ଅଗରତାଲା,୩।୩: ଭାଜପା ନେତା ମାଣିକ ଶାହା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ଶୁକ୍ରବାର ମାଣିକ ଶାହା ନିଜର ଇସ୍ତଫା ରାଜ୍ୟପାଳ ସତ୍ୟଦେବ ନାରାୟଣ ଆର୍ଯ୍ୟଙ୍କୁ ହସ୍ତାନ୍ତର କରିଛନ୍ତି। ରାଜଭବନରୁ ବାହାରକୁ ଆସିବା ବେଳେ ମାଣିକ ଶାହା ଗଣମାଧ୍ୟମକୁ ନିଜର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ରାଜ୍ୟପାଳଙ୍କ ନିକଟକୁ ଆସି ସେ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ନୂତନ ସରକାର ଗଠନ ନ ହେବା ପର୍ଯ୍ୟନ୍ତ ସେ କାର୍ଯ୍ୟ ଜାରି ରଖିବାକୁ ରାଜ୍ୟପାଳ କହିଛନ୍ତି। ଏତଦ୍ ବ୍ୟତୀତ ସେ କହିଛନ୍ତି, ମାର୍ଚ୍ଚ ୮ରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇପାରେ। ସୂଚନାଯୋଗ୍ୟ, ଗୁରୁବାର ତ୍ରିପୁରା ବିଧାନସଭା ନିର୍ବାଚନର ଫଳାଫଳ ଆସିଛି। ରାଜ୍ୟରେ ଭାଜପା କ୍ରମାଗତ ଦ୍ୱିତୀୟ ଥର ପାଇଁ ୩୨ଟି ଆସନ ଜିତି ବାମପନ୍ଥୀ କଂଗ୍ରେସକୁ ଚକିତ କରିଛି। ଭାଜପାର ସହଯୋଗୀ ଆଇପିଏଫ୍ଟି ୫ଟି ଆସନରେ ପ୍ରତିଦ୍ୱନ୍ଦ୍ୱିତା କରି ଗୋଟିଏ ଆସନ ଜିତିଛି। ଏଭଳି ପରିସ୍ଥିତିରେ ଏବେ ରାଜ୍ୟରେ ଭାଜପା ମିଳିତ ମେଣ୍ଟ ସଂଖ୍ୟା ୩୩କୁ ବୃଦ୍ଧି ପାଇଛି। ତେବେ ଗତଥର ଅର୍ଥାତ୍ ୨୦୧୮ ନିର୍ବାଚନରେ ତୁଳନାରେ ଭାଜପା ୪ଟି ଆସନ କମ୍ ପାଇଛି।
