ନୂଆଦିଲ୍ଲୀ,୨୯ ।୧: ସଂସଦର ବଜେଟ ଅଧିବେଶନ ଶୁକ୍ରବାରଠାରୁ ଆରମ୍ଭ ହୋଇଛି । ୧ ଫେବୃୟାରୀରେ ସଂସଦରେ ଆର୍ଥିକ ବର୍ଷ ୨୦୨୧-୨୨ର ସାଧାରଣ ବଜେଟ ଉପସ୍ଥାପନ କରାଯିବ । ଦୁଇ ଭାଗରେ ହେବାକୁ ଥିବା ଏହି ଅଧିବେଶନ ୮ ଏପ୍ରିଲ ପର୍ଯ୍ୟନ୍ତ ଚାଲିବ । ୧୫ ଫେବୃୟାରୀ ପର୍ଯ୍ୟନ୍ତ ଚାଲିବାକୁ ଥିବା ଏହାର ପ୍ରଥମ ଅଧିବେଶନର ଆରମ୍ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଭିଭାଷଣରୁ ଆରମ୍ଭ ହୋଇଥିଲା । ଏଥିରେ ରାଷ୍ଟ୍ରପତି ସରକାରଙ୍କ ନୀତିଠାରୁ ଆରମ୍ଭ କରି ଗଲୱାନ ଘାଟିରେ ଶହୀଦ ହୋଇଥିବା ଯବାନ ଓ ଦିଲ୍ଲୀରେ ହୋଇଥିବା ହିଂସା ଉପରେ ଆଲୋକପାତ କରିଥିଲେ । ସେହିପରି ୩ ନୂଆ କୃଷି ଆଇନକୁ ନେଇ ମଧ୍ୟ ନିଜର ଅଭିଭାଷଣ ରଖିଥିଲେ ରାଷ୍ଟ୍ରପତି । ସେ କହିଥିଲେ ନୂଆ କୃଷି ଆଇନ ହେବା ପରେ ପୁରୁଣାରେ ସେମିତି କିଛି ବାଧା ଉପୁଜି ନାହିଁ । ଏହାସହ ସାଧାରଣତନ୍ତ୍ର ଦିବସରେ ଲାଲ କିଲାରେ ତ୍ରିରଙ୍ଗା ପ୍ରତି ହୋଇଥିବା ଅପମାନ ଦୁର୍ଭାଗ୍ୟପୁର୍ଣ୍ଣ ବୋଲି କହିଥିଲେ ରାଷ୍ଟ୍ରପତି । ଏହାକୁ ନେଇ ବିରୋଧୀ କଂଗ୍ରେସ ସମେତ ପ୍ରାୟ ୧୮ଟି ଦଳ ରାଷ୍ଟ୍ରପତିଙ୍କ ଅଭିଭାଷଣକୁ ବହିଷ୍କାର କରିଥିଲେ । ଏହାକୁ ନେଇ ଭାରତୀୟ ଜନତା ପାର୍ଟି(ଭାଜପା) ଏମ୍ପି ରବିଶଙ୍କର ପ୍ରସାଦ କହିଛନ୍ତି, ରାଷ୍ଟ୍ରପତି ରାଜନୀତିଠାରୁ ଊର୍ଦ୍ଧ୍ୱରେ, ସେ ସମ୍ବିଧାନର ମୁଖ୍ୟ । ତାଙ୍କ ସମ୍ବୋଧନକୁ ସମ୍ମାନ କରିବା ଗଣତନ୍ତ୍ରର ସୁସ୍ଥ ଅଭ୍ୟାସ । ଦୁର୍ଭାଗ୍ୟପୂର୍ଣ୍ଣ ଯେ ଦେଶରେ ୫୦ ବର୍ଷ ଧରି ଶାସନ କରିଥିବା କଂଗ୍ରେସ ଓ ଅନ୍ୟ ଦଳମାନେ ଏହାକୁ ବହିଷ୍କାର କରିବା । କଂଗ୍ରେସ ଏହାଦ୍ୱାରା କେଉଁ ପରମ୍ପରା ସ୍ଥାପନ କରୁଛି ବୋଲି ରବିଶଙ୍କର ପ୍ରଶ୍ନ କରିଛନ୍ତି ।
