ସମ୍ବଲପୁର, ୨୫।୯ (ପ୍ରମୋଦ ବହିଦାର): ସମ୍ବଲପୁର ଜିଲା ଯୁଯୋମୁରା ଥାନା ଅନ୍ତର୍ଗତ କଂସର ଗ୍ରାମ ନିକଟ ଜିଓ ପେଟ୍ରୋଲ ପମ୍ପ ସମ୍ମୁଖ ଜାତୀୟ ରାଜପଥ ନଂ. ୫୫ ଉପରେ ଶୁକ୍ରବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଦ୍ରୁତଗାମୀ ଟ୍ରକ୍ ଏକ ଟ୍ରାକ୍ଟରକୁ ପଛପଟୁ ଧକ୍କା ଦେବାରୁ ଜଣେ ମହିଳା ଶ୍ରମିକଙ୍କ ମୃତ୍ୟୁ ଘଟିଥିବାବେଳେ ୭ ଜଣ ଗୁରୁତର ଆହତ ହୋଇଛନ୍ତି। ମୃତ ମହିଳା ଶ୍ରମିକ ହେଲେ ଭୀମଖୋଜ ମୁଣ୍ଡାପଡ଼ାର ପାର୍ବତୀ ମୁଣ୍ଡା (୪୫)।
ମିଳିଥିବା ସୂଚନା ଅନୁଯାୟୀ, ଏକ ଟ୍ରାକ୍ଟର ବୃକ୍ଷଚାରା ନେଇ ରେଢ଼ାଖୋଲରୁ ଭୀମଖୋଜ ଅଭିମୁଖେ ଯାଉଥିଲା। ଉକ୍ତ ଟ୍ରାକ୍ଟରରେ ଚାଳକଙ୍କ ସମେତ ମୋଟ ୮ ଜଣ ଶ୍ରମିକ ଥିଲେ। କଂସର ଜିଓ ପେଟ୍ରୋଲ ପମ୍ପ ନିକଟରେ ଏକ ଦ୍ରୁତଗାମୀ ଟ୍ରକ୍ (ଡବ୍ଲ୍ୟୁବି-୨୯-ଏଚ୍-୬୨୮୩) ଟ୍ରାକ୍ଟରଟିକୁ ପଛପଟୁ ଜୋରଦାର ଧକ୍କା ଦେଇଥିଲା।
ଫଳରେ ଘଟଣାସ୍ଥଳରେ ହିଁ ମହିଳା ଶ୍ରମିକ ପାର୍ବତୀଙ୍କ ମୃତ୍ୟୁ ଘଟିଥିଲା। ଦୁର୍ଘଟଣା ପରେ ଟ୍ରାକ୍ଟରଟି ରାସ୍ତାକଡ଼କୁ ଖସି ଓଲଟି ପଡ଼ିଥିବାବେଳେ ଟ୍ରକ୍ଟି ରାଜପଥର ଡିଭାଇଡର ଉପରକୁ ଚଢ଼ି ଅଟକି ଯାଇଥିଲା। ଅନ୍ୟ ୭ ଜଣ ଆହତ ଶ୍ରମିକଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି।
ଦୁର୍ଘଟଣା ଘଟାଇବା ପରେ ଟ୍ରକ୍ ଚାଳକ ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ଯୁଯୋମୁରା ଥାନା ଅଧିକାରୀ ଅନିମା ଏକ୍କା, ବିଡିଓ ରାଜେଶ ଏକ୍କା ଏବଂ ତହସିଲଦାର ପ୍ରଭାସ ବୁଡ଼ାୟକ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ପୋଲିସ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଦୁର୍ଘଟଣାଗ୍ରସ୍ତ ଟ୍ରକ୍ ଓ ଟ୍ରାକ୍ଟରକୁ ଜବତ କରିଛି।
ଏନେଇ ଯୁଯୋମୁରା ଥାନାରେ କେସ୍ ନଂ. ୧୭୬/୨୦୨୬ରେ ଏକ ମାମଲା ରୁଜୁ ହୋଇଛି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି।