ନୂଆଦିଲ୍ଲୀ,୧୯ା୭:ଅତ୍ୟାବଶ୍ୟକ ସାମଗ୍ରୀଗୁଡ଼ିକର ମୂଲ୍ୟ ବୃଦ୍ଧିରେ ଦେଶବାସୀ ଘାଣ୍ଟି ହେଉଥିବାବେଳେ ସୋମବାରଠାରୁ ପୂର୍ବରୁ ପ୍ୟାକ୍ ହୋଇଥିବା ବିଭିନ୍ନ ଖାଦ୍ୟ ସାମଗ୍ରୀ ଯଥା କ୍ଷୀର, ଦହି, ପନିର, ମାଛ, ମାଂସ, ଚୁଡ଼ା, ମୁଢ଼ି ଏବଂ ନନ୍ବ୍ରାଣ୍ଡେଡ୍ ଅଟା, ଚାଉଳ ଉପରେ କେନ୍ଦ୍ର ସରକାର ୫% ଦ୍ରବ୍ୟ ଏବଂ ସେବା କର (ଜିଏସ୍ଟି) ଲାଗୁ କରିଛନ୍ତି। ଏହାକୁ ତୁରନ୍ତ ପ୍ରତ୍ୟାହାର କରିବା ଦାବିରେ ଦେଶର ବ୍ୟବସାୟୀ ଏବଂ ଦୋକାନୀମାନେ ଆସନ୍ତା ସପ୍ତାହରେ ଆନ୍ଦୋଳନକୁ ଓହ୍ଲାଇବେ ବୋଲି ଅଗ୍ରଣୀ ବ୍ୟବସାୟୀ ଗୋଷ୍ଠୀର ଜଣେ ବରିଷ୍ଠ କର୍ମକର୍ତ୍ତାଙ୍କଠାରୁ ଜଣାପଡ଼ିଛି।
ବିଭିନ୍ନ ପ୍ରକାର ନିତ୍ୟବ୍ୟବହାର୍ଯ୍ୟ ସାମଗ୍ରୀ ଏବଂ ଅନ୍ବ୍ରାଣ୍ଡେଡ୍ ସାମଗ୍ରୀ ଉପରେ ଜିଏସ୍ଟି ଲାଗୁ ହେବା ଦ୍ୱାରା ସାଧାରଣ ଲୋକଙ୍କ ଉପରେ ଗଭୀର ପ୍ରଭାବ ପଡ଼ିବ। କରୋନା ଯୋଗୁ ଲୋକଙ୍କ କ୍ରୟ ଶକ୍ତି ହ୍ରାସ ପାଇଥିବାରୁ ବ୍ୟବସାୟୀମାନେ ତାହାର କୁପରିଣାମ ଭୋଗୁଛନ୍ତି। ଏଭଳିସ୍ଥଳେ ଘରୋଇ ଏଲ୍ପିଜି, ସବୁପ୍ରକାର ଘରକରଣା ଓ ପ୍ରତିଦିନ ଆବଶ୍ୟକ ହେଉଥିବା ସାମଗ୍ରୀର ମୂଲ୍ୟ ନିୟମିତ ବଢ଼ିଚାଲିଛି। ଏଥିରେ ଉଭୟ ଖାଉଟି ଏବଂ ବ୍ୟବସାୟୀ ଦୁର୍ଦ୍ଦଶା ମଧ୍ୟକୁ ଠେଲି ହୋଇଯାଇଥିବାବେଳେ ପୁଣି ଉପରୋକ୍ତ ଜିଏସ୍ଟି ଲାଗୁ ଚିନ୍ତା ବଢ଼ାଇଛି ବୋଲି କନ୍ଫେଡେରେଶନ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) ସଭାପତି ପରବିନ୍ ଖଣ୍ଡେଲଓ୍ବାଲ କହିଛନ୍ତି। ୧ କୋଟିରୁ ଊର୍ଦ୍ଧ୍ୱ କ୍ଷୁଦ୍ର ଦୋକାନୀ ଏବଂ ପାଇକାରୀ ବ୍ୟବସାୟୀଙ୍କ ପ୍ରତିନିଧିତ୍ୱ କରୁଥିବା ସିଏଆଇଟିର ସଭାପତି ଖଣ୍ଡେଲଓ୍ବାଲ କହିଛନ୍ତି ଯେ, ଦେଶବ୍ୟାପୀ କ୍ରମାଗତ ପ୍ରତିବାଦ ଆନ୍ଦୋଳନ କରାଯିବ। ଏନେଇ ଆସନ୍ତା ୨୬ ତାରିଖରେ ଭୋପାଳରେ ବିଭିନ୍ନ ରାଜ୍ୟର ବ୍ୟବସାୟୀ ସଂଘ ସଦସ୍ୟଙ୍କ ବୈଠକ ହେବ ବୋଲି ଖଣ୍ଡେଲଓ୍ବାଲ କହିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଚାପ ସୃଷ୍ଟି କରିବା ପାଇଁ ଭାଜପା ଶାସିତ ମଧ୍ୟପ୍ରଦେଶ ରାଜଧାନୀ ଭୋପାଳରୁ ଏହି ଆନ୍ଦୋଳନ ପ୍ରକ୍ରିୟା ଆରମ୍ଭ କରାଯିବାକୁ ନିଷ୍ପତ୍ତି ନିଆଯାଇଥିବା କୁହାଯାଉଛି। ଭୋଟ ରାଜନୀତିରେ ମୋଦିଙ୍କ ପାଇଁ ଗୁରୁତ୍ୱ ବହନ କରୁଥିବା କ୍ଷୁଦ୍ର ବ୍ୟବସାୟୀ ଏବଂ ଦୋକାନୀମାନେ ଏବେ ଜିଏସ୍ଟି ଜାଲରେ ଛନ୍ଦି ହୋଇଯାଇଛନ୍ତି, ଯାହାକୁ ମୋଦି ୨୦୧୭ରେ ପ୍ରାୟ ୨୦ ପ୍ରକାର ସଂଘୀୟ ଏବଂ ରାଜ୍ୟ ଟିକସକୁ ହଟାଇ ଲାଗୁ କରିଥିଲେ। ଭାରତକୁ ଏସିଆର ତୃତୀୟ ବୃହତ୍ ଅର୍ଥନୀତିରେ ପରିଣତ କରିବା ଲକ୍ଷ୍ୟରେ ମୋଦି ଜିଏସ୍ଟି ଲାଗୁକରିଥିଲେ। ହେଲେ ଏବେ ଦେଶର ଅର୍ଥନୀତି ଭୁଶୁଡ଼ିପଡ଼ିଛି ଏବଂ ତାହାର କୁପରିଣାମ ଉଭୟ ଦେଶବାସୀ ଏବଂ ବ୍ୟବସାୟୀ ଭୋଗୁଛନ୍ତି ବୋଲି ବ୍ୟବସାୟୀ ମହଲରେ ସମାଲୋଚନା ହେଉଛି।
