କେନ୍ଦୁଝର,୭।୬(ସ୍ବ.ପ୍ର): କେନ୍ଦୁଝର ସଦର ବ୍ଲକ୍ ଅନ୍ତର୍ଗତ ବରଦାପାଳ ପଞ୍ଚାୟତ ସାମାଜିକ କର୍ମୀ ତଥା ଯୁବ ସରପଞ୍ଚ ଶ୍ରମିକଙ୍କ ସହ ଏମ୍ଜିଏନ୍ଆର୍ଇଜିଏସ୍(ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା)ରେ କାମ କରି ଚର୍ଚ୍ଚାକୁ ଆସିଥିଲେ। ଏବେ ହାଣ୍ତିଭଙ୍ଗା ସରପଞ୍ଚ ପୂର୍ଣ୍ଣମୀ ସର୍ଦ୍ଦାର ଶ୍ରମିକମାନଙ୍କ ସାଥିରେ କାମକରି ଚର୍ଚ୍ଚାକୁ ଆସିଛନ୍ତି।
ସୂଚନା ଅନୁଯାୟୀ, ମଙ୍ଗଳବାର ସକାଳେ କାଠବାଉଶୁଳିଠାରେ ଚାଲିଥିବା ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟ ପରିଦର୍ଶନରେ ପୂର୍ଣ୍ଣମୀ ଯାଇଥିଲେ। ସେଠାରେ ପ୍ରଚଣ୍ତ ଖରାରେ ଶ୍ରମିକମାନେ କୋଦାଳ ଝୁଡ଼ି ଧରି କାମ କରୁଥିବା ଦେଖିବାକୁ ପାଇଥିଲେ। ଏହି ମୂହୁର୍ତ୍ତରେ ସେ ଶ୍ରମିକମାନଙ୍କୁ ଉତ୍ସାହିତ କରିବା ପାଇଁ ନିଜେ କୋଦାଳ ଧରି କାମ କରିଥିଲେ। ଘଟଣା ପରେ ତାଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଉଛି। ତାଙ୍କ ସ୍ବାମୀ ନଟବର ସର୍ଦ୍ଦାର କହିଛନ୍ତି, ପୂର୍ଣ୍ଣମୀ ନିଜେ ଦିନେ ମଜୁରି କରି ଚଳୁଥିଲେ। ତେବେ ସେ ନିର୍ବାଚନ ଲଢ଼ି ସରପଞ୍ଚ ଭାବେ ବିଜୟୀ ହୋଇଛନ୍ତି। ସେ ବିଜୟୀ ହେବା ପରେ ହାଣ୍ତିଭଙ୍ଗା ପଞ୍ଚାୟତ ଅଞ୍ଚଳରେ ଉନ୍ନତିମୂଳକ କାର୍ଯ୍ୟ ଜାରି ରଖିଛନ୍ତି। ଏଥିପାଇଁ ପୂର୍ଣ୍ଣମୀ ପୂର୍ବରୁ ସଦର ବିଡିଓ ନୁପୂରଚାନ୍ଦ ଗୋଟିଆଙ୍କଠାରୁ ସମ୍ବର୍ଦ୍ଧିତ ହୋଇଛନ୍ତି। ବ୍ଲକ୍ର ଶ୍ରେଷ୍ଠ ସରପଞ୍ଚଭାବେ ମଧ୍ୟ ପୁରସ୍କୃତ ହୋଇଥିଲେ।
