ଭୁବନେଶ୍ୱର,୨୧।୧୨(ବ୍ୟୁରୋ): ରାଜ୍ୟରେ କରୋନା ସଂକ୍ରମଣ କମିବାରେ ଲାଗିଛି। ଧୀରେ ଧୀରେ ସ୍ଥିତି ସ୍ବାଭାବିକ ହେଉଥିବା ବେଳେ ଦୀର୍ଘ ୮ମାସରୁ ଊର୍ଦ୍ଧ୍ୱ ସମୟ ଧରି ଲକ୍ଡାଉନ୍ ଓ ଶଟ୍ଡାଉନ୍ କଟକଣାରେ ରହିଥିବା ଲୋକେ ଏବେ ଶୀତର ମଜା ନେବାକୁ ବାହାରକୁ ବାହାରୁଛନ୍ତି। ଶୀତୁଆ ସକାଳ ହେଉ କି ସନ୍ଧ୍ୟାରେ ରାଜଧାନୀର ବିଭିନ୍ନ ପର୍ଯ୍ୟଟନସ୍ଥଳୀରେ ଦେଖିବାକୁ ମିଳିଲାଣି ଗହଳି ଚହଳି। ଖଣ୍ଡଗିରି, ଉଦୟଗିରି ସହ ଧଉଳି ଶାନ୍ତିସ୍ତୂପ, ବିଭିନ୍ନ ପାର୍କ ଓ ଐତିହାସିକ କୀର୍ତ୍ତିରାଜି ପରିସରରେ ପର୍ଯ୍ୟଟକଙ୍କ ଭିଡ଼ ଜମିଲାଣି। ଖଣ୍ଡଗିରି ଓ ଉଦୟଗିରିକୁ ଅଗଷ୍ଟରୁ ଖୋଲାଯାଇଥିଲେ ମଧ୍ୟ ଆରମ୍ଭରୁ କରୋନା ଭୟରେ ପର୍ଯ୍ୟଟକମାନେ ଆସୁ ନ ଥିଲେ। ହେଲେ ଏବେ କିନ୍ତୁ କେବଳ ଉଦୟଗିରିକୁ ଦୈନିକ ୨୦୦ରୁ ୨୫୦ ପର୍ଯ୍ୟଟକ ଆସୁଥିବାବେଳେ ଛୁଟିଦିନରେ ୪୦୦ରୁ ଊର୍ଦ୍ଧ୍ୱ ପର୍ଯ୍ୟଟକଙ୍କ ସମାଗମ ହେଉଛି। ରବିବାର ଏଠାରେ ପର୍ଯ୍ୟଯକଙ୍କ ସଂଖ୍ୟା ୫ଶହ ଟପିଥିବା ଜଣାପଡିଛି। ସେହିଭଳି ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା(ଏଏସ୍ଆଇ) ଅଧୀନ ଅନ୍ୟାନ୍ୟ ପ୍ରମୁଖ କୀର୍ତ୍ତିରାଜିଗୁଡ଼ିକରେ ମଧ୍ୟ ପୂର୍ବସ୍ଥିତି ଫେରୁଥିବା ଦେଖିବାକୁ ମିଳୁଛି।
ଗତ ସାଢେ ୪ମାସ ମଧ୍ୟରେ ପ୍ରଥମଥର ପାଇଁ ଖଣ୍ଡଗିରି ଓ ଉଦୟଗିରିରେ ଶତାଧିକ ପର୍ଯ୍ୟଟକଙ୍କୁ ଦେଖିବାକୁ ମିଳୁଛି। ଖଣ୍ଡଗିର ପାଇଁ କୌଣସି ଏଣ୍ଟ୍ରି ଫି’ ନ ଥିବାବେଳେ ଉଦୟଗିରି ପାଇଁ ଏଏସ୍ଆଇର ଟିକେଟ ବ୍ୟବସ୍ଥା ରହିଛି। କରୋନା ପାଇଁ କାଉଣ୍ଟର ବନ୍ଦ ରହିଥିବାରୁ ପର୍ଯ୍ୟଟକମାନେ ଅନଲାଇନ୍ରେ ଟିକେଟ କାଟି ଉଦୟଗିରି ଯାଉଛନ୍ତି। କିଏ ପରିବାର ସହ କିଛି ମୁହୂର୍ତ୍ତ କଟାଇ ମନକୁ ହାଲୁକା କରିବାକୁ ଏଠାକୁ ଆସୁଛନ୍ତି ତ ଆଉକିଏ ବନ୍ଧୁମାନଙ୍କ ସହ ସମୟ ବିତାଇବା ଓ ଫଟୋ ଉଠାଇ ମଜା ନେଉଛନ୍ତି। ପର୍ଯ୍ୟଟକଙ୍କ ଆଗମନ ବୃଦ୍ଧି ପାଉଥିବାରୁ ଦୀର୍ଘମାସ ଧରି ରୋଜଗାର ହରାଇଥିବା ସ୍ଥାନୀୟ ବ୍ୟବସାୟୀଙ୍କ ମଧ୍ୟରେ ନୂଆ ଆଶା ଓ ଉତ୍ସାହ ଦେଖିବାକୁ ମିଳୁଛି।
ପୂର୍ବରୁ ପ୍ରତିଦିନ ଖଣ୍ଡଗିରି ଓ ଉଦୟଗିରିକୁ ୨ ହଜାରରୁ ଊର୍ଦ୍ଧ୍ୱ ପର୍ଯ୍ୟଟକ ଆସୁଥିଲେ। କରୋନା ସ୍ଥିତିକୁ ଦୃଷ୍ଟିରେ ରଖି ସମସ୍ତ ପର୍ଯ୍ୟଟନସ୍ଥଳୀ ଓ ଐତିହ୍ୟ ପୀଠକୁ ପର୍ଯ୍ୟଟକଙ୍କ ପ୍ରବେଶ ବନ୍ଦ ରହିଥିଲା। ଅଗଷ୍ଟ ୬ରୁ ସମସ୍ତ ଐତିହାସିକସ୍ଥଳୀ ଖୋଲିବାକୁ ଏଏସ୍ଆଇ ଅନୁମତି ଦେଇଥିଲା। ପ୍ରାରମ୍ଭରୁ ମାତ୍ର ୧୦ରୁ ୨୦ ପର୍ଯ୍ୟଟକ ଆସୁଥିଲେ। ରାଜ୍ୟ ବାହାରୁ କୌଣସି ପର୍ଯ୍ୟଟକ ଆସୁ ନ ଥିଲେ। ଏବେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧିପାଇବା ସହ ବାହାର ରାଜ୍ୟରୁ ଅଣଓଡ଼ିଆ ପର୍ଯ୍ୟଟକମାନେ ମଧ୍ୟ ଆସିଲେଣି ବୋଲି ଏଏସ୍ଆଇ କର୍ମଚାରୀ କହିଛନ୍ତି। ଅନ୍ୟପକ୍ଷରେ ରାଜ୍ୟ ବାହାରର ପର୍ଯ୍ୟଟକଙ୍କ ଆଗମନ ବୃଦ୍ଧିପାଉଥିବାରୁ ଟୁର୍ ଅପରେଟର ଏବଂ ଟୁର୍ ଗାଇଡଙ୍କ ମନରେ ମଧ୍ୟ ନୂଆ ଆଶା ସୃଷ୍ଟି ହୋଇଛି। ଏପଟେ ପର୍ଯ୍ୟଟନସ୍ଥଳୀରେ ଗହଳି ବଢୁଥିବାରୁ କୋଭିଡ୍ ଗାଇଡ୍ଲାଇନ୍ ଅନୁପାଳନକୁ କଡ଼ାକଡ଼ି କରାଯାଇଛି। ଗେଟ୍ ନିକଟରେ ହାତ ସାନିଟାଇଜ୍ କରାଯିବା ସହ ମାସ୍କ ବାଧ୍ୟତାମୂଳକ କରାଯାଇଛି। ସାମାଜିକ ଦୂରତ୍ୱ ରକ୍ଷା କରିବାକୁ ମଧ୍ୟ ଉପସ୍ଥିତ ସୁରକ୍ଷାକର୍ମୀମାନେ ଗୁରୁତ୍ୱ ଦେଉଛନ୍ତି। ପର୍ଯ୍ୟଟନ ଋତୁ ଚାଲିଥିବାରୁ ଆଗକୁ ପର୍ଯ୍ୟଟକଙ୍କ ଆଗମନ ଆହୁରି ବୃଦ୍ଧିପାଇବ ବୋଲି ଆଶା କରାଯାଉଛି।
