କୋଲକାତା,୪ା୫(ପି.ଟି.):ପଶ୍ଚିମବଙ୍ଗ ବିଧାନସଭା ନିର୍ବାଚନ ରାଜ୍ୟ ରାଜନୀତିରେ ବଡ଼ ପରିବର୍ତ୍ତନ ଆଣିଛି। ଏଠାରେ ଭାଜପା ବିପୁଳ ବିଜୟ ହାସଲ ସହ ପ୍ରଥମ ଥର ପାଇଁ ରାଜ୍ୟରେ ସରକାର ଗଢ଼ିବାକୁ ଯାଉଛି। ୨୯୪ ଆସନ ବିଶିଷ୍ଟ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମ୍ୟାଜିକ୍ ସଂଖ୍ୟା ୧୪୮ ହୋଇଥିବାବେଳେ ଗୈରିକ ଦଳ ୨୦୦ରୁ ଊର୍ଦ୍ଧ୍ୱ ଆସନରେ ଆଗୁଆ ରହି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମ୍ସି)ର ୧୫ ବର୍ଷ ଶାସନର ଅନ୍ତ ଘଟାଇବାକୁ ଯାଉଛି।
ପଶ୍ଚିମବଙ୍ଗରେ ୨ ପର୍ଯ୍ୟାୟରେ ଏପ୍ରିଲ ୨୩ ଓ ୨୯ରେ ଭୋଟଗ୍ରହଣ ହୋଇଥିବାବେଳେ ସର୍ବାଧିକ ୯୨ ପ୍ରତିଶତରୁ ଅଧିକ ମତଦାନ ହୋଇଥିଲା। ରାଜ୍ୟରେ ଚତୁର୍ଥ ଥର ପାଇଁ କ୍ଷମତା ବଜାୟ ରଖିବାକୁ ଟିଏମ୍ସି ଲକ୍ଷ୍ୟ ରଖିଥିବାବେଳେ ବିରୋଧୀ ଦଳ ଭାଜପା ସେଠାରେ କ୍ଷମତା ଦଖଲ କରିବାକୁ ଜୋରଦାର ପ୍ରତିଦ୍ୱନ୍ଦ୍ୱିତା କରୁଥିଲା। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଆରମ୍ଭ କରି ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କ ସମେତ ଅନେକ କେନ୍ଦ୍ରମନ୍ତ୍ରୀ ଓ ଭାଜପାର କେନ୍ଦ୍ରୀୟ ନେତୃତ୍ୱ ପଶ୍ଚିମବଙ୍ଗରେ ମାରାଥନ ପ୍ରଚାର କରିଥିଲେ। ଅଧିକାଂଶ ଏକ୍ଜିଟ୍ ପୋଲ୍ ଭାଜପା ସପକ୍ଷରେ ମତ ଦେଇଥିବାବେଳେ ୨ଟି ସଂସ୍ଥା ମମତାଙ୍କ ଟିଏମ୍ସି ଜିତିବ ବୋଲି ପୂର୍ବାନୁମାନ କରିଥିଲେ। ତେଣୁ ମମତା କ୍ଷମତା ବଜାୟ ରଖୁଛନ୍ତି କି ନାହିଁ ତାହାକୁ ନେଇ ଶେଷ ପର୍ଯ୍ୟନ୍ତ ଲୋକଙ୍କ ମନରେ ଉତ୍କଣ୍ଠା ଲାଗିରହିଥିଲା।
୨୦୨୧ ନିର୍ବାଚନରେ ୩୮ ପ୍ରତିଶତ ଭୋଟ ସହ ଭାଜପା ୭୭ ଆସନ ଜିତିଥିବାବେଳେ ଏଥର ଭୋଟ ଶେୟାର ପ୍ରାୟ ୪୫ ପ୍ରତିଶତକୁ ବଢ଼ିଛି। ଗୈରିକ ଦଳ ୨୦୦ ଆସନ ଅତିକ୍ରମ କରିବାକୁ ଯାଉଛି। ଅନ୍ୟପକ୍ଷରେ ଗତ ବିଧାନସଭା ନିର୍ବାଚନରେ ଶାସକ ଟିଏମ୍ସି ୪୮ ପ୍ରତିଶତ ଭୋଟ ପାଇଥିବାବେଳେ ଏଥର ତାହା ପାଖାପାଖି ୪୦.୪୯ ପ୍ରତିଶତକୁ ହ୍ରାସ ପାଇଛି। ମୁଖ୍ୟମନ୍ତ୍ରୀ ମମତା ବାନାର୍ଜୀ ଭବାନୀପୁର ଆସନରେ ଭାଜପାର ଶୁଭେନ୍ଦୁ ଅଧିକାରୀଙ୍କଠାରୁ ପଛରେ ରହିଛନ୍ତି। ନନ୍ଦିଗ୍ରାମ ଆସନରେ ମଧ୍ୟ ଶୁଭେନ୍ଦୁ ଟିଏମ୍ସିର ପବିତ୍ର କରଙ୍କଠାରୁ ୧,୫୦୦ରୁ ଊର୍ଦ୍ଧ୍ୱ ଭୋଟ ଆଗରେ ଅଛନ୍ତି।