ନୂଆଦିଲ୍ଲୀ,୧୩ା୨(ପି.ଟି.): କୋଟିଆ ସୀମା ବିବାଦକୁ ନେଇ ଓଡ଼ିଶା ପକ୍ଷରୁ ଦାଏର ଅଦାଲତ ଅବମାନନା ଆବେଦନ ଉପରେ ସୁପ୍ରିମକୋର୍ଟ ଶୁକ୍ରବାର ଆନ୍ଧ୍ର ପ୍ରଦେଶକୁ ଜବାବ ତଲବ କରିଛନ୍ତି। ତେବେ ଶନିବାର ଆନ୍ଧ୍ର ପକ୍ଷରୁ ହେବାକୁ ଥିବା ପଞ୍ଚାୟତ ନିର୍ବାଚନ ଉପରେ ସର୍ବୋଚ୍ଚ ଅଦାଲତ ସ୍ଥଗିତାଦେଶ ଜାରି କରିନାହାନ୍ତି। ଆନ୍ଧ୍ରର ଜବାବ ମିଳିବା ପରେ ଆସନ୍ତା ୧୯ରେ ଏହି ପ୍ରସଙ୍ଗରେ ବିଚାର କରାଯିବ ବୋଲି ଦୁଇଜଣିଆ ଖଣ୍ଡପୀଠ ସ୍ପଷ୍ଟ କରିଛନ୍ତି।
ଓଡ଼ିଶା ଓ ଆନ୍ଧ୍ର ପ୍ରଦେଶ ମଧ୍ୟରେ ଅର୍ଦ୍ଧଶତାବ୍ଦୀରୁ ଊର୍ଦ୍ଧ୍ୱ ସମୟ ଧରି ଚାଲିଥିବା ଆନ୍ତଃ ରାଜ୍ୟ ସୀମା ବିବାଦ ସୁପ୍ରିମକୋର୍ଟରେ ପହଞ୍ଚିଛି। କୋରାପୁଟ ସୀମାନ୍ତ ୨୮ ଗ୍ରାମକୁ ଆନ୍ଧ୍ର ମାଡ଼ିବସିଛି। କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ୍ ଅଧୀନ କୋଟିଆ ପଞ୍ଚାୟତରେ ଥିବା ତଳଗଞ୍ଜେଇପଦର, ଫଗୁଣସେନେରି ଓ ଫାଟୁସିନେରି ଗ୍ରାମକୁ ଆନ୍ଧ୍ର ନିଜ ସାଲୁର ବ୍ଲକ୍ର ଦର୍ଶାଇ ସେଠାରେ ପଞ୍ଚାୟତ ନିର୍ବାଚନ କରାଉଛି। ପୂର୍ବରୁ ତଳଗଞ୍ଜେଇପଦର ଓ ଫଗୁଣସେନେରିରେ ନିଦ୍ଦର୍ବନ୍ଦ୍ୱରେ ୨ ଜଣ ପ୍ରାର୍ଥୀ ନିର୍ବାଚିତ ହୋଇଥିବାବେଳେ ଫେବୃୟାରୀ ୧୩ ତାରିଖରେ ଫାଟୁସେନେରି ଗ୍ରାମରେ ଭୋଟଗ୍ରହଣ ହେବ। ଏହାକୁ ଚ୍ୟାଲେଞ୍ଜ କରି ଓଡ଼ିଶା ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ୫୦ ବର୍ଷ ପୂର୍ବେ ଦୁଇ ରାଜ୍ୟ ମଧ୍ୟରେ ହୋଇଥିବା ଚୁକ୍ତିନାମାକୁ ଆନ୍ଧ୍ର ସରକାର ଉଲ୍ଲଂଘନ କରିଥିବା ଓଡ଼ିଶା ପକ୍ଷରୁ ପିଟିଶନରେ ଦର୍ଶାଯାଇଛି। କୋଟିଆ ସୀମା ବିବାଦ ବିଚାରାଧୀନ ଥିବାରୁ ବିବାଦୀୟ ଅଞ୍ଚଳରେ ସ୍ଥିତାବସ୍ଥା ବଜାୟ ରଖିବାକୁ ୧୯୬୮ ଡିସେମ୍ବର ୨ରେ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ। କିନ୍ତୁ ଆନ୍ଧ୍ର ସରକାର ପଞ୍ଚାୟତ ନିର୍ବାଚନ କରାଇବା ପାଇଁ ଏକତରଫା ନିଷ୍ପତ୍ତି ନେଇ ଉକ୍ତ ନିର୍ଦ୍ଦେଶନାମାର ଉଲ୍ଲଂଘନ କରିଥିବା ଓଡ଼ିଶା ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ବିକାଶ ସିଂ ଓ ଶିବୁ ଶଙ୍କର ମିଶ୍ର ଗୁରୁବାର ଅଦାଲତ ଅବମାନନା ପିଟିଶନରେ ଦର୍ଶାଇଥିଲେ। ଉକ୍ତ ଆବେଦନର ଜରୁରୀ ଶୁଣାଣି ପାଇଁ ଉଭୟେ ଅନୁରୋଧ କରିଥିଲେ। ଓଡ଼ିଶାର ଆବେଦନ ଉପରେ ଶୁକ୍ରବାର ଜଷ୍ଟିସ୍ ଏ.ଏମ୍. ଖାନ୍ଓ୍ବିଲକର ଓ ଅନିରୁଦ୍ଧ ବୋଷଙ୍କ ଖଣ୍ଡପୀଠରେ ଶୁଣାଣି ହୋଇଛି। ସଂକ୍ଷିପ୍ତ ଶୁଣାଣି ବେଳେ ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରୁଥିବା ବିକାଶ ସିଂ କହିଥିଲେ, ୨୦୦୬ ମାର୍ଚ୍ଚ ୩୦ ରାୟ ଅନୁସାରେ ସମ୍ପୃକ୍ତ ଅଞ୍ଚଳରେ ଦୁଇରାଜ୍ୟ ସ୍ଥିତାବସ୍ଥା ବଜାୟ ରଖିବା ଉଚିତ। କିନ୍ତୁ ଓଡ଼ିଶା ନିୟନ୍ତ୍ରଣରେ ଥିବା ଅଞ୍ଚଳରେ ଆନ୍ଧ୍ର ସରକାର ଶନିବାର ପଞ୍ଚାୟତ ନିର୍ବାଚନ କରାଉଛନ୍ତି, ଯାହାକି ଅଦାଲତ ଅବମାନନା ବୋଲି ସେ ଯୁକ୍ତି ବାଢ଼ିଥିଲେ। ଅନ୍ୟପକ୍ଷେ ଆନ୍ଧ୍ରର ଓକିଲ ମହଫୁଜ୍ ଏ. ନାଜ୍କି ପିଟିଶନର ନକଲ ପାଇ ନ ଥିବା କହିଥିଲେ। ସମ୍ପୃକ୍ତ ଅଞ୍ଚଳରେ ଦୀର୍ଘ ବର୍ଷ ଧରି ନିର୍ବାଚନ କରାଯାଉଥିବା ସେ ଅଦାଲତଙ୍କୁ ଅବଗତ କରାଇଥିଲେ। ଖଣ୍ଡପୀଠ କହିଥିଲେ, ବର୍ତ୍ତମାନ କୌଣସି ନିର୍ଦ୍ଦେଶ ଦିଆଯିବ ନାହିଁ। ଆନ୍ଧ୍ର ପକ୍ଷରୁ ମାମଲା ଲଢ଼ୁଥିବା ଓକିଲଙ୍କୁ ଓଡ଼ିଶା ପିଟିଶନର ଅଗ୍ରିମ କପି ଦିଆଯାଉ। ଆନ୍ଧ୍ରର ଜବାବ ଆସିବା ପରେ ଆସନ୍ତା ଶୁକ୍ରବାର ତାକୁ ଅନୁଧ୍ୟାନ କରି ଶୁଣାଣି କରାଯିବ। ସେହିପରି ବୁଧବାର ଭାରତୀୟ ବିକାଶ ପରିଷଦ ନାମକ ଏକ ସାମାଜିକ ସଙ୍ଗଠନ ମଧ୍ୟ ନିର୍ବାଚନ ବନ୍ଦ କରିବା ଲାଗି ଓଡ଼ିଶା ହାଇକୋର୍ଟରେ ଜନସ୍ବାର୍ଥ ମାମଲା (ପିଆଇଏଲ୍) ଦାଏର କରିଛି।
