ଚେନ୍ନାଇ, ୧୯।୮: ତାମିଲନାଡ଼ୁରୁ ଏକ ନିଆରା ମାମଲା ସାମ୍ନାକୁ ଆସିଛି। ଯେଉଁଠାରେ ଏକ ମାଙ୍କଡ଼ ପଲ ଜଣେ ୭୦ ବର୍ଷୀୟା ବୃଦ୍ଧାଙ୍କ ଘରେ ପଶି ନଗଦ ୭୦ ହଜାର ଟଙ୍କା ସମେତ ସୁନା ଗହଣା ନେଇ ପଳାଇଛନ୍ତି। ଏହି ସମୟରେ ମହିଳାଜଣଙ୍କ ମାଙ୍କଡ଼ଙ୍କ ପିଛା କରିଥିଲେ ମଧ୍ୟ ସୁନା ଗହଣା ଓ ଟଙ୍କା ନେଇ ମାଙ୍କଡ଼ମାନେ ସେଠାରେ ପଳାଇ ଯାଇଥିଲେ।
ଘଟଣାଟି ତାମିଲନାଡ଼ୁର ଥାଞ୍ଜାଭର ଜିଲା ବୀରମାଙ୍ଗୁଡ଼ି ଗ୍ରାମରେ ଘଟିଛି।
ଜି. ଶରଥାମ୍ବଲ ନାମକ ୭୦ ବର୍ଷୀୟା ଏହି ବୃଦ୍ଧା ମଙ୍ଗଳବାର ନିଜଘର ଅଗଣାରେ ଲୁଗା ସଫା କରୁଥିଲେ। ଏହି ସମୟରେ ମାଙ୍କଡ଼ ପଲ ତାଙ୍କ ଘରକୁ ପ୍ରବେଶ କରି କିଛି କଦଳୀ ଓ ଗୋଟିଏ ଚାଉଳ ବ୍ୟାଗ୍ ନେଇ ପଳାଇଥିଲେ। ତେବେ ଦୁର୍ଭାଗ୍ୟବଶତଃ ମହିଳାଜଣଙ୍କ ସେହି ସେହି ଚାଉଳ ବ୍ୟାଗରେ ତାଙ୍କର ସଞ୍ଚିତ ଅର୍ଥ ନଗଦ ୨୫ ହଜାର ଟଙ୍କା ଓ ସୁନା ଗହଣା ଲୁଚାଇ ରଖିଥିଲେ। ମାଙ୍କଡ଼ ପଲ ଏହାପରେ ପାଖରେ ଥିବା ସରକାରୀ ହସ୍ପିଟାଲ ଛାତ ଉପରେ ବସି ଚାଉଳ ଓ କଦଳୀ ଖାଇବାରେ ଲାଗିଥିଲେ। ଏହି ସମୟରେ ଶରଥାମ୍ବଲ ଓ କିଛି ସ୍ଥାନୀୟ ଲୋକ ମାଙ୍କଡ଼ଙ୍କ ପିଛା କରି ସେଠାରେ ପହଞ୍ଚିଥିଲେ ଏବଂ ମାଙ୍କଡ଼ଙ୍କୁ ପ୍ରଲୋଭନ ଦେଖାଇ ବ୍ୟାଗ୍ ଫେରାଇ ଆଣିବାକୁ ଚେଷ୍ଟା କରିଥିଲେ। କିନ୍ତୁ ଶେଷରେ ସମସ୍ତ ଉଦ୍ୟମ ବୃଥା ଯାଇଥିଲା, ଯେତେବେଳେ ମାଙ୍କଡ଼ ପଲ ବ୍ୟାଗ ଧରି ସେଠାରୁ ପଳାଇଥିଲେ। ଗ୍ରାମବାସୀଙ୍କ କହିବାନୁଯାୟୀ, ମହିଳାଜଣଙ୍କ ମନରେଗାରେ କାମ କରି କିଛି ପଇସା ସଞ୍ଚୟ କରିବା ସହିତ କିଛି ସୁନା ଗହଣା ମଧ୍ୟ କିଣିଥିଲେ, ଯାହାକୁ ମାଙ୍କଡ଼ ପଲ ନେଇ ପଳାଇଛନ୍ତି।
