ମହାକାଳପଡ଼ା, ୩୧ା୧(ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ଲକ୍ ମତ୍ସ୍ୟ ଅବତରଣ କେନ୍ଦ୍ର ବା ଜେଠିରେ ୨ଟି ଡଙ୍ଗାରୁ ୨ ଟନ୍ ୨୦ କେଜି ମାଛ ଧରା ପଡ଼ିଛନ୍ତି। ଏତେ ସଂଖ୍ୟକ ମାଛ ଜାଲରେ ପଡ଼ିବାରୁ ଡଙ୍ଗା ସମୁଦ୍ରରେ ଟଳମଳ ହୋଇଥିଲା। ମତ୍ସ୍ୟଜୀବୀମାନେ ଏହି ଡଙ୍ଗାକୁ କୌଶଳକ୍ରମେ କୂଳକୁ ଆଣିଥିଲେ। ଜେଠିରେ ଜାଲରୁ ମାଛଙ୍କୁ ଛଡ଼ାଇବାକୁ ମତ୍ସ୍ୟଜୀବୀମାନଙ୍କୁ ଦୀର୍ଘ ସମୟ ଲାଗିଥିଲା। ଏମାନଙ୍କ ଭିତରୁ ଜଣେ ମତ୍ସ୍ୟଜୀବୀଙ୍କ କହିବା କଥା, ଅମାବାସ୍ୟା ପୂର୍ବଦିନ କୋହଲା ପାଗ ସାଙ୍ଗକୁ ଦକ୍ଷିଣା ପବନ ବହିଥିଲା। ଫଳରେ ଏତେ ପରିମାଣର ମାଛ ପଡ଼ିଥିଲେ। ଏହି ମାଛକୁ ଦେଖି ମତ୍ସ୍ୟଜୀବୀମାନେ ବେଶ୍ ଖୁସି ହୋଇଛନ୍ତି। ଏହି ଓଲଟି ପ୍ରଜାତିର ମାଛ କିଲୋ ପ୍ରତି ୨ ଶହରୁ ୩ ଶହ ଟଙ୍କା ଓ ସମୁଦ୍ର ଟାଇଗର ଚିଙ୍ଗୁଡ଼ି କିଲୋ ପ୍ରତି ୧ ହଜାରରୁ ଦେଢ଼ ହଜାର ଟଙ୍କାରେ କୋଲକାତା ବଜାରରେ ବିକ୍ରି ହୋଇଥାଏ। ସ୍ଥାନୀୟ ମାଛ ବ୍ୟବସାୟୀ ଟ୍ରକ୍ ଯୋଗେ ଏହି ମାଛକୁ କୋଲକାତା ଚାଲାଣ କରିଛନ୍ତି।
ସୂଚନାଯୋଗ୍ୟ, ଗହୀରମଥା ସାମୁଦ୍ରିକ ଅଭୟାରଣ୍ୟ ଜଳବାୟୁ ଜୀବଜନ୍ତୁ, ବିରଳ ପ୍ରଜାତିର ମାଛକୁ ଆକୃଷ୍ଟ କରିଥାଏ। ସେଥିପାଇଁ ଶୀତ ଋତୁ ପ୍ରାରମ୍ଭରୁ ଅଲିଭ୍ ରିଡ଼ଲେ କଇଁଛ, ହର୍ସୁ କ୍ରାବ୍, ବିଭିନ୍ନ ପ୍ରଜାତିର ଡଲଫିନ, ସାର୍କ ଭଳି ଭିନ୍ନ ଭିନ୍ନ ପ୍ରଜାତିର ସମୁଦ୍ର ଟାଇଗର ଚିଙ୍ଗୁଡ଼ି ସମେତ ମାଛ ଅନେକ ମାଇଲି ସମୁଦ୍ର ପଥ ଅତିକ୍ରମ କରି ଏଠାକୁ ନିଜର ବଂଶ ବିସ୍ତାର କରିବାକୁ ଚାଲି ଆସନ୍ତି। କାରଣ ଏହି ସ୍ଥାନ ମଧୁର ମିଶ୍ରିତ ଜଳ ଓ ଲୁଣି ପାଣିର ସଙ୍ଗମ ସ୍ଥଳରେ ବଂଶ ବିସ୍ତାର ପାଇଁ ପ୍ରକୃଷ୍ଟ ଜଳବାୟୁ। ହେଲେ ଗହୀରମଥା ଓ ଆଖପାଖ ସାମୁଦ୍ରିକ ଅଞ୍ଚଳରେ ବଡ଼ ବଡ଼ ଟ୍ରଲର, ଗିଲେଟିଂ ବୋଟ ଗାଞ୍ଜ ଜାଲରେ ଛନ୍ଦି ହୋଇ ଅକାଳରେ ସେମାନଙ୍କ ଜୀବନ ଯାଉଛି। ଫଳରେ ବଂଶ ବିସ୍ତାରରେ ବେଆଇନ ଟ୍ରଲର, ବୋଟ ଚଳାଚଳ ବାଧକ ସାଜିଛନ୍ତି।
