ରାୟଗଡ଼ା,୮।୩ (ଭାଗ୍ୟଶ୍ରୀ ମିଶ୍ର): ନାରୀମାନେ ଏବେ ସବୁ କ୍ଷେତ୍ରରେ ସଫଳ। ପ୍ରତ୍ୟେକ କାର୍ଯ୍ୟରେ ମହିଳାମାନେ ଆଗରେ। ନାରୀମାନେ ନିଜେ ଆଗକୁ ବଢ଼ିବା ସହ ଅନ୍ୟମାନଙ୍କୁ ମଧ୍ୟ ରାସ୍ତା ଦେଖାଇଥାଆନ୍ତି, ଯାହା ରାୟଗଡ଼ା ଜିଲା ଗୌତମନଗରରେ ରହୁଥିବା ରୀତାରାଣୀ ମିଶ୍ରଙ୍କୁ ଦେଖିଲେ ଭଲଭାବେ ବୁଝିହୁଏ। ରାୟଗଡ଼ା ଭଳି ଆଦିବାସୀ ଅଧ୍ୟୁଷିତ ଅଞ୍ଚଳରେ ଦେୟମୁକ୍ତ କ୍ରୀଡ଼ା ଶିକ୍ଷୟିତ୍ରୀ ଭାବେ କାର୍ଯ୍ୟକରି ଏବେ ସଫଳ ଏନ୍ସିସି ଅଧିକାରୀ ହୋଇ ଜିଲାର ୧୫୦୦ରୁ ଊର୍ଦ୍ଧ୍ୱ ଯୁବତୀଙ୍କୁ ଏନସିସି ତାଲିମ ଦେଇ ଅନ୍ୟମାନଙ୍କ ପାଇଁ ନାରୀ ସଶକ୍ତୀକରଣର ଏକ ଉଦାହରଣ ପାଲଟିଛନ୍ତି l ରୀତାରାଣୀ ଏବେ ରାୟଗଡ଼ା ମହିଳା ମହାବିଦ୍ୟାଳୟରେ ଏନ୍ସିସି ଅଧିକାରୀଭାବେ କାର୍ଯ୍ୟରତ ଅଛନ୍ତି। ରୀତାରାଣୀଙ୍କ ଜନ୍ମ ବ୍ରହ୍ମପୁରରେ। ବାପାଙ୍କର ଟ୍ରାନ୍ସଫର ଯୋଗୁ ରୀତାରାଣୀଙ୍କୁ ରାୟଗଡ଼ା ଆସିବାକୁ ପଡ଼ିଥିଲା। ସେବେଠୁ ରୀତା ରାୟଗଡ଼ାରେ ରହି ଆସୁଛନ୍ତି। ପିଲାଟି ଦିନରୁ କ୍ରୀଡ଼ା ଏବଂ ଏନ୍ସିସି ପ୍ରତି ଆଗ୍ରହ ଥିଲା। ସ୍କୁଲ କଲେଜରେ ଆୟୋଜିତ କ୍ରୀଡ଼ା ପ୍ରତିଯୋଗିତାରେ ଭାଗ ନେଇ କୃତିତ୍ୱ ଲାଭ କରୁଥିଲେ। ହେଲେ ଏନ୍ସିସି ପାଇଁ କୌଣସି ସୁବିଧା ସୁଯୋଗ ନ ଥିଲା। + ୨ ରେ ବ୍ରହ୍ମପୁର ଖଲ୍ଲିକୋଟ କଲେଜରେ ପଢ଼ିବାବେଳେ ଏନ୍ସିସିରେ ଯିବା ପାଇଁ କୌଣସି ସୁଯୋଗ ନ ଥିଲା l ତେଣୁ ସେ ଅନ୍ୟ ସ୍କୁଲରେ ହେଉଥିବା ଅଭ୍ୟାସ ବାହାରୁ ଦେଖୁଥିଲେ। ରାୟଗଡ଼ା ମହିଳା ମହାବିଦ୍ୟାଳୟରେ + ୩ ପଢ଼ିବା ବେଳେ ଏନ୍ସିସିରେ ଯୋଗଦେବାର ସୁଯୋଗ ମିଳିଥିଲା। ସେ ନିଜେ ତାଲିମ ନେବା ସହ କଲେଜରେ ଏନ୍ସିସିର କେୟାରଟେକିଂ ଅଫିସରଭାବେ ୧ ବର୍ଷରୁ ଊର୍ଦ୍ଧ୍ୱ ସମୟ ଧରି ଝିଅମାନଙ୍କୁ ଦେୟମୁକ୍ତ ତାଲିମ ଦେଉଥିଲେ। ଦେୟମୁକ୍ତ ତାଲିମ ଦେବା ପରେ କଲେଜ କମିଟି ରୀତାରାଣୀଙ୍କ ଆଗ୍ରହ ଏବଂ ପିଲାଙ୍କ ପାଇଁ କ୍ରୀଡ଼ା ଶିକ୍ଷକଙ୍କ ଆବଶ୍ୟକତା ଦୃଷ୍ଟିରୁ ଉପରସ୍ଥ ଅଧିକାରୀଙ୍କୁ ଜଣାଇବା ପରେ ତାଙ୍କୁ କଲେଜରେ ନିଯୁକ୍ତି ମିଳିଥିଲା। ସିଟି କେୟାର ଟେକିଂ ଅଫିସରଭାବେ ୧ ବର୍ଷ କାର୍ଯ୍ୟ କରିବା ପରେ ଏନ୍ସିସି ଟ୍ରେନିଂ ନେଇ ଲ୍ୟୁଟ୍ନାଣ୍ଟ ପୋଷ୍ଟ ପ୍ରାପ୍ତ କରିଥିଲେ। ପୋଲିସ, ଆର୍ମି ସହ ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭକରି ଯେପରି ନିଜକୁ ସୁରକ୍ଷିତ ରଖିବେ ସେହି ଲକ୍ଷ୍ୟ ନେଇ ଝିଅମାନଙ୍କୁ ତାଲିମ ଦେବା ଆରମ୍ଭ କରିଥିବା ରୀତାରାଣୀ କହିଛନ୍ତି। ରୀତାରାଣୀଙ୍କଠାରୁ ତାଲିମ ପାଇଥିବା ୬୦ରୁ ଊର୍ଦ୍ଧ୍ୱ ଝିଅ ଜାତୀୟସ୍ତରରେ କ୍ରୀଡ଼ା ପ୍ରତିଯୋଗିତାରେ ଭାଗ ନେଇଛନ୍ତି। ସେହିଭଳି ୨୦୦ରୁ ଊର୍ଦ୍ଧ୍ୱ ରାଜ୍ୟସ୍ତରୀୟ ଓ ୫୦ରୁ ଊର୍ଦ୍ଧ୍ୱ ବିଶ୍ୱବିଦ୍ୟାଳୟସ୍ତରୀୟ କ୍ରୀଡ଼ାରେ ଅଂଶଗ୍ରହଣ କରିଛନ୍ତି। ୨୦୨୪ ଜାନୁୟାରୀ ୨୬ରେ ଦିଲ୍ଲୀଠାରେ ଆୟୋଜିତ ପରେଡ୍ରେ ରାୟଗଡ଼ା ମହିଳା ମହାବିଦ୍ୟାଳୟର ୨ଜଣ ସାମିଲ ହୋଇଥିଲେ। ସେମାନେ ରାଷ୍ଟ୍ରପତିଙ୍କୁ ପରେଡ ଅଭିବାଦନ ଜଣାଇବା ସହ ପୁରସ୍କୃତ ମଧ୍ୟ ହୋଇଛନ୍ତି। ଏଥିପାଇଁ ରୀତାରାଣୀଙ୍କୁ ୨ଥର ରାଜ୍ୟପାଳ ପୁରସ୍କାର ମିଳିଛି। ଜାତୀୟସ୍ତରରେ ମହିଳା ଅଲିମ୍ପିକ ଆସୋସିଏଶନ ପକ୍ଷରୁ ଭାରତର ବେଷ୍ଟ ଆଇରନ ଲେଡି ଭାବେ ତାଙ୍କୁ ସମ୍ମାନିତ କରାଯାଇଛି। ଏଥିସହ ରାଜ୍ୟ ଓ ଜାତୀୟସ୍ତରରେ ମଧ୍ୟ ପୁରସ୍କୃତ ହୋଇଛନ୍ତି। ଝିଅମାନେ ଆତ୍ମନିର୍ଭରଶୀଳ ହେବା ଆବଶ୍ୟକ। ଏନ୍ସିସି ଦ୍ୱାରା ଝିଅମାନେ ଶୃଙ୍ଖଳିତ ଜୀବନ ବିତାଇବା ସହ ସୁସ୍ଥ ସମାଜ ଗଠନ କରିପାରିବେ ଓ ଆତ୍ମନିର୍ଭରଶୀଳ ହୋଇପାରିବେ ବୋଲି ରୀତାରାଣୀ କହିଛନ୍ତି।
