ପୃଥିବୀରେ ବହୁ ସଂଖ୍ୟକ ଛୋଟ ବଡ଼ ରେଷ୍ଟୁରାଣ୍ଟ ରହିଛି। ହେଲେ ସେସବୁ ମଧ୍ୟରେ କିଛି ଏମିତି ରେଷ୍ଟୁରାଣ୍ଟ ବି ରହିଛି, ଯାହାର ଅଜବ ଥିମ୍ ପାଇଁ ତାହା ସାରା ଦୁନିଆରେ ଚର୍ଚ୍ଚିତ। ଆସନ୍ତୁ ଜାଣିବା
ଏଭଳି କିଛି ରେଷ୍ଟୁରାଣ୍ଟ ସମ୍ପର୍କରେ…
ଟଏଲେଟ୍ ରେଷ୍ଟୁରାଣ୍ଟ: ଏହାର ନାମ ପଢିବା ମାତ୍ରେ ଆପଣଙ୍କୁ ଅଜବ ଲାଗୁଥିବ ନିଶ୍ଚୟ। କାରଣ ଟଏଲେଟ୍କୁ ଖାଦ୍ୟ ପାଇଁ କିଏ ବ୍ୟବହାର କରେ। ହେଲେ ଚାଇନାରେ ରହିଛି ଏହି ଅଜବ ରେଷ୍ଟୁରାଣ୍ଟ, ଯେଉଁଠାରେ ଟେବୁଲ୍ ଚେୟାର୍ ବଦଳରେ ଟଏଲେଟ୍ ସିଟ୍୍ ବ୍ୟବହାର କରାଯାଇଥାଏ। ଏମିତିକି ଖାଦ୍ୟଗୁଡ଼ିକ ରଖାଯିବା ସହ ଗ୍ରାହକଙ୍କୁ ପରଷା ମଧ୍ୟ ଟଏଲେଟ୍ ପ୍ୟାନ୍ ଭଳି କଣ୍ଟେନରରେ ହିଁ ହୋଇଥାଏ।
ଆଇସ୍ ରେଷ୍ଟୁରାଣ୍ଟ: ଦୁବାଇ ଭଳି ଗରମ ସ୍ଥାନରେ ଲୋକଙ୍କୁ ଆଣ୍ଟାର୍କଟିକା ଭଳି ବରଫ ଆଉ ଥଣ୍ଡାର ଅନୁଭୂତି ଦେବା ଲାଗି ରହିଛି ଆଇସ୍ ରେଷ୍ଟୁରାଣ୍ଟ। ଏହି ରେଷ୍ଟୁରାଣ୍ଟକୁ ବରଫ ଏବଂ କାଚରେ ସମ୍ପୂର୍ଣ୍ଣ ଡିଜାଇନ୍ କରାଯିବା ସହ ଏହା ଭିତରର ତାପମାତ୍ରା ସର୍ବଦା ଶୂନ ଡିଗ୍ରୀରୁ କମ୍ ରଖାଯାଇଥାଏ। ଏହା ଭିତରେ ବ୍ୟବସ୍ଥା ଏପରି କରାଯାଇଛି ଯେପରି ଗ୍ରାହକଙ୍କୁ ସମ୍ପୂର୍ଣ୍ଣ ବରଫାଞ୍ଚଳ ଭିତରେ ଥିବା ଭଳି ଅନୁଭବ ହୋଇଥାଏ। ଏହା ଭିତରେ କେବଳ ବରଫରେ ପ୍ରସ୍ତୁତ ଥଣ୍ଡା ଖାଦ୍ୟ ହିଁ ମିଳିଥାଏ।
ପ୍ରିଜନ୍ ଥିମ୍ ରେଷ୍ଟୁରାଣ୍ଟ: ଅପରାଧୀଙ୍କୁ ଦଣ୍ଡ ଦେବା ଲାଗି ରଖାଯାଇଥାଏ ଜେଲ୍ରେ। ହେଲେ ବିନା ଅପରାଧରେ ସାଧାରଣ ଲୋକଙ୍କୁ ଜେଲ୍ ଭିତରେ ଖୁସିରେ ବସି ଖାଉଥିବାର କେବେ ଦେଖିଛନ୍ତି। ଏଭଳି ଏକ ନିଆରା ଦୃଶ୍ୟ ଦେଖିବାକୁ ମିଳେ ଚାଇନାରେ ଥିବା ପ୍ରିଜନ୍ ରେଷ୍ଟୁରାଣ୍ଟରେ। ସେଠାରେ ରୁମ୍ଗୁଡ଼ିକ ଜେଲ୍ର ଭିତର ଭଳି ଡିଜାଇନ୍ କରାଯାଇ ଟେବୁଲ ଚେୟାର ବ୍ୟବସ୍ଥା କରାଯାଇଛି। ଗ୍ରାହକ ଆସିଲେ ଏହି ଜେଲ ଭିତରେ ବସାଇ ଓ୍ବେଟରମାନେ କଏଦୀ ଏବଂ ଜେଲରଙ୍କ ବେଶ ପୋଷାକରେ ଖାଦ୍ୟ ପରଷିଥାନ୍ତି।
ଦି ବୁନିୟାଦି ରେଷ୍ଟୁରାଣ୍ଟ: ଏକା, ପରିବାର ହେଉ କିମ୍ବା ସାଙ୍ଗସାଥୀଙ୍କ ସହ ରେଷ୍ଟୁରାଣ୍ଟରେ ଖାଇବାକୁ ଯାଉଥିଲେ ଆମେ ସର୍ବପ୍ରଥମେ କୌଣସି ଭଲ ଡ୍ରେସ୍ ବାଛିଥାଉ। ହେଲେ ରେଷ୍ଟୁରାଣ୍ଟକୁ ସମ୍ପୂର୍ଣ୍ଣ ଉଲଗ୍ନ ହୋଇଯିବା କଥା ଆମେ ସ୍ବପ୍ନରେ ବି ଭାବିପାରିବା ନାହିଁ। କିନ୍ତୁ, କଥାଟି ଅଜବ ଲାଗୁଥିଲେ ବି ସତ, ଏଭଳି ଏକ ଅଜବ ରେଷ୍ଟୁରାଣ୍ଟ ‘ଦି ବୁନିୟାଦି’ ରହିଛି ଲଣ୍ଡନରେ; ଯେଉଁଠାରେ ରେଷ୍ଟୁରାଣ୍ଟର ସମସ୍ତ କର୍ମଚାରୀଙ୍କଠାରୁ ଆରମ୍ଭ କରି ଗ୍ରାହକ ପର୍ଯ୍ୟନ୍ତ ସମସ୍ତେ ଥାନ୍ତି ଉଲଗ୍ନ। ତେବେ ଆଶ୍ଚର୍ଯ୍ୟର କଥା ହେଉଛି, ସେଠାରେ ପ୍ରତିଦିନ ହଜାର ହଜାର ସଂଖ୍ୟାରେ ଗ୍ରାହକଙ୍କ ଭିଡ଼ ଜମିଥାଏ
