ଓ୍ବାଶିଂଟନ,୧୪।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ଗସ୍ତରେ ଅଛନ୍ତି। ସେ ଗୁରୁବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିଥିଲେ। ପ୍ରଧାନମନ୍ତ୍ରୀ ମୋଦିଙ୍କ ଏହି ଗସ୍ତ କେବଳ ଦୁଇ ଦେଶ ମଧ୍ୟରେ ସମ୍ପର୍କକୁ ମଜବୁତ କରିବ ନାହିଁ ବରଂ ପ୍ରତିରକ୍ଷା ସହଯୋଗକୁ ମଧ୍ୟ ପ୍ରୋତ୍ସାହିତ କରିବ। ଏହା ସହିତ, ଆତଙ୍କବାଦ ବିରୋଧରେ ଲଢ଼େଇରେ ଭାରତ ଏବଂ ଆମେରିକା ଦୃଢ଼ ଭାବରେ ଛିଡ଼ା ହୋଇଥିବା ଦେଖାଯିବ। କାରଣ ପ୍ରଧାନମନ୍ତ୍ରୀ ମୋଦିଙ୍କ ଏହି ଗସ୍ତ ସମୟରେ ରାଷ୍ଟ୍ରପତି ଟ୍ରମ୍ପ ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ଦୋଷୀ ଆତଙ୍କବାଦୀ ତହବୁର ରାଣାଙ୍କୁ ଭାରତକୁ ପ୍ରତ୍ୟର୍ପଣ କରିବାକୁ ମଧ୍ୟ ଅନୁମୋଦନ କରିଛନ୍ତି।
ଏକ ମିଳିତ ସାମ୍ବାଦିକ ସମ୍ମିଳନୀ ସମୟରେ ଟ୍ରମ୍ପ ଏହା ଘୋଷଣା କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ‘ମୁଁ ଘୋଷଣା କରି ଖୁସି ହେଉଛି ଯେ ମୋ ପ୍ରଶାସନ ୨୦୦୮ ମସିହାର ଭୟଙ୍କର ମୁମ୍ବାଇ ଆତଙ୍କବାଦୀ ଆକ୍ରମଣରେ ତାଙ୍କର ଭୂମିକା ପାଇଁ ଭାରତରେ ନ୍ୟାୟର ସମ୍ମୁଖୀନ ହୋଇଥିବା ବିଶ୍ୱର ସବୁଠାରୁ ଖରାପ ବ୍ୟକ୍ତିଙ୍କ ମଧ୍ୟରୁ ଜଣେ ଷଡ଼ଯନ୍ତ୍ରକାରୀ (ତାହବୁର ରାଣା)ଙ୍କ ପ୍ରତ୍ୟର୍ପଣକୁ ଅନୁମୋଦନ କରିଛି। ସେ ନ୍ୟାୟର ସମ୍ମୁଖୀନ ହେବା ପାଇଁ ଭାରତ ଫେରି ଯାଉଛନ୍ତି।
ସୂଚନାଯୋଗ୍ୟ, ପୂର୍ବରୁ ଆମେରିକାର ସୁପ୍ରିମକୋର୍ଟ ତହବୁର ରାଣାଙ୍କ ଦୋଷୀ ସାବ୍ୟସ୍ତ ବିରୋଧରେ ଦାଖଲ କରାଯାଇଥିବା ସମୀକ୍ଷା ଆବେଦନକୁ ଖାରଜ କରିଦେଇଥିଲେ। ଉଲ୍ଲେଖନୀୟ ଯେ ପାକିସ୍ତାନୀ ବଂଶୋଦ୍ଭବ କାନାଡିଆନ ବ୍ୟବସାୟୀ ତହବୁର ରାଣାଙ୍କ ଉପରେ ଭାରତରେ ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାର ଅଭିଯୋଗ ଥିଲା, ଯାହା ପରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଛନ୍ତି।
ଭାରତ ମୁମ୍ବାଇ ଆକ୍ରମଣର ଦୋଷୀ ରାଣାଙ୍କ ବିରୋଧରେ ଆମେରିକୀୟ ଏଜେନ୍ସି ସହିତ ସୂଚନା ଶେୟାର କରିଥିଲା। ଯାହାକୁ ପ୍ରଥମେ ନିମ୍ନ ଅଦାଲତରେ ଏବଂ ପରେ ସୁପ୍ରିମକୋର୍ଟରେ ରଖାଯାଇଥିଲା। କୋର୍ଟ ଭାରତର ଏହି ପ୍ରମାଣଗୁଡ଼ିକୁ ଗ୍ରହଣ କରିଥିଲେ ଏବଂ ରାଣାଙ୍କୁ ଦୋଷୀ ଘୋଷଣା କରିଥିଲେ। ଭାରତ ଦେଇଥିବା ଦସ୍ତାବିଜରେ ୨୬/୧୧ ଆକ୍ରମଣରେ ତହବୁର ରାଣାଙ୍କ ସମ୍ପୃକ୍ତି ଉଲ୍ଲେଖ ଥିଲା।
ଏହା ପରେ ଭାରତ ତହବୁର ରାଣାଙ୍କ ପ୍ରତ୍ୟର୍ପଣ ଦାବି କରିବା ଆରମ୍ଭ କଲା। ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣାରେ ଭାରତରେ ରାଣାଙ୍କୁ ଖୋଜାଯାଉଥିଲା। ଏହା ପୂର୍ବରୁ ମଧ୍ୟ ସାନ ଫ୍ରାନ୍ସିସ୍କୋର ନର୍ଦର୍ଣ୍ଣ ସର୍କିଟ ପାଇଁ ଆମେରିକାର କୋର୍ଟ ଅଫ ଅପିଲ୍ସ ସମେତ ଅନେକ ଫେଡେରାଲ କୋର୍ଟରେ ଆଇନଗତ ଲଢ଼େଇ ହାରିଯାଇଥିଲା।
୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ମାମଲାରେ ମୁମ୍ବାଇ ପୋଲିସ ତା’ର ଚାର୍ଜସିଟରେ ରାଣାଙ୍କ ନାମ ସାମିଲ କରିଥିଲା। ତାଙ୍କ ଉପରେ ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ଏବଂ ଆତଙ୍କବାଦୀ ସଂଗଠନ ଲସ୍କର-ଏ-ତୋଏବାର ସକ୍ରିୟ ସଦସ୍ୟ ଭାବରେ କାମ କରିବାର ଅଭିଯୋଗ ଥିଲା। ଏଥିସହିତ, ରାଣାଙ୍କୁ ଚାର୍ଜସିଟରେ ଅଭିଯୁକ୍ତ କରାଯାଇଥିଲା ଯେ ସେ ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଡେଭିଡ କୋଲମ୍ୟାନ ହେଡଲିଙ୍କୁ ସେ ସାହାଯ୍ୟ କରିଥିଲେ। ରାଣା ମୁମ୍ବାଇର କେଉଁ ସ୍ଥାନଗୁଡ଼ିକ ଉପରେ ଆକ୍ରମଣ କରାଯିବ ତାହାର ରେକି ମଧ୍ୟ କରିଥିଲେ। ସେ ଏହାର ବ୍ଲୁପ୍ରିଣ୍ଟ ପ୍ରସ୍ତୁତ କରି ପାକିସ୍ତାନୀ ଆତଙ୍କବାଦୀଙ୍କୁ ହସ୍ତାନ୍ତର କରିଥିଲେ।
