ମାଲକାନଗିରି,୧୯।୪(ଡି.ଏନ.ଏ.): ମାଲକାନଗିରି ଜିଲାର ଆଦିମ ଜନଜାତି ବଣ୍ଡା ସଂପ୍ରଦାୟର ଲୋକେ ରହୁଥିବା ବଣ୍ଡା ଘାଟିର ବିକାଶ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ରାଜ୍ୟ ସରକାର। ବିକାଶ ମଧ୍ୟ ହୋଇଛି, ମାତ୍ର ସ୍ଥାନୀୟ ପ୍ରଶାସନ ପକ୍ଷରୁ ସେମାନଙ୍କ ଯାତାୟାତ ଲାଗି ଉଚିତ୍ ବ୍ୟବସ୍ଥା କରାଯାଇ ନ ଥିବାରୁ ଏଠାକାର ଲୋକେ ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି। ବଣ୍ଡା ଘାଟିରେ ପୂର୍ତ୍ତ ବିଭାଗ ପକ୍ଷରୁ ଭଲ ରାସ୍ତା ନିର୍ମାଣ କରାଯାଇଥିଲେ ସୁଦ୍ଧା ଲୋକଙ୍କ ଯାତାୟାତ ପାଇଁ ବସ୍ ନ ଥିବାରୁ ଲୋକେ କମାଣ୍ଡର, ଜିପ ଭଳି ଗାଡିମୋଟରରେ ଯାତ୍ରା କରୁଛନ୍ତି। ଏହି ଗାଡିଗୁଡିକର ଚାଳକମାନେ ଅଧିକ ଅର୍ଥ ଲୋଭରେ ବିପଦସଙ୍କୁଳ ଭାବେ କ୍ଷମତାରୁ ଅଧିକ ଯାତ୍ରୀଙ୍କୁ ଗାଡିରେ ବସାଇ ନେବା ଆଣିବା କରୁଛନ୍ତି। ଏପରି ଯାତ୍ରା ସମୟରେ ଅନେକ ଥର ଦୁର୍ଘଟଣା ଘଟି ଲୋକଙ୍କ ଧନଜୀବନ ହାନି ହେଉଥିଲେ ମଧ୍ୟ ଏହାକୁ ସୁଧାରିବା ଦିଗରେ ପ୍ରଶାସନ କୌଣସି ପଦକ୍ଷେପ ନେଉନାହିଁ । ଅନ୍ୟପକ୍ଷରେ କୌଣସି ବିକଳ୍ପ ନ ଥିବାରୁ ଲୋକେ ବାଧ୍ୟ ହୋଇ ନିଜ ଜୀବନକୁ ବାଜି ଲଗାଇ ଯିବା ଆସିବା କରୁଛନ୍ତି। ବଣ୍ଡା ଘାଟିରେ ଦୁଇଟି ପଞ୍ଚାୟତର ୩୨ଟି ଗ୍ରାମରେ ପ୍ରାୟ ୧୫ହଜାରୁ ଊର୍ଦ୍ଧ୍ୱ ଲୋକ ବସବାସ କରନ୍ତି। ସେମାନେ ପ୍ରତ୍ୟେହ ହାଟ, ବଜାର, ବ୍ଲକ କାର୍ଯ୍ୟାଳୟ, ତହସିଲ କାର୍ଯ୍ୟାଳୟ, ସ୍କୁଲ କଲେଜ, ସ୍ବାସ୍ଥ୍ୟ କେନ୍ଦ୍ର, ବ୍ୟାଙ୍କ ଯାତାୟାତ ପାଇଁ କମାଣ୍ଡର, ଟ୍ରାକ୍ଟର, ଜିପ ଉପରେ ନିର୍ଭର କରନ୍ତି। ଏଥିରେ ବିପଦସଙ୍କୁଳ ଭାବେ ଖଇରପୁଟ ଆସନ୍ତି । ଖଇରପୁଟରୁ ମୁଦୁଲିପଡା ୧୪ କିଲୋମିଟର ଦୂର ହୋଇଥିବା ବେଳେ ସେମାନଙ୍କୁ ଭଡା ବାବଦରେ ୫୦ରୁ ୧୦୦ ଟଙ୍କା ଯାଏ ଦେବାକୁ ପଡେ। ଗତ ୧୦ବର୍ଷ ତଳେ ଏକ ବସ୍ ବଣ୍ଡା ଘାଟିକୁ ଯାଉଥିଲା। ସେତେବେଳ ଅତି ସହଜରେ ଦୁଇଟି ପଞ୍ଚାୟତର ଲୋକେ ବସ୍ ସେବା ପାଉଥିଲେ। ମାତ୍ର କିଛିମାସ ଏହି ବସ ଚାଲିବା ପରେ ତାହା ବନ୍ଦ ହୋଇଗଲା। ସେବେଠାରୁ ବଣ୍ଡାଘାଟିକୁ ଆଉ ବସ୍ ଚାଲୁନାହିଁ। ଏହାର ସୁଯୋଗ ନେଇ ଘରୋଇ ଜିପ୍, ଟ୍ରାକ୍ଟର ଓ କମାଣ୍ଡରଗୁଡିକ ଲୋକଙ୍କୁ ଷୋଶଣ କରୁଥିବା ଅଭିଯୋଗ ହେଉଛି। ଏଥିପ୍ରତି ଜିଲା ପରିବହନ ବିଭାଗ ଦୃଷ୍ଟି ଦେଇ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।
