କୋଲକାତା,୩୦।୫: ଟିଏମ୍ସି ନେତା ତଥା ସାଂସଦ ଅଭିଷେକ ବାନାର୍ଜୀଙ୍କ ଉପରେ ଶନିବାର ସନ୍ଧ୍ୟାରେ କିଛି ଲୋକ ଆକ୍ରମଣ କରିଥିବା ଅଭିଯୋଗ ହୋଇଛି। ମିଳିଥିବା ସୂଚନା ମୁତାବକ, ଅଭିଷେକ ଦଳୀୟ ଜଣେ କର୍ମୀଙ୍କୁ ଭେଟିବା ପାଇଁ ଯାଉଥିବା ବେଳେ କିଛି ଲୋକ ତାଙ୍କୁ ଘେରିଯାଇ ଆକ୍ରମଣ କରିଛନ୍ତି।
ଏନେଇ ଘଟଣାସ୍ଥଳରେ ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଥିଲା। ସୁରକ୍ଷାକର୍ମୀ ବହୁ କଷ୍ଟରେ ତାଙ୍କୁ ସେଠାରୁ ସୁରକ୍ଷିତ ଭାବେ ବାହାର କରିଥିଲେ। ପରେ ସୁରକ୍ଷା ପାଇଁ ତାଙ୍କୁ ହେଲମେଟ ପିନ୍ଧାଇ ନେଇଯାଇଥିଲା।
ଏପରି କି ତାଙ୍କ ଉପରେ ଅଣ୍ଡା ଫିଙ୍ଗାଯାଇଥିବା ବେଳେ ପଥର ମାଡ଼ ମଧ୍ୟ ହୋଇଥିବା ଅଭିଯୋଗ ହୋଇଛି। ଘଟଣାସ୍ଥଳରେ ଉପସ୍ଥିତ ଲୋକମାନେ ଅଭିଷେକ ବାନାର୍ଜୀଙ୍କୁ ଦେଖି ଚୋର-ଚୋର କହି ନାରାବାଜି କରିଥିଲେ। ଏପରିକି ଧସ୍ତାଧସ୍ତି ମଧ୍ୟରେ ତାଙ୍କ ସାର୍ଟ ଚିରି ଯାଇଥିବା କୁହାଯାଉଛି।