ମୁମ୍ବାଇ,୧୩।୨: ମୁମ୍ବାଇରେ ଥିବା ଗୁଗ୍ଲର କାର୍ଯ୍ୟାଳୟକୁ ବୋମା ପକାଇ ଉଡାଇଦେବାକୁ ଧମକ ମିଳିଛି। ସୋମବାର ଗୁଗ୍ଲର କାର୍ଯ୍ୟାଳୟକୁ ଏକ ଧମକପୂର୍ଣ୍ଣ କଲ ଆସିଥିଲା। କଲ କରୁଥିବା ବ୍ୟକ୍ତି ପୁଣେର ଗୁଗ୍ଲ ଅଫିସରେ ଏକ ବୋମା ରଖାଯାଇଥିବା କହିଥିଲେ। ଗୁଗ୍ଲ ଅଧିକାରୀମାନେ ତୁରନ୍ତ ପୋଲିସକୁ ଏ ବିଷୟରେ ସୂଚନା ଦେଇଥିଲେ ଏବଂ ପୁଣେ ପୋଲିସ ସହିତ ମୁମ୍ବାଇ ପୋଲିସ ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ଧମକ ଦେଉଥିବା ବ୍ୟକ୍ତି ତାଙ୍କ ନାମ ପନ୍ୟମ ଶିବାନନ୍ଦ। ସେ ହାଇଦ୍ରାବାଦରେ ରୁହନ୍ତି ବୋଲି କହିଥିଲେ। ଫୋନ୍ କଲ୍ ଲ୍ୟାଣ୍ଡଲାଇନ ନମ୍ବରକୁ ଆସିଥିଲା। ପୋଲିସ ଏହି ମାମଲା ସହ ଜଡିତ ସମସ୍ତ ସୂଚନା ପୁଣେ ପୋଲିସକୁ ଦେଇଛି।
ପୁଣେ ଗୁଗ୍ଲ ଅଫିସରୁ ପୋଲିସ ଏପର୍ଯ୍ୟନ୍ତ ସନ୍ଦେହଜନକ କିଛି ପାଇନାହିଁ। ସେପଟେ ହାଇଦ୍ରାବାଦରେ ପୋଲିସ କଲରଙ୍କୁ ଗିରଫ କରିଛି। ମୁମ୍ବାଇ ପୋଲିସର ଏକ ଟିମ ମଧ୍ୟ ତେଲେଙ୍ଗାନାରେ ଅଛନ୍ତି ଏବଂ କଲ କରୁଥିବା ବ୍ୟକ୍ତିଙ୍କୁ ମୁମ୍ବାଇକୁ ଆଣିବା ପାଇଁ ପ୍ରସ୍ତୁତି ଚାଲିଛି। ପୋଲିସ ଆଇପିସିର ଧାରା ୫୦୫ (୧) (ବି) ଏବଂ ୫୦୬ (୨) ଅନୁଯାୟୀ କଲ କରୁଥିବା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି।
