ଓ୍ବାଶିଂଟନ,୧୯।୯: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହ୍ବାଇଟ ହାଉସରେ CNN, Politico ଏବଂ MSNBC ଉପରେ କଟକଣା ଲଗାଇବାକୁ ଘୋଷଣା କରିଛନ୍ତି। ‘ଟ୍ରୁଥ ସୋସିଆଲ’ (Truth Social) ରେ ଏକ ପୋଷ୍ଟ କରି ଟ୍ରମ୍ପ ଏହି ଗଣମାଧ୍ୟମ ସଂସ୍ଥାଗୁଡ଼ିକ ଉପରେ କ୍ରମାଗତ ଭାବେ ‘ଭିତ୍ତିହୀନ ଖବର’ (fake news) ପ୍ରକାଶ ଓ ପ୍ରସାରଣ କରୁଥିବାର ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ରାଷ୍ଟ୍ରପତି, ଟ୍ରମ୍ପ ପ୍ରଶାସନ କିମ୍ବା ଯୁକ୍ତରାଷ୍ଟ୍ର ଆମେରିକା ସମ୍ପର୍କିତ ଖବର ପ୍ରସାରଣ ବେଳେ ଗଣମାଧ୍ୟମ ସଂସ୍ଥାଗୁଡ଼ିକୁ ‘କାଳ୍ପନିକ ଘଟଣା ଓ ମିଥ୍ୟା’ ଲେଖିବା କିମ୍ବା ରିପୋର୍ଟ କରିବାକୁ ଅନୁମତି ଦିଆଯିବା ଉଚିତ ନୁହେଁ।
ନିଜ ପୋଷ୍ଟରେ ଡୋନାଲ୍ଡ ଟ୍ରମ୍ପ ଲେଖିଛନ୍ତି, ‘ମୁଁ ଗର୍ବର ସହ ଘୋଷଣା କରୁଛି ଯେ, ତୁରନ୍ତ ପ୍ରଭାବରୁ ମୁଁ ‘ଫେକ ନ୍ୟୁଜ’ ବା ମିଥ୍ୟା ଖବର ପ୍ରସାରଣକାରୀ CNN, MSNBC (ଯାହା କମ ଦର୍ଶକ ସଂଖ୍ୟା ଓ ବିଶ୍ୱସନୀୟତାର ଅଭାବ ଯୋଗୁ ନିକଟରେ ନିଜ ନାମ ପରିବର୍ତ୍ତନ କରିଥିଲା!) ଏବଂ Politico କୁ ହ୍ବାଇଟ ହାଉସରୁ୍ରୁ ବାରଣ କରୁଛି।’
Politico ସମ୍ପର୍କରେ ଟ୍ରମ୍ପ ଅଭିଯୋଗ କରିଛନ୍ତି ଯେ ‘ଦୁର୍ନୀତିଗ୍ରସ୍ତ ଜୋ ବାଇଡେନ’ (Crooked Joe Biden) ଙ୍କ କାର୍ଯ୍ୟକାଳ ମଧ୍ୟରେ ଏହି ସଂସ୍ଥା ଆମେରିକା ସରକାରଙ୍କଠାରୁ ୮ ନିୟୁତ ଡଲାରର ଏକ ବେଆଇନ ଓ ଅଯୌକ୍ତିକ ସବସ୍କ୍ରିପସନ ଶୁଳ୍କ ଗ୍ରହଣ କରିଥିଲା। ଏହାକୁ ସର୍ବାଧିକ ପରିମାଣର ଅର୍ଥ ପ୍ରଦାନ ବୋଲି ବର୍ଣ୍ଣନା କରି ଟ୍ରମ୍ପ ଏହି କାରବାର ଉପରେ ପ୍ରଶ୍ନ ଉଠାଇବା ସହ ଏହାକୁ ଦୁର୍ନୀତିର ଏକ କାର୍ଯ୍ୟ ବୋଲି ଅଭିହିତ କରିଛନ୍ତି।
ଟ୍ରମ୍ପ ଆହୁରି ମଧ୍ୟ କହିଛନ୍ତି ଯେ ଅନ୍ୟାନ୍ୟ ‘ଫେକ ନ୍ୟୁଜ’ ଗଣମାଧ୍ୟମ ସଂସ୍ଥା ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଶେଷରେ, ଏହି ବିଷୟ ପ୍ରତି ଧ୍ୟାନ ଦେଇଥିବାରୁ ସେ ସମସ୍ତଙ୍କୁ ଧନ୍ୟବାଦ ଜଣାଇ ନିଜ ପୋଷ୍ଟ ଶେଷ କରିଛନ୍ତି।
ଯଦି ଟ୍ରମ୍ପଙ୍କ ଏହି କଟକଣା କାର୍ଯ୍ୟକାରୀ ହୁଏ, ତେବେ CNN, Politico ଏବଂ MSNBC ଏହାକୁ କୋର୍ଟରେ ଚ୍ୟାଲେଞ୍ଜ କରିପାରନ୍ତି। ତଥାପି, କୌଣସି ରାୟ ଆସିବା ପର୍ଯ୍ୟନ୍ତ ଏହି ଗଣମାଧ୍ୟମ ସଂସ୍ଥାଗୁଡ଼ିକୁ ହ୍ବାଇଟ ହାଉସ ପ୍ରେସ ପୁଲୁରୁ ବାଦ ଦିଆଯାଇପାରେ।
ଏହି ଘଟଣା ଏପରି ଏକ ସମୟରେ ଘଟିଛି ଯେତେବେଳେ ଆମେରିକାର ଆଗାମୀ ମଧ୍ୟବର୍ତ୍ତୀକାଳୀନ ନିର୍ବାଚନକୁ ନେଇ ରାଜନୈତିକ କାର୍ଯ୍ୟକଳାପ ତୀବ୍ର ହେବାକୁ ଯାଉଛି। ଫଳସ୍ବରୂପ, ହ୍ବାଇଟ ହାଉସ ଏବଂ ପ୍ରମୁଖ ଗଣମାଧ୍ୟମ ସଂସ୍ଥାଗୁଡ଼ିକ ମଧ୍ୟରେ ଥିବା ଏହି ବିବାଦ ଆହୁରି ବଢ଼ିପାରେ।
ହ୍ବାଇଟ ହାଉସ ପ୍ରେସ ପୁଲୁର କୌଣସି ପ୍ରମୁଖ ଗଣମାଧ୍ୟମ ସଂସ୍ଥାକୁ ବାଦ ଦେବା ପାଇଁ ଟ୍ରମ୍ପ ପ୍ରୟାସ କରିବା ଏହା ପ୍ରଥମ ଘଟଣା ନୁହେଁ। ୨୦୨୫ ମସିହା ଫେବୃଆରୀ ମାସରେ ଟ୍ରମ୍ପ ‘ଆସୋସିଏଟେଡ ପ୍ରେସ’ (AP) କୁ ହ୍ବାଇଟ ହାଉସରୁ ବାରଣ କରିଥିଲେ।
AP ଟ୍ରମ୍ପଙ୍କ ଏହି ନିଷ୍ପତ୍ତିକୁ ଫେଡେରାଲ କୋର୍ଟରେ ଚ୍ୟାଲେଞ୍ଜ କରିଥିଲା। ଏହି ମାମଲାର ଆଇନଗତ ପ୍ରକ୍ରିୟା ବର୍ତ୍ତମାନ ମଧ୍ୟ ଜାରି ରହିଛି।
