କୁଲ୍ଲୁ,୨୬ ।୯: ହିମାଚଳର କୁଲ୍ଲୁରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ପର୍ଯ୍ୟଟକଙ୍କୁ ନେଇ ଯାଉଥିବା ଏକ ବସ ଖାଇ ମଧ୍ୟକୁ ଖସି ପଡିବାରୁ ଏହି ଦୁର୍ଘଟଣା ହୋଇଛି । ଏଥିରେ ୭ ଜଣ ଛାତ୍ରଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଅନ୍ୟପଟେ ୧୦ ଜଣ ଛାତ୍ର ଗୁରୁତର ଥିବାରୁ ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଅନୁମାନ କରାଯାଉଛି । ଆହତଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି । ଏ ସମସ୍ତ ଛାତ୍ର ବନାରସର ଆଇଆଇଟି(ବନାରସ ହିନ୍ଦୁ ୟୁନିଭର୍ସିିଟି)ର ବୋଲି ଜଣାପଡିଛି ।
ଏହି ଦୁର୍ଘଟଣା କୁଲ୍ଲୁରେ ବଂଜାରା ଘାଟିର ଘିୟାନି ଅଞ୍ଚଳରେ ଏନଏଚ-୩୦୫ରେ ରବିବାର ରାତି ପ୍ରାୟ ୮ଟାରେ ହୋଇଛି । ଆହତ ୧୦ ଛାତ୍ରଙ୍କ ମଧ୍ୟରୁ ୫ ଜଣଙ୍କୁ ଜୋନାଲ ହସ୍ପିଟାଲ କୁଲ୍ଲୁରେ ଭର୍ତ୍ତି କରାଯାଇଛି । ଅନ୍ୟ ୫ ଜଣଙ୍କ ଚିକିତ୍ସା ବଂଜାରର ଏକ ହସ୍ପିଟାଲରେ କରାଯାଉଛି ।
ସୂଚନାଯୋଗ୍ୟ, ପାଗ ଖରାପ ଥିବାରୁ ଗାଡିଟି ନିୟନ୍ତ୍ରଣ ହରାଇ ଖାଇ ମଧ୍ୟକୁ ଖସି ପଡିଥିଲା । ବିଳମ୍ବିତ ରାତି ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଚାଲିଥିବା ବେଳେ ସମସ୍ତ ଛାତ୍ରଙ୍କ ପରିଜନଙ୍କୁ ଏହି ଖବର ଦିଆଯାଇଛି ।
