ବ୍ରହ୍ମପୁର ଅଫିସ,୧୩।୩: ଅବକାରୀ ଗୋଇନ୍ଦା ପୋଲିସ ଶନିବାର ପୃଥକ ଭାବେ ଦୁଇଟି ଗାଡି ଓ ଗୋଟିଏ ଯାତ୍ରୀବାହୀ ବସ୍ରୁ ଗଞ୍ଜେଇ ଜବତ କରିଛି। ଗଞ୍ଜେଇ କନ୍ଧମାଳରୁ ଭଞ୍ଜନଗର ହୋଇ ବ୍ରହ୍ମପୁର ଚାଲାଣ ହେଉଥିବା ଖବର ପାଇ ଏକ ଟିମ୍ ଦୁର୍ଗାପ୍ରସାଦ ନିକଟରେ ଜଗି ରହିଥିଲା। ଅବକାରୀ ପୋଲିସ ପ୍ରଥମେ ସ୍କୁଟି(ନଂ ଓଡି୦୨ସିଡି୮୨୪୯)କୁ ଅଟକାଇ ସେଥିରେ ଥିବା ଏକ ଗ୍ୟାସ୍ ସିଲିଣ୍ଡରକୁ ଯାଞ୍ଚ କରିଥିଲା। ଉକ୍ତ ସିଲିଣ୍ଡରକୁ କାଟି ଦେଖିବା ବେଳେ ସେଥିରେ ୭କେଜି ଗଞ୍ଜେଇ ରହିଥିବା ଜଣାପଡିଥିଲା। ଏହାକୁ ଆଣୁଥିବା ପୁରୀ ଜିଲା ପିପିଲି ଅଞ୍ଚଳର ଜଗନ ବେହେରା(୩୦)ଙ୍କୁ ମାମଲା ନମ୍ବର ୧୦୧୯/୨୨-୨୩ରେ ପୋଲିସ ଗିରଫ କରିଛି। ତାଙ୍କ ସୂଚନାକୁ ଆଧାରକରି ପରେ ପୋଲିସ ସେଠାରେ ଏକ ବାଇକ୍ (ନଂ ଓଡି୨୧ ଡି ୬୫୬୪)କୁ ଅଟକାଇ ଯାଞ୍ଚକରି ସେଥିରୁ ୧୫କେଜି ୨୦୦ଗ୍ରାମ ଗଞ୍ଜେଇ ଜବତ କରିଥିଲା। ଏଥିରେ ସମ୍ପୃକ୍ତ ଜଗତ୍ସିଂହପୁର ନିବାପାଟଣାର ମନୋଜ କୁମାର ସାହୁ(୪୫)ଙ୍କୁ ନଂ.୧୦୨୦/୨୨-୨୩ରେ ଗିରଫ କରିଛି। ସେହିପରି ଆସଥିବା ଏକ ଯାତ୍ରୀବାହୀ ବସ୍କୁ ସେଠାରେ ଅଟକାଇ ଜଣେ ଯୁବକଙ୍କ ବ୍ୟାଗ ଯାଞ୍ଚ କରିଥିଲା। ଉକ୍ତ ବ୍ୟାଗରୁ ୫କେଜି ୨୦୦ ଗ୍ରାମ ଗଞ୍ଜେଇ ଜବତ ହୋଇଛି। ମାମଲା ନମ୍ବର ୧୯୨୧/୨୨-୨୩ ରେ କନ୍ଧମାଳ ଜିଲା ବାଲିଗୁଡାର ସୁଦର୍ଶନ ଦିଗାଲଙ୍କୁ ଗିରଫ କରାଯାଇଛି। ଟିମ୍ରେ ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତ, ଏଏସ୍ଆଇ ବ୍ରଜ ବିହାରୀ ନାୟକ ପ୍ରମୁଖ ସାମିଲ ଥିଲେ।
