କଟକ ଅଫିସ/ଖୁଣ୍ଟୁଣୀ, ୨୦ା୫(ଡି.ଏନ୍.ଏ.): କଟକ ସହରରେ ଶୁକ୍ରବାର ସନ୍ଧ୍ୟାରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି। ଖୁବ୍ ଜୋରରେ ପବନ ବହିବା ସାଙ୍ଗକୁ ଘଡ଼ଘଡ଼ି ସହ ବର୍ଷା ହୋଇଥିଲା। ଅନେକ ସ୍ଥାନରେ ଗଛ ଭାଙ୍ଗି ପଡିବାରୁ ବିଦ୍ୟୁତ୍ ସରବରାହ ବାଧାପ୍ରାପ୍ତ ହୋଇଥିଲା। ଶୁକ୍ରବାର ମଧ୍ୟାହ୍ନରେ ଅସହ୍ୟ ଗରମ ଓ ଗୁଳୁଗୁଳି ହୋଇଥିଲା। ହେଲେ ସନ୍ଧ୍ୟାରେ ହଠାତ୍ ପବନ ବହିବା ସାଙ୍ଗକୁ ବର୍ଷା ହୋଇଥିଲା। ଲୋକମାନେ ତାତିରୁ ସାମାନ୍ୟ ଆଶ୍ୱସ୍ଥି ପାଇଥିଲେ। ହେଲେ ଝଡତୋଫାନରେ ତୁଳସୀପୁର, ବିଡାନାସୀ, କୃଷକ ବଜାର, ନୂଆପଡ଼ା ଅଞ୍ଚଳ ସମେତ ସତୀଚୌରା ରିଂବନ୍ଧ ରାସ୍ତା ପାର୍ଶ୍ୱରେ ଥିବା ଗଛଗୁଡିକ ଭାଙ୍ଗି ପଡିଥିଲା। ଫଳରେ ଯାତାୟତରେ ସମସ୍ୟା ହୋଇଥିଲା। ହାଇକୋର୍ଟ ବାର୍ ଆସୋସିଏଶନ ସମ୍ମୁଖରେ ବନ୍ଧା ଯାଇଥିବା ବାଉଁଶଗୁଡିକ ଉପୁଡି ପଡିଥିଲା। କଚେରି ରୋଡ୍ରେ ଏକ ଗଛଡାଳ ପଡି ହୋଡିଂ ଭାଙ୍ଗି ଯାଇଥିଲା। ଏପରି କି ବାଲିସାହି ବସ୍ତି ଅଞ୍ଚଳରେ ଘର ଭାଙ୍ଗିଯିବା ସହ ଆଜବେଷ୍ଟସ ଉଡି ଯାଇଥିବା ଦେଖିବାକୁ ମିଳିଥିଲା। ପବନର ବେଗ କମିବା ପରେ ଅଗ୍ନିଶମ କର୍ମଚାରୀମାନେ ରାସ୍ତାରୁ ଗଛଗୁଡିକ ହଟାଇଥିଲେ।
ସେହିପରି ଖୁଣ୍ଟୁଣୀ ଅଞ୍ଚଳରେ କାଳବୈଶାଖୀ ପ୍ରଭାବରେ ଝଡ଼ବର୍ଷା ହୋଇଥିଲା। ପ୍ରବଳ ବେଗରେ ପବନ ବହିବାରୁ ବିଭିନ୍ନ ସ୍ଥାନରେ ଗଛ ଓ ବିଦ୍ୟୁତ୍ ଖୁଣ୍ଟ ଉପୁଡି ପଡିଥିଲା। ଫଳରେ ଖୁଣ୍ଟୁଣୀ, ନଦୀକୂଳ, ଗୁରୁଡିଝାଟିଆ ଅଞ୍ଚଳ ଅନ୍ଧାରରେ ରହିଛି। ସମସ୍ତ ଯୋଗାଯୋଗ ଠପ ହୋଇଯିବାରୁ ନେଟ୍ ସେବା ବନ୍ଦ ରହିଛି। ରାତି ୧୦ଟା ପରେ ପୁନର୍ବାର ବର୍ଷା ହୋଇଥିବାରୁ ବିଳମ୍ବିତ ରାତି ପର୍ଯ୍ୟନ୍ତ ବିଦ୍ୟୁତ୍ ସେବା ସ୍ବାଭାବିକ ହେବା ସମ୍ଭବ ନୁହେଁ ବୋଲି ବିଭାଗ ପକ୍ଷରୁ ସୂଚନା ମିଳିଛି। ଝଡତୋଫାନ୍ ଯୋଗୁ ଖୁଣ୍ଟୁଣୀ ଥାନା ନିକଟରେ କେତେକ ଦୋକାନର ଆଜବେଷ୍ଟସ ଉଡିଯାଇଥିଲା। କଣ୍ଡରେଇ ପଞ୍ଚାୟତ ଅନ୍ତର୍ଗତ ଡାଳୁଆ ପ୍ରାଥମିକ ବିଦ୍ୟାଳୟ ପରିସରରେ ଥିବା ଏକ ଗଛ ଉପୁଡିଯିବାରୁ ପାଚେରି ଭାଙ୍ଗିଯାଇଥିଲା। ଏଥିସହ ବିଦ୍ୟୁତ୍ ତାର ଛିଣ୍ଡି ପଡିଥିଲା। ସେହିପରି ବଡ଼ ଗଛ ଭାଙ୍ଗି ପଡିବାରୁ ଖୁଣ୍ଟୁଣୀ-କଣ୍ଡରେଇ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି। କପୁରସିଂରୁ କଖଡ଼ିକୁ ସଂଯୋଗ କରୁଥିବା ରାସ୍ତାର ବିଭିନ୍ନ ସ୍ଥାନରେ ଗଛ ଉପୁଡି ପଡିବାରୁ ଯାନବାହନ ଚଳାଚଳ ଠପ ହୋଇଯାଇଛି। ନୂଆପାଟଣା-ଆଠଗଡ଼ ରାସ୍ତାର ପ୍ରସନ୍ନାପୁରଠାରେ ଏକ ଆମ୍ବଗଛ ଭାଙ୍ଗି ପଡିବାରୁ ପ୍ରାୟ ୧ ଘଣ୍ଟା ପାଇଁ ଯାତାୟାତରେ ସମସ୍ୟା ହୋଇଥିଲା। ଅନେକ ସ୍ଥାନରେ ଚାଳ ଛପର ଉଡିଯାଇଥିବା ଦେଖିବାକୁ ମିଳିଥିଲା।
