ଅଗରତାଲା,୧୭।୬: ତ୍ରିପୁରା ବିଧାନସଭା ନିର୍ବାଚନ ଲାଗି ଭୋଟଗ୍ରହଣ ଗୁରୁବାର ସନ୍ଧ୍ୟାରେ ଶେଷ ହୋଇଛି। ଏହି ନିର୍ବାଚନରେ ରେକର୍ଡ ୮୬.୧୦% ମତଦାନ ହୋଇଥିବା ନିର୍ବାଚନ କମିଶନ୍ଙ୍କ ପକ୍ଷରୁ ସୂଚନା ଦିଆଯାଇଛି।
୬୦ ଆସନ ବିଶିଷ୍ଟ ବିଧାନସଭା ନିର୍ବାଚନ ଲାଗି ମୋଟ ୨୫୯ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତାରେ ଅବତୀର୍ଣ୍ଣ ହୋଇଥିଲେ। ୨୮.୧୩ ଲକ୍ଷ ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରିଛନ୍ତି। ମତଦାନକୁ ଶାନ୍ତିପୂର୍ଣ୍ଣ କରାଇବା ଲାଗି ରାଜ୍ୟ ପୋଲିସ ସମେତ ୪୦୦ କମ୍ପାନୀ କେନ୍ଦ୍ରୀୟ ସୁରକ୍ଷା ବଳ ନିୟୋଜିତ ହୋଇଥିଲେ। ଅପରାହ୍ନ ୪ଟା ସୁଦ୍ଧା ମତଦାନ ହାର ୮୧.୧୧ ପ୍ରତିଶତ ଥିବାବେଳେ ଭୋଟ କେନ୍ଦ୍ର ବାହାରେ ଆଉ ପ୍ରାୟ ୫୦ ହଜାର ମତଦାତା ଧାଡ଼ିରେ ଅପେକ୍ଷା କରିଥିଲେ। ଯେଉଁମାନେ ଧାଡ଼ିରେ ଥାଇ ୪ଟା ସୁଦ୍ଧା ଟୋକନ ନେଇଥିଲେ, ସେମାନଙ୍କୁ ସନ୍ଧ୍ୟା ୬ଟା ପରେ ମଧ୍ୟ ଭୋଟ ଦେବା ଲାଗି ସୁଯୋଗ ଦିଆଯାଇଥିଲା।
୨୦୧୮ ବିଧାନସଭା ନିର୍ବାଚନ ବେଳେ ରାତି ୯.୩୦ ପର୍ଯ୍ୟନ୍ତ ମତଦାନ ହୋଇଥିଲା ଏବଂ ଭୋଟ୍ ହାର ୭୯ ପ୍ରତିଶତ ରହିଥିଲା। ଏଥର ବ୍ରୁ ଶରଣାର୍ଥୀମାନେ ପ୍ରଥମ ଥର ଭୋଟଦେବା ସୁଯୋଗ ପାଇଛନ୍ତି। ସକାଳ ୭ଟାରୁ ସମସ୍ତ ୩୩୩୭ଟି ବୁଥ୍ରେ ଭୋଟଗ୍ରହଣ ଆରମ୍ଭ ହୋଇଥିଲା। ଦୁଇଟି ସ୍ଥାନରେ ଗଣ୍ଡଗୋଳ ଘଟି ୩ ଜଣ ସିପିଆଇଏମ୍ କର୍ମୀ ଆହତ ହୋଇଛନ୍ତି। କାଁଭାଁ ଗଣ୍ଡଗୋଳକୁ ବାଦ୍ ଦେଲେ ମତଦାନ ମୋଟାମୋଟି ଶାନ୍ତିପୂର୍ଣ୍ଣ ଥିଲା।
ଭାଜପା ସର୍ବାଧିକ ୫୫ ଆସନରେ ଲଢ଼ୁଥିବାବେଳେ ଏହାର ସହଯୋଗୀ ଇଣ୍ଡିଜେନିଅସ୍ ପିପୁଲ୍ସ ଫ୍ରଣ୍ଟ ଅଫ୍ ତ୍ରିପୁରା (ଆଇପିଏଫ୍ଟି) ୬ଟି ଆସନରେ ଲଢ଼ୁଛି। ବାମସାମ୍ମୁଖ୍ୟ ୪୭ ଆସନରେ ପ୍ରାର୍ଥୀ ଦେଇଥିବାବେଳେ ଏହାର ସହଯୋଗୀ କଂଗ୍ରେସ ୧୩ଟି ଆସନରେ ଲଢ଼ୁଛି। ଆଞ୍ଚଳିକ ଦଳ ଟିପ୍ରା ମୋଥା ୪୨ ଆସନରେ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ୫୮ ଜଣ ସ୍ବାଧୀନ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଥିଲେ।
