ଭବାନୀପାଟଣା,୧୧ା୯(ଉତ୍ତମ କୁମାର ଦାଶ):କଳାହାଣ୍ଡି ଜିଲା ଜୟପାଟଣା ବ୍ଲକ ଅନ୍ତର୍ଗତ ବଡ଼କର୍ଲାକୋଟ ପଞ୍ଚାୟତ ନୂଆପଡାର ଜଣେ ଗରିବ ଆଦିବାସୀ ଝିଅ ବିଦୁ ନାଏକ(୨୧) ସର୍ବ ଭାରତୀୟସ୍ତରର ଯୋଗ୍ୟତା ପ୍ରବେଶିକା ପରୀକ୍ଷା (ନିଟ)ରେ ଉତ୍ତୀର୍ଣ୍ଣ ହୋଇ ଅଞ୍ଚଳ ପାଇଁ ଉଦାହରଣ ସୃଷ୍ଟି କରିଛନ୍ତି। ଗତ ଜୁନ ୧୪ରେ ସେ ନିଟ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ ବର୍ତ୍ତମାନ ବ୍ରହ୍ମପୁର ମେଡ଼ିକାଲ କଲେଜରେ ନାମ ଲେଖାଇ ଡାକ୍ତର ପାଠ ପଢୁଛନ୍ତି।
ଜିଲାର ଉପାନ୍ତ ଅଞ୍ଚଳ ନୂଆପଡ଼ା ଗାଁରେ ବିଦୁ ନାଏକ ବାପା ନରେନ୍ଦ୍ର, ମା’ ପ୍ରେମଶିଳା ଓ ଛୋଟ ଭଉଣୀଙ୍କ ସହ ରହନ୍ତି। ବିଦୁଙ୍କ ମା’ବାପା ଘର କାମ ସହ ମୂଲମଜୁରି କରି ଯାହା ଉପାର୍ଜନ କରନ୍ତି ସେଥିରେ କଷ୍ଟେମଷ୍ଟେ ପରିବାର ଚଳିଯାଏ। ଗାଁ ସ୍କୁଲରେ ବିଦୁ ପ୍ରଥମରୁ ପଞ୍ଚମ ଓ ପରଦୁଲୁକିବନ୍ଧ ଆଦିବାସୀ ସ୍କୁଲରେ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ପଢି ୨୦୨୦ରେ ୪୩୧ ମାର୍କ ରଖି ପାସ୍ କରିଥିଲେ। କିନ୍ତୁ ୨୦୨୦ରୁ ୨୦୨୧ ପର୍ଯ୍ୟନ୍ତ ତାଙ୍କର ପାଠପଢା ବନ୍ଦ ହୋଇଗଲା। ଘରେ ଦୁଇଓଲି ଦୁଇମୁଠା ଖାଇବା ପାଇଁ ଅସୁବିଧା ହୋଇଥିଲା। ଘରର ଆର୍ଥିକ ସ୍ଥିତିକୁ ଦେଖି ବିଦୁ ଧାନ ବିଲରେ ମୂଲମଜୁରି କରି କିଛି ଟଙ୍କା ଘର ଚଳିବା ପାଇଁ ଦେଇ ଆଉ କିଛି ପାଠ ପଢା ପାଇଁ ସଞ୍ଚୟ କରି ରଖିଥିଲେ। ବିଦୁଙ୍କ ଭଲ ପାଠ ପଢା ଦେଖି ତାଙ୍କୁ ସର୍ବଦା ସହଯୋଗ କରି ଆସିଥିବା ତାଙ୍କ ବଡ଼ ମା’ଙ୍କ ପୁଅ ଲାବଣ୍ୟ ପୂଜାରୀ ୨୦୨୨ରେ ବିଦୁଙ୍କ ଉଚ୍ଚ ଶିକ୍ଷା ପାଇଁ ସହଯୋଗ କରିଥିଲେ। ବିଦୁଙ୍କୁ ଲାଞ୍ଜିଗଡ଼ ଆଦିବାସୀ ହାୟର ସେକେଣ୍ଡାରୀ ସ୍କୁଲରେ ନାମ ଲେଖାଇଥିଲେ। ସେଠାରେ ବିଦୁ ୪୫୪ ମାର୍କ ବା ୭୫ ପ୍ରତିଶତ ରଖି ୨୦୨୪ରେ ପାସ୍ କରିଥିଲେ। ପରେ ସେ ଭୁବନେଶ୍ୱରରେ କୋଚିଂ ନେଇ ସେଠାରେ ନିଟ୍ ପରୀକ୍ଷା ଦେଇ ଗତ ଜୁନ ୨୦୨୫ରେ ପ୍ରଥମଥର ହିଁ ଉତ୍ତୀର୍ଣ୍ଣ ହୋଇଥିଲେ। ଅଞ୍ଚଳରେ ଥିବା ଅନ୍ଧବିଶ୍ୱାସ ଦୂର କରିବା ସହ ଜଣେ ଭଲ ଡାକ୍ତର ହୋଇ ଲୋକଙ୍କୁ ମାଗଣାରେ ସ୍ବାସ୍ଥ୍ୟସେବା ଯୋଗାଇଦେବାକୁ ଆଶା ରଖିଥିବା ବିଦୁ କହିଛନ୍ତି। ତାଙ୍କ ଏପରି ସଫଳତା ସ୍ଥାନୀୟ ଆଦିବାସୀ ଛାତ୍ରୀଛାତ୍ରଙ୍କ ମନର ଏକ ନୂତନ ଆଶା ସଞ୍ଚାର କରିଛି।
