ସାକ୍ଷୀଗୋପାଳ,୨୩।୨(ଡି.ଏନ୍.ଏ./ସ୍ବ.ପ୍ର.): ସେବା ଓ ତ୍ୟାଗର ମୂର୍ତ୍ତିମନ୍ତ ପ୍ରତୀକ ଓଡ଼ିଆ ଜାତିର ଚିରନମସ୍ୟ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଗ୍ରାମକୁ ଐତିହ୍ୟ ଗ୍ରାମର ମାନ୍ୟତା ଦେଇ ରାଜ୍ୟ ସରକାରଙ୍କ ପକ୍ଷରୁ ୨୫ କୋଟି ଟଙ୍କା ବ୍ୟୟରେ ଉନ୍ନୟନ କରାଯାଇଛି। ଗୁରୁବାର ଏହା ଜନମାନସ ପାଇଁ ଲୋକାର୍ପଣ କରାଯିବ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଜାତୀୟ ସ୍ମୃତିପୀଠକୁ ଉଦ୍ଘାଟନ କରିବାକୁ ଆସିବେ। ଏଥିଲାଗି ଜିଲା ପ୍ରଶାସନ ଓ ସତ୍ୟବାଦୀ ଥାନା ପକ୍ଷରୁ ସମସ୍ତ ପ୍ରକାରର ପ୍ରସ୍ତୁତି ସରିଯାଇଛି। ଭୁବନେଶ୍ବରରେ ହେଲିକ୍ୟାପ୍ଟର ଯୋଗେ ମୁଖ୍ୟମନ୍ତ୍ରୀ ସୁଆଣ୍ଡୋରେ ପହଞ୍ଚି ପ୍ରଥମେ ପ୍ରମୋଦ ଉଦ୍ୟାନରେ ସ୍ଥାନିତ କରାଯାଇଥିବା ୧୫ଫୁଟ ଉଚ୍ଚତା ବିଶିଷ୍ଟ ଗୋପବନ୍ଧୁଙ୍କ ପୂର୍ଣାବୟବ ପ୍ରତିମୂର୍ତ୍ତି ଅନାବରଣ କରି ଶ୍ରଦ୍ଧାଞ୍ଜଳି ଅର୍ପଣ କରିବେ। ନବର୍ନିମିତ ଉତ୍କଳମଣିଙ୍କ ସଂଗ୍ରହାଳୟ ଲୋକାର୍ପଣ କରିବା ପରେ ପୁନରୁଦ୍ଧାର କରାଯାଇ ସଂରକ୍ଷିତ କରାଯାଇଥିବା ଷଠିଘର ଓ ଗ୍ରାମର ଆରାଧ୍ୟ ଠାକୁର ଶ୍ରୀ ଲୋକେଶ୍ୱର ଦେବଙ୍କ ମନ୍ଦିର ପରିଦର୍ଶନ କରିବେ। ପରେ ମୁଖ୍ୟମନ୍ତ୍ରୀ ସେଠାରେ ଏକ ଜନସମାଶେରେ ଅଭିଭାଷଣ ପ୍ରଦାନ କରିବେ। ଜନ ସମାବେଶକୁ ଲକ୍ଷ୍ୟ କରି ବ୍ୟାପକ ପ୍ରସ୍ତୁତି ମଧ୍ୟରେ ଆଇନଶୃଙ୍ଖଳା, ସୁରକ୍ଷା, ଗମନାଗମନ, ପାର୍କିଂ ବ୍ୟବସ୍ଥା କରାଯାଇଛି।
