ଓ୍ବାଶିଂଟନ: ଜଳର ଅପଚୟ ରୋକିବା ଏବଂ ଲୋକଙ୍କୁ ବିଭିନ୍ନ ପ୍ରକାର ବ୍ୟାକ୍ଟେରିଆ ଜନିତ ରୋଗରୁ ରକ୍ଷା କରିବା ପାଇଁ ଖୁବ୍ଶୀଘ୍ର ବିନା ପାଣିରେ ସ୍ବତନ୍ତ୍ର ପ୍ରକାର ଟଏଲେଟ ନିର୍ମାଣ ହେବାକୁ ଯାଉଛି। ବିଲ୍ ଗେଟ୍ସ ଏବଂ ସାମ୍ସଙ୍ଗ କମ୍ପାନୀ ମିଳିତ ଭାବେ ଏହି ପ୍ରୋଜେକ୍ଟରେ କାମ କରିଛନ୍ତି। ବିଲ୍ ଓ ମିଲିଣ୍ଡା ଗେଟ୍ସ ଫାଉଣ୍ଡେଶନ୍ ଟଏଲେଟ ପ୍ରୋଜେକ୍ ନେଇ ପ୍ରଥମେ ଯୋଜନା ପ୍ରସ୍ତୁତ କରିଥିବାବେଳେ ୨୦୧୧ରୁ ଏ ନେଇ କାମ ଆରମ୍ଭ ହୋଇଥିଲା।
ଏହି ବିଶେଷ ପ୍ରକାର ଟଏଲେଟରେ ପାଣି ବଦଳରେ ହିଟ୍ ଟ୍ରିଟ୍ମେଣ୍ଟ ସାଙ୍ଗକୁ ବାୟୋପ୍ରୋସେସିଂ ଟେକ୍ନୋଲୋଜି ବ୍ୟବହାର କରାଯାଇଛି। ଏହାଦ୍ୱାରା ମଳ ପୋଡ଼ି ଅଙ୍ଗାର ହୋଇଯିବା ସହ ମଳରେ ଥିବା ବ୍ୟାକ୍ଟେରିଆ ମରିଯିବେ। ବ୍ୟବହୃତ ଟେକ୍ନୋଲୋଜି ସାମ୍ସଙ୍ଗ ଇଲେକ୍ଟ୍ରୋନିକ୍ସ ପକ୍ଷରୁ ବିକଶିତ ହୋଇଛି। ତରଳ ମଳ ପାଇଁ ଏହି ସ୍ବତନ୍ତ୍ର ପ୍ରକାର ଟଏଲେଟରେ ବାୟୋଲୋଜିକାଲ ପ୍ୟୁରିଫିକେଶନ୍ ପ୍ରଣାଳୀ ବ୍ୟବହାର କରାଯିବାକୁ ଥିବାବେଳେ କଠିନ ମଳକୁ ହାଇଡ୍ରେଟେଡ୍ କରାଯିବା ପରେ ଏହାକୁ ଶୁଖାଇ ଜାଳି ପାଉଁଶରେ ପରିବର୍ତ୍ତିତ କରାଯିବ।
ଏହି ଟଏଲେଟ ଦ୍ୱାରା ଲୋକଙ୍କୁ ବ୍ୟାକ୍ଟେରିଆ ଜନିତ ରୋଗରୁ ରକ୍ଷା କରାଯାଇ ପାରିବ ଏବଂ ଜଳ ଅପଚୟକୁ ମଧ୍ୟ ରୋକି ହେବ। ୧୫୯୬ରେ ସାର୍ ଜନ୍ ହାରିଙ୍ଗଟୋନ ଓ୍ବେଷ୍ଟନ୍ ଟଏଲେଟର ଉଦ୍ଭାବନ କରିଥିଲେ। ତା’ ପରଠାରୁ ଫ୍ଲସ୍ ଟଏଲେଟରେ ବିଶେଷ କୌଣସି ପରିବର୍ତ୍ତନ କରାଯାଇ ନାହିଁ। ଓ୍ବାଲର୍ଡ ହେଲ୍ଥ ଅର୍ଗାନାଇଜେଶନ୍ ଏବଂ ୟୁନିସେଫ୍ର ସୂଚନାନୁସାରେ ବିଶ୍ୱରେ ୩.୬ ବିଲିୟନ୍ ଲୋକଙ୍କ ନିମ୍ନମାନର ପରିଚ୍ଛନ୍ନ ବ୍ୟବସ୍ଥା କାରଣରୁ ପ୍ରତିବର୍ଷ ୫ ବର୍ଷରୁ କମ୍ ୫ ଲକ୍ଷ ଶିଶୁ ପ୍ରାଣ ହରାଉଛନ୍ତି। ଶିଶୁ ମୃତ୍ୟୁର କାରଣ ଡାଇରିଆ, ବ୍ୟାକ୍ଟେରିଆ ଜନିତ ରୋଗ ସାଙ୍ଗକୁ ପରିଚ୍ଛନ୍ନତାର ଅଭାବ ବୋଲି ଜଣାପଡ଼ିଛି।
