ଭଞ୍ଜନଗର,୧୪ା୩(ଡି.ଏନ.ଏ): ଭଞ୍ଜନଗର ମତ୍ସ୍ୟ ଯାଅଁାଳ ଉପତ୍ାଦନ କେନ୍ଦ୍ର ରୋଡ଼ରେ ଏନ୍ଏସି ପକ୍ଷରୁ ହୋଇଥିବା ଅଣୁ ଜୈବସାର ପରିଚାଳନା କେନ୍ଦ୍ରର ବିଦ୍ୟୁତ୍ ବିଲ ବାକି ଥିବାରୁ ଗତ ସପ୍ତାହରେ ଟିପିଏସ୍ଓଡ଼ିଏଲ ଉକ୍ତ କେନ୍ଦ୍ରର ବିଦ୍ୟୁତ୍ ବିଚ୍ଛିନ୍ନ କରି ଦେଇଥିଲା। ଅଣୁ ଜୈବସାର ପରିଚାଳନା କେନ୍ଦ୍ର ବିଦ୍ୟୁତ୍ ବିଲ୍ ବାବାଦକୁ ପ୍ରାୟ ୪୦ ହଜାର ଟଙ୍କା ଦେବାକୁ ଅଛି।
ଅନ୍ୟପକ୍ଷରେ ଏନଏସି ପ୍ରଶାସନ ମଧ୍ୟ କଡ଼ା ଆଭିମୁଖ୍ୟ ଗ୍ରହଣ କରିଛି। ୨୦୦୭ରୁ ୨୦୨୧ ଡିସେମ୍ବର ୩୧ ତାରିଖ ସୁଦ୍ଧା ହୋଲଡ଼ିଂ ଟ୍ୟାକ୍ସ ବାବଦକୁ ବକେୟା ଥିବା ୨୧ କୋଟି ୧୧ଲକ୍ଷ ୬୬ ହଜାର ୭୦୮ ଟଙ୍କା ୧୫ ଦିନ ମଧ୍ୟରେ ଦେବାକୁ ଏନଏସି କର୍ତ୍ତୃପକ୍ଷ ଟାଟା ପାୱାର କର୍ତ୍ତୃପକ୍ଷଙ୍କୁ ଚିଠି ଲେଖିଛନ୍ତି। ଏହାକୁ ନେଇ ନୂଆ ବିବାଦ ଦେଖାଦେଇଛି। ୨୦୦୭ରେ ୧ କୋଟି ୧୭ ଲକ୍ଷ ଟଙ୍କା ବକେୟା ବାବଦକୁ ଥିଲା। ବର୍ତ୍ତମାନ ବାର୍ଷିକ ୫୭ ଲକ୍ଷ ୨୬ ହଜାର ୨୦ ଟଙ୍କା ହୋଲଡ଼ି୍ଂ ଟ୍ୟାକ୍ସ ହେଉଛି। ଚକ୍ରସୁଧ ହିସାବରେ ଗତ ଡିସେମ୍ବର ୩୧ ସୁଦ୍ଧା ୨୧ କୋଟିରୁ ଉର୍ଦ୍ଧ୍ୱ ଟଙ୍କା ଟାଟା ପାୱାର ବକେୟା ଦେବାକୁ ଅଛି। ପ୍ରାୟ ଏକ ବର୍ଷ ପୂର୍ବେ ଅଣୁ ଜୈବସାର ପ୍ଲାଟ୍ ନିର୍ମାଣ ହୋଇଥିଲା। ବ୍ଲକ ଉକ୍ତ କାର୍ଯ୍ୟ କରିଥିଲା। ତେଣୁ ବ୍ଲକ ନାମରେ କାମ ପାଇଁ ବିଦ୍ୟୁତ୍ ଅଣାଯାଇଥିଲା। ଇତିମଧ୍ୟରେ ପ୍ରାୟ ୪୦ ହଜାର ଟଙ୍କା ବକେୟା ବିଦ୍ୟୁତ୍ ବିଲ୍ ଆସିଥିଲା ବିଡ଼ିଓଙ୍କ ନାମରେ । ଏନଏସି କାମ ହୋଇଥିବା ଯୋଗୁ ବ୍ଲକ ପ୍ରଶାସନ ପକ୍ଷରୁ ବକେୟା ବିଦ୍ୟୁତ୍ ପ୍ରତି ଗୁରୁତ୍ୱ ଦିଆଯାଇ ନ ଥିଲା । ଅପରପକ୍ଷେ ଏନଏସି କର୍ତୃପକ୍ଷଙ୍କ ନାମରେ ବିଲ୍ ଆସୁ ନ ଥିବା ଯୋଗୁ ଏନଏସି ମଧ୍ୟ ବକେୟା ସମ୍ପର୍କରେ ଜାଣିପାରିନଥିଲା। ଏଭଳି ସ୍ଥିତିରେ ଟାଟା ପାୱାର ପକ୍ଷରୁ ଗତ ସପ୍ତାହରେ ବିଦ୍ୟୁତ୍ ବିଚ୍ଛିନ୍ନ କରି ଦିଆଯାଇଥିଲା । ସେଠାରେ ନିୟୋଜିତ ଥିବା ଶ୍ରମିକମାନେ ବେକାର ହୋଇ ବସି ରହିଛନ୍ତି। ଏ ନେଇ ଟିପିଏସ୍ଓଡ଼ିଏଲ ଭଞ୍ଜନଗର ନିର୍ବାହୀଯନ୍ତ୍ରୀ ଜଗତଜିତ୍ ଦାସ ମହାପାତ୍ର କହିଛନ୍ତି, ଏନଏସି ପକ୍ଷରୁ ଆସିଥିବା ଚିଠିକୁ ବିଭାଗୀୟ ଉଚ୍ଚ କର୍ତୃପକ୍ଷଙ୍କ ପାଖକୁ ପଠାଇ ଦିଆଯାଇଛି। ଭଞ୍ଜନଗର ଏନଏସି ନିର୍ବାହୀ ଅଧିକାରୀ ଆଶୁତୋଷ ଗୌରବ କର କହିଛନ୍ତି, ବିଦ୍ୟୁତ୍ ବିଭାଗ ବକେୟା ଅର୍ଥ ପ୍ରଦାନ ନକଲେ ଆଗକୁ ବୋର୍ଡ଼ ଆଇନ ଅନୁଯାଇ ପରବର୍ତ୍ତୀ ପଦକ୍ଷେପ ନେବ ।
