ଜୋହାନ୍ସବର୍ଗ,୨୫।୭(ପି.ଟି.): ଇଂଲଣ୍ଡ ଗସ୍ତ ପାଇଁ ଟ୍ରେନିଂ କ୍ୟାମ୍ପରେ ଯୋଗ ଦେବାକୁ ଥିବା ଦକ୍ଷିଣ ଆଫ୍ରିକା କ୍ରିକେଟ ଦଳର ୩ ଜଣ ସଦସ୍ୟ କରୋନା ପଜିଟିଭ୍ ବୋଲି ଜଣାପଡିଛି। ଜଣେ ସପୋର୍ଟ ଷ୍ଟାଫ୍ଙ୍କ ସହିତ ୩ ଜଣ ସଦସ୍ୟଙ୍କୁ କ୍ୟାମ୍ପରୁ ପ୍ରତ୍ୟାହାର କରି ନିଆଯାଇଛି ବୋଲି କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) ତରଫରୁ ସୂଚନା ଦିଆଯାଇଛି। ଜୁଲାଇ ୨୭ ତାରିଖରୁ ପ୍ରିଟୋରିଆରେ ଏହି ପ୍ରଶିକ୍ଷଣ ଶିବିର ଆରମ୍ଭ ହେବାର କାର୍ଯ୍ୟକ୍ରମ ରହିଛି। ବର୍ତ୍ତମାନା ଏମାନଙ୍କୁ ୧୦ ଦିନ ପାଇଁ ସେଲ୍ଫ ଆଇସୋଲେଶନରେ ରହିବାକୁ ହେବ ଓ ସେମାନେ ଟ୍ରେନିଂ କ୍ୟାମ୍ପରେ ଯୋଗ ଦେବେନାହିଁ ବୋଲି ସିଏସ୍ଏ ସ୍ପଷ୍ଟ କରିଛି। ଏହି ୩ଜଣ ସଦସ୍ୟମାନଙ୍କଠାରେ ସାମାନ୍ୟ ଲକ୍ଷଣ କିମ୍ବା ଆଦୌ କିଛି ଲକ୍ଷଣ ଦେଖାଯାଇନାହିଁ। ତେବେ ମେଡିକାଲ ଟିମ୍ ଏମାନଙ୍କ ଉପରେ ତୀକ୍ଷ୍ଣ ନଜର ରଖିଛି।
ସିଏସ୍ଏ ମେଡିକାଲ କମିଟି ପ୍ରୋଟୋକଲ ଅନୁଯାୟୀ ବାକି ଖେଳାଳିମାନେ ଅଭ୍ୟାସ କରିବେ। ଖେଳାଳି ଓ ସପୋର୍ଟଷ୍ଟାଫ୍ଙ୍କୁ ନେଇ ସିଏସ୍ଏ ୩୪ଟି ଟେଷ୍ଟ କରିଛି। ଦ୍ୱିତୀୟ ଟ୍ରେନିଂ କ୍ୟାମ୍ପ ପୂର୍ବରୁ ପୂରା ଦଳ ଓ ସପୋର୍ଟଷ୍ଟାଫ୍ମାନଙ୍କର ଦ୍ୱିତୀୟ ରାଉଣ୍ଡ ଟେଷ୍ଟ କରାଯିବ। ପ୍ରସ୍ତାବିତ ଇଂଲଣ୍ଡ ଗସ୍ତ ପାଇଁ ଦକ୍ଷିଣ ଆଫ୍ରିକା ପ୍ରସ୍ତୁତି ଆରମ୍ଭ କରିଛି। ଆସନ୍ତାବର୍ଷ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ବିଶ୍ୱକପ୍ ଆୟୋଜନ ହେବାକୁ ଯାଉଥିବାରୁ ପ୍ରସ୍ତୁତି ନିମନ୍ତେ ଦକ୍ଷିଣ ଆଫ୍ରିକା ଇଂଲଣ୍ଡରେ ସେପ୍ଟେମ୍ବରରେ କେତୋଟି ସୀମିତ ଓଭର ମ୍ୟାଚ୍ ଖେଳିବ।
