ଢେଙ୍କାନାଳ ଅଫିସ୍, ୨୨।୫: ଢେଙ୍କାନାଳ ଜିଲା ହିନ୍ଦୋଳ ରେଞ୍ଜ୍ କୋଇ ସଂରକ୍ଷିତ ଜଙ୍ଗଲରୁ ଗତ ଶୁକ୍ରବାର ଏକ କଲରାପତରିଆ ବାଘର ଗଳିତ ମୃତଦେହ ଠାବ କରାଯିବା ପରେ ଏହାକୁ ନେଇ ବନ ବିଭାଗ ପକ୍ଷରୁ ଆରମ୍ଭ ହୋଇଛି ତନାଘନା। ୩-୪ ଦିନ ପୂର୍ବରୁ ଶିକାରୀଙ୍କ ଦ୍ୱାରା ବିଛାଯାଇଥିବା ବାର୍ହା ଫାଶରେ ପଡ଼ି ବାଘଟିର ମୃତ୍ୟୁ ଘଟିଥିବାବେଳେ ଏହା କିପରି ପାଟ୍ରୋଲିଂ ଦାୟିତ୍ୱରେ ଥିବା କର୍ମଚାରୀଙ୍କ ନଜରକୁ ଆସିଲା ନାହିଁ, ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ସମ୍ପୃକ୍ତ ବନାଞ୍ଚଳ ଦାୟିତ୍ୱରେ ଥିବା ଅଧିକାରୀଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ଅପରପକ୍ଷେ କୋଇ ସଂରକ୍ଷିତ ଜଙ୍ଗଲରେ ଏହି ପ୍ରଜାତିର ବାଘଙ୍କ ଉପସ୍ଥିତିର ପ୍ରମାଣ ମିଳି ନ ଥିବାବେଳେ ନନ୍ଦିନିଆ ସଂରକ୍ଷିତ ଜଙ୍ଗଲରୁ ଉକ୍ତ କଲରାପତରିଆ ଚାଲି ଆସିଥିବା ଅନୁମାନ କରାଯାଉଛି।
ଜଙ୍ଗଲରେ ବାର୍ହା ଶିକାର ପାଇଁ ବାଇକ୍ କ୍ଲଚ୍ ତାରରେ ତିଆରି ଫାଶରେ ପଡ଼ି ଉକ୍ତ ଅଣ୍ଡିରା କଲରାପତରିଆର ଜୀବନ ଯାଇଛି। ଏହାର ଆନୁମାନିକ ବୟସ ୩-୪ବର୍ଷ ମଧ୍ୟରେ ହେବ ବୋଲି ବନ ବିଭାଗ ପକ୍ଷରୁ କୁହାଯାଇଛି। ବାଘମୃତ୍ୟୁ ପଛରେ ଶିକାରୀ ଯେତିକି ଦାୟୀ, ସମପରିମାଣରେ ପାଟ୍ରୋଲିଂରେ ନିୟୋଜିତ କର୍ମଚାରୀ ମଧ୍ୟ ଉତ୍ତରଦାୟୀ ବୋଲି ସାଧାରଣରେ ଆଲୋଚନା ହେଉଛି। ଏହାକୁ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶ ଚାନ୍ଦ ଗୋଗିନେନି ମଧ୍ୟ ସ୍ବୀକାର କରିଛନ୍ତି।
ନନ୍ଦିନିଆ ସଂରକ୍ଷିତ ଜଙ୍ଗଲରେ କଲରାପତରିଆ ବାଘଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହି ବିସ୍ତୀର୍ଣ୍ଣ ବନାଞ୍ଚଳରେ ଲଗାଯାଇଥିବା ଟ୍ରାପ୍ କ୍ୟାମେରାରେ ସେମାନଙ୍କ ଉପସ୍ଥିତି ଧରାପଡ଼ିବା ପରେ ବନ ବିଭାଗର ତତ୍ପରତା ପ୍ରକାଶ ପାଇଥିଲା। ବାଘଙ୍କ ସୁରକ୍ଷା ଦୃଷ୍ଟିରୁ ନନ୍ଦିନିଆକୁ ସାତକୋଶିଆ ବ୍ୟାଘ୍ର କରିଡ଼ରରେ ଅନ୍ତର୍ଭୁକ୍ତ କରାଯାଇଥିଲା। ଏପରି କି ଦାୟିତ୍ୱରେ ଥିବା ବନ କର୍ମଚାରୀଙ୍କୁ ସ୍ବତନ୍ତ୍ର ଭାବେ ତାଲିମ ପ୍ରଦାନ କରାଯାଇଥିଲା। ମୁଖ୍ୟତଃ ଜଙ୍ଗଲରେ ଥିବା ଜଳାଶୟ ନିକଟକୁ ବନ୍ୟପ୍ରାଣୀମାନେ ପାଣି ପିଇବାକୁ ଆସୁଥିବାବେଳେ ଉକ୍ତ ସ୍ଥାନରେ ଶିକାରୀମାନେ ଫାଶ ବିଛାଇ ଥାଆନ୍ତି। ଏଭଳି ସମ୍ବେଦନଶୀଳ ସ୍ଥାନ ଚିହ୍ନଟ କରିବା ପାଇଁ ବନ କର୍ମଚାରୀଙ୍କୁ ପ୍ରଶିକ୍ଷଣ ଦିଆଯାଇଛି। ବନ୍ୟପ୍ରାଣୀମାନେ ଚଳପ୍ରଚଳ କରୁଥିବା ସମ୍ବେଦନଶୀଳ ଅଞ୍ଚଳ ଉପରେ ସ୍ବତନ୍ତ୍ର ଦୃଷ୍ଟି ରଖିବାକୁ ନିର୍ଦ୍ଦେଶ ଦିଆଯାଇଛି। ତଥାପି ଫାଶରେ ପଡ଼ି ବାଘ ମରିବା କର୍ମଚାରୀଙ୍କ ଦାୟିତ୍ୱହୀନତାକୁ ପଦାରେ ପକାଇଛି। ପାଟ୍ରୋଲିଂରେ ଅବହେଳା ପ୍ରଦର୍ଶନ ଏହାର ପ୍ରମୁଖ କାରଣ ବୋଲି କୁହାଯାଉଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ କୁହନ୍ତି, ବାଘମୃତ୍ୟୁ ଘଟଣାର ତଦନ୍ତ ଚାଲିଛି। ଫାଶ ଜବତ କରିବା ଲାଗି କର୍ମଚାରୀମାନେ ତାଲିମପ୍ରାପ୍ତ ହୋଇଥିଲେ ମଧ୍ୟ କାର୍ଯ୍ୟରେ ଅବହେଳା ପ୍ରଦର୍ଶନ କରିଛନ୍ତି। ସେମାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ଅଭିଯୁକ୍ତଙ୍କୁ ଧରିବା ଲାଗି ଉଦ୍ୟମ ଆରମ୍ଭ ହୋଇଛି। କୋଇ ସଂରକ୍ଷିତ ଜଙ୍ଗଲରେ ବାଘ ନ ଥିବା ବେଳେ ଉକ୍ତ କଲରାପତରିଆ ନନ୍ଦିନିଆ ସଂରକ୍ଷିତ ଜଙ୍ଗଲରୁ ଚାଲିଆସିଥିବା ସନ୍ଦେହ କରାଯାଉଛି।
