କେନ୍ଦୁଝର,୬।୧୨(ନରେଶ ଚନ୍ଦ୍ର ପଟ୍ଟନାୟକ): ଦେଶ ସେବା ପାଇଁ ଯାଇ ବିଭିନ୍ନ ସ୍ଥାନରେ ନିଯୁକ୍ତି ପାଇଥିବାକେନ୍ଦୁଝର ସଦର ବ୍ଳକ ଅଧୀନ ନରସିଂହପୁର, ବନାଯୋଡି, ସିଲିସୁଆଁ ଗ୍ରାମର ୩ଜଣ ଯବାନ ଶନିବାର ପ୍ରଥମଥର ପାଇଁ ଗାଁକୁ ଫେରିଛନ୍ତି। ଏହି ଅବସରରେ ୩ ଯବାନଙ୍କୁ ଗାଁରେ ଭବ୍ୟ ସ୍ବାଗତ କରାଯାଇଛି।
ନୂଆଗାଁ ପଞ୍ଚାୟତ ନରସିଂହପୁର ଗ୍ରାମର ଅନ୍ତର୍ଯ୍ୟାମୀ ହେମ୍ବ୍ରମ(୨୪) ଆସାମରେ ନିଯୁକ୍ତି ପାଇଥିବା ବେଳେ ବନାଯୋଡି ଗ୍ରାମର ହରିଶ୍ଚନ୍ଦ୍ର ବେହେରା(୨୨) ଦିଲ୍ଲୀରେ ନିୟୋଜିତ ଅଛନ୍ତି। ସେହିପରି ସିଲିସୁଆଁ ଗ୍ରାମର ନୀତେଶ କୁମାର ଖଟୁଆ(୨୩) କେରଳରେ ନିଯୁକ୍ତି ପାଇଛନ୍ତି।
ଶନିବାର ୩ ଯବାନ ଯୋଡ଼ା-ବଡବିଲ ଟ୍ରେନରେ ଆସି ଗୋହାଲଡିହି ଷ୍ଟେଶନରେ ପହଞ୍ଚି ଥିଲେ। ପରେ ସେମାନଙ୍କୁ ବନ୍ଧାପଣା କରି ନରସିଂହପୁର ଗାଁ ଛକକୁ ଅଣାଯାଇଥିଲା। ସେଠାରୁ ନାଚ, ଗୀତ ବାଜା, ବାଣ ଫୁଟାଇ ଘରକୁ ପାଛଟି ଆଣାଯାଇଥିଲା। ୩ ଯବାନ ଦେଶ ସେବାରେ ନିୟୋଜିତ ଥିବାରୁ ସାଙ୍ଗସାଥି, ବନ୍ଧୁ, ବାନ୍ଧବ ଗାଁ ଲୋକେ ଉତ୍ସାହିତ ହେବା ସହିତ ଗର୍ବିତ ଅନୁଭବ କରୁଛନ୍ତି। ଦେଶ ସେବା ପାଇଁ ଯାଇଥିବା ବେଳେ ଗାଁକୁ ଆସି ପ୍ରଥମ ଅନୁଭୂତି ସାଙ୍ଗ ସାଥି, ପରିବାର ଲୋକଙ୍କୁ ବାଣ୍ଟିଛନ୍ତି।
