ନୂଆପଡ଼ା ଅଫିସ,୨୫।୩: ନୂଆପଡ଼ା ଜିଲା କୋମନା ବ୍ଲକ ଅଧୀନ ସୁନାବେଡ଼ା ବନ୍ୟପ୍ରାଣୀ ଅଭୟାରଣ୍ୟ ଭିତରେ ଥିବା ଗାଁ ଓ ପାହାଡତଳି ଗାଁରେ ଗତ ୩ ସପ୍ତାହରୁ ଊର୍ଦ୍ଧ୍ୱ ହେବ ବାଘ ଆତଙ୍କ ଲାଗି ରହିଛି। ବାଘର ଫଟୋ ଟ୍ରାକ କରିବା ପାଇଁ ବନ ବିଭାଗ ପକ୍ଷରୁ ଟ୍ରାକିଂ କ୍ୟାମେରା ଲଗାଇ ଥିଲେ ମଧ୍ୟ ବାଘର ଫଟୋ ଟ୍ରାକ ହେଉ ନ ଥିଲା। ବନ ବିଭାଗ କେବଳ ବାଘର ପାଦ ଚିହ୍ନ ଠାବ କରିିଥିଲା। ହେଲେ ଶୁକ୍ରବାର ନୂଆପଡ଼ା ସଦର ବ୍ଲକ ମୁସରଙ୍ଗି ପ୍ରସ୍ତାବିତ ସଂରକ୍ଷଣ ଜଙ୍ଗଲରେ ଲାଗିଥିବା ଟ୍ରାକ କ୍ୟାମେରା ବାଘର ଫଟୋ କଏଦ ହୋଇଥିବା ସୂଚନା ମିଳିଛି।
ସୁନାବେଡା ଅଭୟାରଣ୍ୟ ସୋସେଙ୍ଗ ପଞ୍ଚାୟତ ଜଲମଡେଇ ଗ୍ରାମରେ ଜଣେ ମଣିଷ, ଦୁଇଟି ବାଛୁରି ଓ ଗୋଟିଏ କୁକୁର ଖାଇବା ପରେ ବନ ବିଭାଗ ୧୦ଟି ଟ୍ରାକିଂ କ୍ୟାମେରା ଲଗାଇ ବିଫଳ ହୋଇଛନ୍ତି। ଟ୍ରାକିଂ କ୍ୟାମେରାରେ ବାଘ ଟ୍ରାକ ହେଉ ନ ଥିବାରୁ କ୍ୟାମେରାର ସ୍ଥାନ ପରିବର୍ତ୍ତନ କରିଛନ୍ତି। ବାଘ ଗାଁ ଚାରି ପାଖରେ ବୁଲୁଛି। କ୍ୟାମେରାରେ ଫଟୋ ଟ୍ରାକ ନ ହେବାରୁ ବନପ୍ରାଣୀ ବିଭାଗ ନାକେଦମ ହୋଇ ଗଲେଣି। ବାଘ ଗାଁ ଚାରି ପାଖରେ ଗର୍ଜନ କରୁୁଥିବାରୁ ଲୋକେ ଆହୁରି ଭୟଭୀତ ଅଛନ୍ତି। କେବଳ ବନ ବିଭାଗ ଲୋକଙ୍କୁ ସଚେତନ କରୁଛି। ସେହିପରି ଅଭୟାରଣ୍ୟର ପାଦଦେଶରେ ଥିବା ମୁସରଙ୍ଗୀ ସଂରକ୍ଷିତ ଜଙ୍ଗଲ ଅଞ୍ଚଳରେ ଆଜକୁ ପ୍ରାୟ ୩ ସପ୍ତାହ ହେବ ବାଘ ଆତଙ୍କ ଲାଗି ରହିଛି। ଗୁରୁବାର ଜଙ୍ଗଲରେ ଆଉ ଗୋଟିଏ ବାଛୁରି ମାରିଥିବା ଅଭିଯୋଗ ହୋଇଛି। ମୁସରଙ୍ଗୀ ସଂରକ୍ଷିତ ଅଞ୍ଚଳରେ ଥିବା ୧୦ରୁ ଊର୍ଦ୍ଧ୍ୱ ଗାଁ ଲୋକେ ଭୟଭୀତ ଅଛନ୍ତି। ସେମାନେ ବାଘୁଣୀ ସହିତ ଛୁଆ ମଧ୍ୟ ରହିଥିବା ଦେଖିଛନ୍ତି। ଜଲମଡେଇ ଗାଁରେ ୧୫ ଦିନରୁ ଊର୍ଦ୍ଧ୍ୱ ହେିବ ବନ୍ୟପ୍ରାଣୀ ବିଭାଗ ବାଘର ଟେର ପାଉ ନ ଥିବା ବେଳେ ନୂଆପଡା ସଦର ବ୍ଲକ ମୁସରଙ୍ଗି ସଂରକ୍ଷିତ ଜଙ୍ଗଲରେ ଲାଗିଥିବା ଟ୍ରାକିଂ କ୍ୟାମେରାରେ କଲରାପତରିଆ ବାଘର ଫଟୋ କଏଦ ହୋଇଥିବା ନୂଆପଡା ସଦର ରେଞ୍ଜର ବିନିତା ଭୋଇ ସୂଚନା ଦେଇଛନ୍ତି।
