ସମ୍ବଲପୁର,୪।୧୨(ବ୍ୟୁରୋ): ସମ୍ବଲପୁର ଡେବ୍ରିଗଡ଼ ଅଭୟାରଣ୍ୟରେ ମହାବଳ ବାଘ ଦେଖିବାକୁ ମିଳିଛି। ଗତ ୧ତାରିଖରେ ପର୍ଯ୍ୟଟକ ଓ ବନ ବିଭାଗ କର୍ମଚାରୀ କରିଥିବା ଭିଡିଓ ଏବେ ଭାଇରାଲ ହୋଇଛି। ହୀରାକୁଦ ବନ୍ୟପ୍ରାଣୀ ଡିଏଫ୍ଓ ଅଂଶୁପ୍ରଜ୍ଞା ଦାଶ ଅଭୟାରଣ୍ୟରେ ମହାବଳ ବାଘ ଥିବା ନେଇ ସ୍ପଷ୍ଟ କରିଛନ୍ତି। ଦୀର୍ଘ ୫ ବର୍ଷ ପରେ ମହାବଳ ପୁଣି ଦେଖାଦେଇଛି। ଏହାକୁ ନେଇ ବନ ବିଭାଗ ଉତ୍ସାହିତ ଥିବା ବେଳେ ପରିବେଶବିତ୍ମାନେ ମଧ୍ୟ ଖୁସି ଜାହିର କରିଛନ୍ତି। ଏ ସମ୍ପର୍କରେ ଡିଏଫଓ ଦାଶ ସୂଚନା ଦେଇ କହିଛନ୍ତି ଯେ, ଡିସେମ୍ବର ୧ତାରିଖରେ କେତେଜଣ ପର୍ଯ୍ୟଟକଙ୍କୁ ନେଇ ବନବିଭାଗର ସଫାରି ଗାଡ଼ି ଅଭୟାରଣ୍ୟରେ ଯାଉଥିଲା। ଅପରାହ୍ନ ପ୍ରାୟ ୫ଟା ସମୟରେ ଏହି ମହାବଳ ବାଘ ରାସ୍ତା ଉପରକୁ ଚାଲି ଆସିଥିଲା। କିଛି ସମୟ ରାସ୍ତା ଉପରେ ଚାଲି ଜଙ୍ଗଲ ଭିତରକୁ ଚାଲି ଯାଇଥିଲା। ପର୍ଯ୍ୟଟକମାନେ ଭିଡିଓରେ ମହାବଳର ଗତିବିଧିକୁ କଏଦ କରି ନେଇଥିଲେ।
ଘଟଣା ସମ୍ପର୍କରେ ବନ ବିଭାଗ ଉଚ୍ଚ ପଦସ୍ଥ ଅଧିକାରୀ ଯାଞ୍ଚ କରିବା ପରେ ଶନିବାର ଘଟଣା ସମ୍ପର୍କରେ ସ୍ପଷ୍ଟ କରିଛନ୍ତି। ମହାବଳର ପାଦଚିହ୍ନ ଓ ଖଞ୍ଜାଯାଇଥିବା ସିସିଟିଭିକୁ ମଧ୍ୟ ଯାଞ୍ଚ କରାଯାଇଥିଲା। ବାଘର ବୟସ ଜଣାପଡି ନ ଥିବା ବେଳେ ପ୍ରାପ୍ତ ବୟସର ଓ ଏହା ଅଣ୍ଡିରା ବାଘ ବୋଲି ଜଣାପଡ଼ିଥିବା ଦାଶ କହିଛନ୍ତି। ଏହି ବାଘ ପୂର୍ବରୁ ଅଭୟାରଣ୍ୟରେ ନ ଥିଲା। ତେଣୁ ପଡ଼ୋଶୀ ରାଜ୍ୟ କିମ୍ବା ରାଜ୍ୟର କୌଣସି ଅଭୟାରଣ୍ୟରୁ ଆସିଥିବା ସନ୍ଦେହ କରାଯାଉଛି।
ସୂଚନାଯୋଗ୍ୟ, ସାତକୋଶିଆ, ଶିମିଳିପାଳ ଭଳି ସମ୍ବଲପୁରରେ ରହିଛି ଡେବ୍ରିଗଡ଼ ଅଭୟାରଣ୍ୟ। ହୀରାକୁଦ ଜଳଭଣ୍ଡାର ପାର୍ଶ୍ୱରେ ରହିଛି ଘଞ୍ଚ ଜଙ୍ଗଲ। ଯାହାକି ବନ୍ୟ ପ୍ରାଣୀ ଓ ପକ୍ଷୀମାନଙ୍କ ରହିବା ପାଇଁ ଉପଯୁକ୍ତ ସ୍ଥାନ। ଏହାସହ ଡେବ୍ରିଗଡ଼ ଅଭୟାରଣ୍ୟ ପର୍ଯ୍ୟଟନସ୍ଥଳୀର ସ୍ବତନ୍ତ୍ର ମାନ୍ୟତା ପାଇଛି। ଓଟିଡିସି ପକ୍ଷରୁ ଏହା ପରିଚାଳନା କରାଯାଉଛି। ପର୍ଯ୍ୟଟକଙ୍କ ରହିବା ପାଇଁ ପ୍ରାକୃତିକ ପରିବେଶ ଭିତରେ କଟେଜଗୁଡିକ ନିର୍ମାଣ କରାଯାଇଛି। ଏହାସହ ସାଇକ୍ଲିଂ, ବୋଟିଂ, ଟ୍ରାକିଙ୍ଗ ଭଳି ସୁବିଧା ରହିଛି। ଏହି ପର୍ଯ୍ୟଟନସ୍ଥଳୀକୁ ବର୍ଷ ତମାମ ରାଜ୍ୟ ତଥା ରାଜ୍ୟ ବାହାରୁ ପର୍ଯ୍ୟଟକ ଆସନ୍ତି। ଏପରି କି ବିଦେଶୀ ପର୍ଯ୍ୟଟକ ଆସିଥାନ୍ତି। ଶମ୍ବର, ହରିଣ, ମୟୂର, ଗଣ୍ଡା, ଗୟଳ, ବାର୍ହା, କୋକିଶିଆଳି, ହେଟାବାଘ, ହାତୀ ଭଳି ପ୍ରାୟ ୪୦ରୁ ଊର୍ଦ୍ଧ୍ୱ ବନ୍ୟପ୍ରାଣୀ ଦେଖିବାକୁ ମିଳିଥାଏ। ୫ ବର୍ଷ ପୂର୍ବରୁ ଏଠାରେ ଏକ ମହାବଳ ବାଘ ଦେଖିବାକୁ ମିଳିଥିଲା। ବାର୍ହା ଶିକାର କରିବା ପାଇଁ ଶିକାରୀମାନେ ବିଛାଇଥିବା ବିସ୍ଫୋରକ ଦ୍ୱାରା ମୁହଁରେ ଆଘାତ ଲାଗି ମହାବଳର ମୃତ୍ୟୁ ଘଟିଥିଲା। ଯାହାକୁ ନେଇ ଅଭୟାରଣ୍ୟ ମହାବଳ ବାଘଶୂନ୍ୟ ହୋଇଯାଇଥିଲା। ପୁଣି ମହାବଳ ବାଘ ଦେଖା ଦେବା ପରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବ ବୋଲି ଆଶା କରାଯାଉଛି। ଡେବ୍ରିଗଡ଼ ଅଭୟାରଣ୍ୟରେ ବନ ବିଭାଗ ସ୍ଥାନୀୟ ଲୋକଙ୍କୁ ନିଯୁକ୍ତି ଦେବା ପାଇଁ ସୁଯୋଗ ସୃଷ୍ଟି କରିଛି। ୪ଟି ଗ୍ରାମବାସୀଙ୍କୁ ନେଇ କମିଟି ଗଠନ କରାଯାଇଛି। ସ୍ଥାନୀୟ ଅଞ୍ଚଳବାସୀଙ୍କୁ ସଫାରି ଗାଡ଼ି ଚଳାଇବା, ଟିକେଟ କାଉଣ୍ଟରରେ କାମ କରିବା ଓ ଗାଇଡ ଭାବେ ମଧ୍ୟ ନିଯୁକ୍ତି କରାଯାଇଛି। ସ୍ଥାନୀୟ ଏସ୍ଏଚ୍ଜି ମହିଳାମାନେ ହସ୍ତତନ୍ତ, ହସ୍ତଶିଳ୍ପ ତିଆରି ସାମଗ୍ରୀଗୁଡ଼ିକ ବିକ୍ରୀ କରୁଛନ୍ତି। ଯାହାକି ପର୍ଯ୍ୟଟକଙ୍କ ମନ ମୋହୁଛି।
