ପଟାଙ୍ଗି,୬ା୮(ଶରତ କୁମାର ଧଳ): ବର୍ତ୍ତମାନ ଶିକ୍ଷା ଅନୁଷ୍ଠାନଗୁଡ଼ିକରେ ନାମ ଲେଖା କାର୍ଯ୍ୟକ୍ରମ ଚାଲିଥିବା ବେଳେ ଏହାର ସୁଯୋଗ ଉଠାଇ ହ୍ୟାକର୍ମାନେ ଶିକ୍ଷିତ ଯୁବତୀଯୁବକଙ୍କୁ ଠକି ଚାଲିଛନ୍ତି। ଏହିପରି ଠକେଇର ଶିକାର ହୋଇ କିଛି ଯୁବକଙ୍କ ସହ ପରିବାରବର୍ଗ କଲେଜ ଏବଂ ପୋଲିସ ନିକଟକୁ ଧାଇଁ ନିରାଶ ହୋଇଥିବା ଦେଖିବାକୁ ମିଳିଛି। ଏପରି ଘଟଣା ଘଟିଛି କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ପୁକାଲି, ଚନ୍ଦକା ପଞ୍ଚାୟତ ସମେତ ଅନ୍ୟ ଗ୍ରାମରେ ବସବାସ କରୁଥିବା ଶିକ୍ଷିତ ଯୁବକଙ୍କ କ୍ଷେତ୍ରରେ।
ସୂଚନାନୁସାରେ, ପୁକାଲି ପଞ୍ଚାୟତର ରେଲିସାହିରେ ବସବାସ କରୁଥିବା ରବି ଖରା ସ୍ଥାନୀୟ ଗାଙ୍ଗେଶ୍ୱରୀ ଉଚ୍ଚ ଶିକ୍ଷା ବିଦ୍ୟାଳୟରେ ନାମ ଲେଖାଇବା ପାଇଁ ଅନ୍ଲାଇନ୍ରେ ଦରଖାସ୍ତ ଆବେଦନ କରିଥିଲେ। ଏହି ସମୟରେ ଚଏସ୍ ଲଗ୍ ଇନ୍ରେ ଛାତ୍ର ଜଣକ ଉକ୍ତ ବିଦ୍ୟାଳୟକୁ ପସନ୍ଦ କରିଥିଲା। ଏହାର କିଛି ସମୟ ପରେ ଏକ ନମ୍ବର ଯଥା ୯୬୬୮୩୯୭୬୨୫ରୁ କଲ ଆସିଥିଲା। ଯେଉଁ ଥିରେ କି ଛାତ୍ର ଜଣଙ୍କୁ କୁହାଯାଇଥିଲା ମୁଁ ପଟ୍ଟାଙ୍ଗି ଉପରୋକ୍ତ ବିଦ୍ୟାଳୟର ପ୍ରିନ୍ସପାଲ କହୁଛି ତୁରନ୍ତ ତୁମେ ଆମ ବିଦ୍ୟାଳୟରେ ନାମ ଲେଖାଇବା ପାଇଁ ଅନଲାଇନ ମାଧ୍ୟମରେ ଟଙ୍କା ଡିପୋଜିଟ କର। ଏହିପରି କଥା ଶୁଣିବା ପରେ ଛାତ୍ର ଜଣକ ଉକ୍ତ ନମ୍ବର ରେ ୮, ୩୦୦ ଟଙ୍କା ଫୋନ୍ ପେ’ ମାଧ୍ୟମରେ ଡିପୋଜିଟ କରି ବିଦ୍ୟାଳୟରେ ପହଞ୍ଚି ବିଦ୍ୟାଳୟର କର୍ତ୍ତୃପକ୍ଷ ତଥା ପ୍ରିନ୍ସପାଲଙ୍କୁ ସାକ୍ଷାତ କରିଥିଲେ। ପ୍ରିନ୍ସପାଲ ଯୁବକଙ୍କ ଠାରୁ ସମସ୍ତ ଘଟଣା ଜାଣିବା ଏହା ଆମର ନମ୍ବର ନୁହେଁ ତୁମ ସହ ଠକାମିର ଶିକାର ହୋଇଛି। ତୁରନ୍ତ ପୋଲିସ ନିକଟରେ ଅଭିଯୋଗ କରିବା ପାଇଁ କହିଥିଲେ।
ସେହିପରି ଅନ୍ୟ ଏକ ଯୁବକ ଚନ୍ଦକା ପଞ୍ଚାୟତ ମଧ୍ୟ ଏହିପରି ଠକାମିର ଶିକାର ହୋଇ ୧୦ ହଜାର ଟଙ୍କା ଠକାମିର ଶିକାର ହୋଇଥିବା ବେଳେ ସମ୍ବାଇ ପଞ୍ଚାୟତର ଘସବା ନାୟକ, ଗୁଡ଼ା ଗ୍ରାମର ଜଗଦୀଶ ଖରା ଅନୁରୂପ ୫ ହଜାର ଟଙ୍କା ଦେଇ ଠକାମିର ଶିକାର ହୋଇଛନ୍ତି। ଯାହାକୁ ନେଇ ବର୍ତ୍ତମାନ ଠକାମିର ଶିକାର ହୋଇଥିବା ୩ଜଣ ପଟ୍ଟାଙ୍ଗି ପୋଲିସ ନିକଟରେ ପହଞ୍ଚି ଲିଖିତ ଅଭିଯୋଗ କରିଥିବା ଜଣାପଡ଼ିଛି। ଏନେଇ ଥାନାଧିକାରୀ ପ୍ରଭାତ ବେହେରା ଉକ୍ତ ଘଟଣା ସମ୍ପର୍କରେ ତଦନ୍ତ ଆରମ୍ଭ ହୋଇଛି ବୋଲି ପ୍ରକାଶ କରିଛନ୍ତି।
