁତ ଉତ୍ସାହିତ ଏବଂ ଖୁସି। ମୁଁ ଭାବୁଛି ଏବେ ତାରିଖ ମଧ୍ୟ ଶୀଘ୍ର ସ୍ଥିର କରାଯିବ।’
ପୁଟିନଙ୍କ ଭାରତ ଗସ୍ତ ଏପରି ଏକ ସମୟରେ ହେବ ଯେତେବେଳେ ଆମେରିକା ରୁଷିଆ ତୈଳ କ୍ରୟ ବନ୍ଦ କରିବା ପାଇଁ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛି। ଅଜିତ ଡୋଭାଲଙ୍କ ରୁଷିଆ ଗସ୍ତ ପୂର୍ବରୁ, ମସ୍କୋ ଭାରତର ବାଣିଜି୍ୟକ ଅଂଶୀଦାର ବାଛିବାର ଅଧିକାରକୁ ସମର୍ଥନ କରି ଟ୍ରମ୍ପଙ୍କୁ ଟାର୍ଗେଟ କରିଥିଲା। କ୍ରେମଲିନ ମୁଖପାତ୍ର ଦିମିତ୍ରୀ ପେସକୋଭ କହିଥିଲେ ଯେ ଦେଶଗୁଡ଼ିକୁ ରୁଷ ିଆସହିତ ବାଣିଜ୍ୟ ସମ୍ପର୍କ ଭାଙ୍ଗିବାକୁ ବାଧ୍ୟ କରିବା ବେଆଇନ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର (ଅଗଷ୍ଟ ୬, ୨୦୨୫) ଭାରତ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରିବା ପାଇଁ ଏକ ନୂତନ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ବାକ୍ଷର କରିଛନ୍ତି। ଟ୍ରମ୍ପ ଚେତାବନୀ ଦେଇଛନ୍ତି ଯେ ଯଦି ମସ୍କୋ ଶୁକ୍ରବାର (୮ ଅଗଷ୍ଟ, ୨୦୨୫) ସୁଦ୍ଧା ୟୁକ୍ରେନରେ ଯୁଦ୍ଧ ବନ୍ଦ କରିବାକୁ ରାଜି ନ ହୁଏ, ତେବେ ସେ ରୁଷୀୟ ତୈଳ କ୍ରେତାଙ୍କ ଉପରେ ଦ୍ୱିତୀୟ ଶୁଳ୍କ ଲାଗୁ କରିବେ।
କ୍ରେମଲିନ ଗୁରୁବାର (୭ ଅଗଷ୍ଟ, ୨୦୨୫) କହିଛି ଯେ ପୁଟିନ ଆଗାମୀ ଦିନରେ ଟ୍ରମ୍ପଙ୍କୁ ମଧ୍ୟ ଭେଟିବେ। ରୁଷୀୟ ରାଷ୍ଟ୍ରପତିଙ୍କ ବୈଦେଶିକ ବ୍ୟାପାର ପରାମର୍ଶଦାତା ୟୁରି ଉଶାକୋଭ କହିଛନ୍ତି ଯେ ଉଭୟ ଦେଶ ଏକ ବୈଠକ ପାଇଁ ପ୍ରସ୍ତୁତି କରୁଛନ୍ତି। ସେ କହିଛନ୍ତି ଯେ ଟ୍ରମ୍ପ ଏବଂ ପୁଟିନ କେଉଁ ସ୍ଥାନରେ ସାକ୍ଷାତ କରିବେ ତାହା ସହମତ ହୋଇଛି, ଯାହା ପରେ ଘୋଷଣା କରାଯିବ।