ବାହାନଗା,୨୯।୬(ଅରୂପ କୁମାର ଦାସ)ମଙ୍ଗଳବାରଠାରୁ ସ୍ବାଭାବିକ ହୋଇଛି ବାହାନଗା ରେଳଷ୍ଟେଶନ। ବୁଧବାର ଷ୍ଟେଶନରେ ଟିକେଟ କାଉଣ୍ଟର ଖୋଲାଯାଇଛି ା ତେବେ ଦ୍ୱିତୀୟ ଦିନରେ ୨ଟି ଟ୍ରେନ୍ ବାଲେଶ୍ୱର-ଭୁବନେଶ୍ୱର ଅଫ୍ ଟ୍ରେନ୍ ସକାଳେ ଯାଇଥିବା ବେଳେ ଦିନରେ ଖଡଗପୁର-ଭଦ୍ରକ ପାସେଞ୍ଜର ଯାଇଥିବା ବାହାନଗା ଷ୍ଟେଶନମାଷ୍ଟର ଏସ.କେ. ପଟ୍ଟନାୟକ ସୂଚନା ଦେଇଛନ୍ତି।
ଦୀର୍ଘ ଦିନ ପରେ ବାହାନଗା -ଗୋପାଳପୁର ମୁଖ୍ୟ ରାସ୍ତାରେ ଥିବା ରେଳ ଫାଟକ ଓ ରାସ୍ତାକାମ ହେଉଥିବାରୁ ତାହା ସର୍ବସାଧାରଣଙ୍କ ନିମନ୍ତେ ବନ୍ଦ କରାଯାଇଥିଲା। ଲୋକମାନେ ବାହାନଗା ବ୍ଲକକୁ ଓ ଜାତୀୟ ରାଜପଥ ପର୍ଯ୍ୟନ୍ତ ଯାତାୟାତ କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି ା ମଙ୍ଗଳବାର ୨ ଘଣ୍ଟା ନିମନ୍ତେ ମୁଖ୍ୟ ରାସ୍ତାକୁ ସର୍ବସାଧାରଣଙ୍କ ନିମନ୍ତେ ଛଡାଯାଇଥିବା ବେଳେ ପରେ ତାହା ସିଲ୍ କରିଦିଆଯାଇଥିଲା। କେବଳ ପାଦଚଲା ଓ ସାଇକେଲ ଚାଳକଙ୍କୁ ଫାଟକ ରାସ୍ତାରେ ଯାତାୟାତ ନିମନ୍ତେ ଅନୁମତି ଦିଆଯାଇଛି ା ମାତ୍ର ଗୋପାଳପୁର ଦିଗରୁ ଆସିଲେ ଷ୍ଟେଶନକୁ ଯିବା ନିମନ୍ତେ ରେଲୱେ ବାଇପାସ ରାସ୍ତାରେ ଯିବା ପାଇଁ ଛଡାଯାଉଛି। ତେବେ ବାହାନଗା ବଜାର ଓ ବ୍ଲକକୁ ଯିବା ପାଇଁ ଲୋକମାନେ ବର୍ଷାରେ ହଇରାଣ ହେଉଛନ୍ତି ା ତେବେ ଷ୍ଟେଶନରେ ଟ୍ରେନ୍ ରହଣି ଓ ସମସ୍ତ ପାସେଞ୍ଜର ସ୍ବାଭାବିକ ଭାବେ ଚଳାଚଳା କରିବା ନିମନ୍ତେ ଆହୁରି ମାସେ ଲାଗିବ ବୋଲି ଖଡଗପୁର ଏସ୍ଇଆର ସିପିଆରଓଙ୍କଠାରୁ ଜଣାପଡିଛି ା ରେଳଲାଇନ୍ କାମ ସରିବା ସହିତ ପରୀକ୍ଷାମୂଳକ ଭାବେ ଧୀରେ ଧୀରେ ଗୋଟିଏ ଗୋଟିଏ ଟ୍ରେନ୍ ଚାଲୁ କରାଯାଉଥିବା ଜଣାପଡିଛି। ମାତ୍ର କେଉଁ ପାସେଞ୍ଜର ଟ୍ରେନ କେତେବେଳେ ବାହାନଗା ଷ୍ଟେଶନରେ ରହିବ ତାହା କେବଳ ସକାଳେ ମେସେଜ ଆସିଲେ ଜାଣିପାରିବୁ ବୋଲି ଷ୍ଟେଶନମାଷ୍ଟର ପଟ୍ଟନାୟକ କହିଛନ୍ତି।
