ପଦ୍ମପୁର,୯ା୧୨(ପ୍ରଦୀପ୍ତ ଦାଶ):ପଦ୍ମପୁର ଉପଖଣ୍ଡରେ ଗତମାସ ୨୮ତାରିଖରୁ ଖରିଫ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ଧାନ ସଂଗ୍ରହ ପ୍ରକ୍ରିୟା ସୋମବାର ୧୧ ଦିନରେ ପହଞ୍ଚିଛି। ହେଲେ ବର୍ତ୍ତମାନ ସୁଦ୍ଧା ଧାନ ସଂଗ୍ରହ ପ୍ରକ୍ରିୟା ସ୍ବାଭାବିକ ହୋଇପାରିନାହିଁ। ଏହାକୁ ନେଇ ଚାଷୀ ଅସନ୍ତୋଷ ଲାଗି ରହିଛି। ଏହି କ୍ରମରେ ଅସନ୍ତୁଷ୍ଟ ଚାଷୀ ରାଜବୋଡାସମ୍ବର କୃଷକ ସଙ୍ଗଠନ ଆନୁକୂଲ୍ୟରେ ଆବାହକ ଅଶୋକ ସାହୁ, ଆଇନ ପରାମର୍ଶଦାତା ଅଜିତ ଶତପଥୀଙ୍କ ନେତୃତ୍ୱରେ ସୋମବାର ପଦ୍ମପୁର ଉପଜିଲାପାଳ ସ୍ନେହା ଅରଗୁଲଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ସେମାନେ କହିଛନ୍ତି ଯେ, ଏପର୍ଯ୍ୟନ୍ତ ୭୦ପ୍ରତିଶତ ଚାଷୀଙ୍କ ଟୋକନ ପହଞ୍ଚି ନ ଥିବାବେଳେ ଚାଷୀଙ୍କ କଷ୍ଟୋପାର୍ଜିତ ଧାନ ଖଳା, ରାସ୍ତା କଡ଼ ତଥା କ୍ଷେତରେ ପଡିଛି। ଅପରପକ୍ଷରେ ଯେଉଁ ଚାଷୀମାନେ ଧାନ ପକାଇଛନ୍ତି ସେମାନେ କେବେ ମିଲର୍ସ ଧାନ ଉଠାଇବେ ସେ ନେଇ ଅନାଇ ରହିଛନ୍ତି। ମାତ୍ର ଉପଖଣ୍ଡର କୌଣସି ମଣ୍ଡିକୁ ଏ ପର୍ଯ୍ୟନ୍ତ ମିଲର୍ସ ପହଞ୍ଚତ୍ ନ ଥିବା ବେଳେ ପ୍ରଶାସନ ମଧ୍ୟ ତତ୍ପରତା ପ୍ରକାଶ କରୁ ନ ଥିବା ଚାଷୀମାନେ କହିଛନ୍ତି। ମଙ୍ଗଳବାର ସୁଦ୍ଧା ଧାନ ଉଠାଣ ଓ ଟୋକନ ପ୍ରଦାନ ସ୍ବାଭାବିକ ନ ହେଲେ ରାଜବୋଡାସମ୍ବର କୃଷକ ସଙ୍ଗଠନ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛି।
Dharitri – Odisha’s No.1 Odia Daily
