ବ୍ରହ୍ମପୁର,୭।୨ (ସ୍ମୃତି ରଞ୍ଜନ ମହାଲିକ): ସହରକୁ ସ୍ବଚ୍ଛ ଓ ସୁନ୍ଦର କରିବା ସମସ୍ତଙ୍କ କର୍ତ୍ତବ୍ୟ। ‘ଆମ ସହର, ଆମ ଗର୍ବ’ ଏଭଳି ବାର୍ତ୍ତା ନେଇ ବ୍ରହ୍ମପୁର ମହାନଗର ପକ୍ଷରୁ ସହରର ପ୍ରତି ୱାର୍ଡର କାନ୍ଥରେ ସୂଚନା ରହିଛି। ଉକ୍ତ ୱାର୍ଡର ସ୍ବଚ୍ଛସାଥୀ, ସ୍ବଚ୍ଛ ସୁପରଭାଇଜର, ୱାର୍ଡ ଅଫିସର ଓ ସାନିଟାରୀ ଇନିସପେକ୍ଟରଙ୍କ ନାମ ଓ ଫୋନ ନମ୍ବର ମଧ୍ୟ କାନ୍ଥରେ ଦିଆଯାଇଛି। ତେବେ ସହରର ସ୍ବଚ୍ଛତା କେବଳ କାନ୍ଥ ସୂଚନାରେ ସୀମିତ ରହିଥିବା ପରିଲକ୍ଷିତ ହେଉଛି। ସୂଚନାଥାଉ କି, ବର୍ତ୍ତମାନ ବିଇଏମସି ପକ୍ଷରୁ ସହରର ପରିମଳ ବ୍ୟବସ୍ଥାରେ ସୁଧାର ଆଣିବା ପାଇଁ ନୂତନ ଏଜେନ୍ସିକୁ ଦାୟିତ୍ୱ ଦିଆଯାଇଛି। ଏଥିମଧ୍ୟରେ ପ୍ରତ୍ୟୁଷ, ସଫେଇ ଅଭିଯାନ ଓ ପିଏମ୍ଆର ଭଳି ଏଜେନ୍ସି ରହିଛି। ଏହି ଏଜେନ୍ସିଗୁଡିକୁ ୫ଟି ଜୋନ ଜରିଆରେ ରହିଥିବା ୱାର୍ଡ ଗୁଡିକୁ ସହରର ପରିମଳ ଦାୟିତ୍ୱ ହସ୍ତାନ୍ତର କରାଯାଇଛି। ଏଥିସହ ବିଇଏମସି ପକ୍ଷରୁ ଆବର୍ଜନା ସଂଗ୍ରହ ଗାଡି ୫୩ ଓ ସଫେଇ କର୍ମଚାରୀଙ୍କ ସଂଖ୍ୟା ୧୩୩୪କୁ ବୃଦ୍ଧି କରାଯାଇଛି। ଗତ ମାସ ୨୬ ତାରିଖ ନୂତନ ଗାଡି ଉଦଘାଟନ ସହ ନୂଆ ଏଜେନ୍ସିକୁ ଦାୟିତ୍ୱ ଦିଆଯାଇଛି। ପରିମଳ ବାବଦକୁ ବର୍ଷକୁ ୨୯.୪୨ କୋଟି ଟଙ୍କା ଖର୍ଚ୍ଚ କରିବ ବୋଲି ନିଗମ ସୂଚନା ଦେଇଛି। ତେବେ କାର୍ଯ୍ୟ ଆରମ୍ଭରୁ ହିଁ ଏହା ବେଲଗାମ ହେଉଥିବା ଅଭିଯୋଗ ହୋଇଛି। ନିଗମର ୨୫ ନଂ ୱାର୍ଡ ଅନ୍ତର୍ଗତ ଅମ୍ବିକା ନଗର ପ୍ରଥମ ଲେନ୍ ହିଁ ଏହାର ଉଦାହରଣ ପାଲଟିଛି। ଏହି ଲେନ୍କୁ ଦୀର୍ଘ ଦିନ ଧରି ସଫେଇ କର୍ମଚାରୀମାନେ ଆସୁନାହାନ୍ତି। ଆବର୍ଜନା ବି ସଫେଇ ହେଉନାହିଁ। ଡ୍ରେନଗୁଡିକ ଆବର୍ଜନାରେ ଭର୍ତ୍ତି ହୋଇ ରହିବାରୁ ନର୍ଦ୍ଦମା ଜଳ ନିଷ୍କାସନ ହୋଇନପାରି ମଶାଙ୍କ ପ୍ରଦୁର୍ଭାବ ବଢ଼ିଛି। ଦୁର୍ଗନ୍ଧରେ ଅଞ୍ଚଳ ଦୂଷିତ ହୋଇପଡିଛି। ସ୍ଥାନୀୟ ବାସିନ୍ଦାଙ୍କ ପକ୍ଷରୁ ଉକ୍ତ ୱାର୍ଡର ସାନିଟେସନ ଇନିସପେକ୍ଟରଙ୍କୁ ବାରମ୍ବାର ଅବଗତ କରାଗଲେ ବି କୌଣସି ପଦକ୍ଷେପ ନିଆଯାଉନାହିଁ। ନିଗମ ପକ୍ଷରୁ ଜାରି କରାଯାଇଥିବା ଟୋଲି ଫ୍ର ନଂ.୧୮୦୦୩୪୫୬୭୯ ବୈଧ ନ ଥିବା ବେଳେ ୧୪୪୨୦ ନଂ.ରେ ଫୋନ କଲେ କୌଣସି ଉତ୍ତର ମିଳୁନି। ସେହିପରି ଦାୟିତ୍ୱରେ କର୍ମଚାରୀଙ୍କୁ ଫୋନ କଲେ ବି କୌଣସି ଉତ୍ତର ମିଳୁନି। ଏପରିକି ଉକ୍ତ ୱାର୍ଡକୁ ଆସୁଥିବା ସଫେଇ କର୍ମଚାରୀଙ୍କୁ ଆବର୍ଜନା ଉଠାଇବା ପାଇଁ କହିଲେ ବି ସେମାନେ ଆବର୍ଜନା ଉଠାଉ ନ ଥିବା ଅଭିଯୋଗ କରି ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିଛନ୍ତି। ଯଦି ଏଭଳି ଅବ୍ୟବସ୍ଥା ଲାଗିରହେ ତେବେ ସହରର ପରିମଳ ବ୍ୟବସ୍ଥା ସଂପୂର୍ଣ୍ଣ ଭୁଶୁଡିଯିବାର ଆଶଙ୍କା ସୃଷ୍ଟି ହୋଇଛି। ଏ ନେଇ ବିଇଏମସି ଡେପୁଟି କମିଶନର ଆଶୀର୍ବାଦ ପରିଡାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଆବର୍ଜନା ସଫେଇ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରାଯିବ।
