ଓ୍ବାଶିଟନ୍,୧୬।୮:ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଆଲାସ୍କାରେ ହୋଇଥିବା ବହୁଚର୍ଚ୍ଚିତ ସାକ୍ଷାତରେ ୟୁକ୍ରେନ ଯୁଦ୍ଧ, ପାରସ୍ପରିକ ସମ୍ପର୍କ ଏବଂ ସହଯୋଗର ଅନେକ ପ୍ରସଙ୍ଗ ଉପରେ ଆଲୋଚନା ହୋଇଥିଲା। ବୈଠକ ପରେ ଅନୁଷ୍ଠିତ ମିଳିତ ସାମ୍ବାଦିକ ସମ୍ମିଳନୀ ମାତ୍ର ୧୨ ମିନିଟ ଧରି ଚାଲିଥିଲା, ଯେଉଁଥିରେ ଉଭୟ ନେତା ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ନ ଥିଲେ, କେବଳ ସେମାନଙ୍କର ମତ ରଖିଥିଲେ।
ସାମ୍ବାଦିକ ସମ୍ମିଳନୀ ଶେଷରେ ଟ୍ରମ୍ପ ପୁଟିନଙ୍କୁ କହିଥିଲେ, ଶୀଘ୍ର ଦେଖା ହେବ। ଏହାର ଉତ୍ତରରେ ପୁଟିନ ଇଂରାଜୀରେ କହିଥିଲେ,ନେକ୍ସଟ ଟାଇମ୍ ଇନ୍ ମସ୍କୋ(ଏଥର ମସ୍କୋରେ)। ଏଥିରେ ଟ୍ରମ୍ପ ଆଶ୍ଚର୍ଯ୍ୟ ହୋଇ ହସି ହସି କହିଲେ – ଓଃ, ଦ୍ୟାଟ୍ସ ଆନ୍ ଇନ୍ଟ୍ରେଷ୍ଟିଙ୍ଗ ଓ୍ବାନ୍।
ପୁଟିନ କହିଥିଲେ, ଆମେରିକା ଏବଂ ରୁଷିଆର ସହଭାଗୀ ଇତିହାସର ଏକ ଅଂଶ। ସେ ମନେ ପକାଇ ଦେଇଥିଲେ, ଉଭୟ ଦେଶ ଦ୍ୱିତୀୟ ବିଶ୍ୱଯୁଦ୍ଧରେ ଏକାଠି ଲଢ଼ିଥିଲେ। ପୁଟିନ ସ୍ବୀକାର କରିଥିଲେ, ବିଗତ ବର୍ଷଗୁଡ଼ିକରେ ସମ୍ପର୍କରେ ଅସୁବିଧା ଥିଲା। ଏହି ମୁହାଁମୁହିଁ ସାକ୍ଷାତ ଦୀର୍ଘ ବର୍ଷ ହେବ ଆବଶ୍ୟକ ଥିଲା।
ପୁଟିନ କହିଛନ୍ତି, ଆଲୋଚନାର ଏକ ବଡ଼ ଅଂଶ ୟୁକ୍ରେନ ଉପରେ କେନ୍ଦ୍ରିତ ଥିଲା। ପରିସ୍ଥିତିରେ ଉନ୍ନତି ଆଣିବା ଜରୁରୀ ଏବଂ ବିବାଦର ପ୍ରକୃତ କାରଣ ବୁଝିବା ପାଇଁ ଟ୍ରମ୍ପଙ୍କ ଇଚ୍ଛାକୁ ପ୍ରଶଂସା କରିଛନ୍ତି। ଯେଉଁ ସହମତି ହୋଇଛି ତାହା ୟୁକ୍ରେନରେ ଶାନ୍ତି ପାଇଁ ପଥ ଖୋଲିବ ଏବଂ ଏହାର ସୁରକ୍ଷା ସୁନିଶ୍ଚିତ କରିବ। ରୁଷିଆ ଆନ୍ତରିକ ଭାବରେ ଯୁଦ୍ଧ ଶେଷ କରିବାକୁ ଚାହୁଁଛି। ୟୁରୋପ ଏବଂ ୟୁକ୍ରେନ ଆଲୋଚନାକୁ ବାଧା ଦେବା ଉଚିତ୍ ନୁହେଁ।
ପୁଟିନ କହିଛନ୍ତି,ଆର୍କଟିକ ଅଞ୍ଚଳରେ ରୁଷିଆ ଏବଂ ଆମେରିକା ମଧ୍ୟରେ ସହଯୋଗ ସମ୍ଭବ ଏବଂ ଦୁଇ ଦେଶ ମଧ୍ୟରେ ନିବେଶର ପ୍ରଚୁର ସମ୍ଭାବନା ରହିଛି। ଯଦି ଟ୍ରମ୍ପ ୨୦୨୨ରେ ରାଷ୍ଟ୍ରପତି ହୋଇଥାଆନ୍ତେ, ତେବେ ଏହି ସଂଘର୍ଷ କେବେ ଆରମ୍ଭ ହୋଇ ନ ଥାଆନ୍ତା। ଆଲୋଚନା ସମୟରେ ପୁଟିନ ଟ୍ରମ୍ପଙ୍କୁ ତାଙ୍କର ‘ବନ୍ଧୁତ୍ୱପୂର୍ଣ୍ଣ ଏବଂ ବିଶ୍ୱସ୍ତ’ ମନୋଭାବ ପାଇଁ ଧନ୍ୟବାଦ ମଧ୍ୟ ଜଣାଇଥିଲେ।
ଟ୍ରମ୍ପ କହିଛନ୍ତି, ସେ ଖୁବ ଶୀଘ୍ର ନାଟୋ ଏବଂ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ସହ କଥା ହେବେ। ବୈଠକରେ ଅନେକ ପ୍ରସଙ୍ଗରେ ସହମତି ହୋଇଛି, ଯଦିଓ ଏକ ବଡ଼ ପ୍ରସଙ୍ଗ ଏବେ ବି ବିଚାରାଧୀନ ଅଛି। ପୁଟିନ ଅଧିକ ଲୋକଙ୍କ ମୃତ୍ୟୁ ଦେଖିବାକୁ ଚାହାଁନ୍ତି ନାହିଁ ଏବଂ କେବଳ କିଛି ପଏଣ୍ଟର ସମାଧାନ ବାକି ଅଛି।
