ଲକ୍ଷ୍ନୌ,୬ ।୨: ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ଗୋରଖନାଥ ମନ୍ଦିରକୁ ବୋମା ଲଗାଇ ଉଡାଇ ଦେବାକୁ ଧମକ ଦିଆଯାଇଛି । ଶୁକ୍ରବାର ବିଳମ୍ବିତ ରାତିରେ ଏହି ଧମକ ମିଳିବା ପରେ ସବୁଠି ଭୟର ବାତାବରଣ ସୃଷ୍ଟି ହୋଇଛି । ଲେଡି ଡନ ନାମରେ ଥିବା ଏକ ଟୁଇଟର ଆକାଉଣ୍ଟରେ ମିରଠ ସହ ଲକ୍ଷ୍ନୌ ସ୍ଥିତ ବିଧାନସଭାକୁ ଉଡାଇ ଦେବାକୁ ଧମକ ଦିଆଯାଇଛି । ଏହାପରେ ପୋଲିସ ପକ୍ଷରୁ ଗୋରଖନଥ ମନ୍ଦିର ନିକଟରେ ଥିବା ଗାଡି ଗୁଡିକର ଯାଞ୍ଚ କରାଯାଇଛି । ଏହାକୁ ନେଇ ଏକ ମାମଲା ଦାୟର କରାଯିବା ସହ ପୋଲିସ ଯାଞ୍ଚ ଆରମ୍ଭ କରିଦେଇଛି ।
ସୂଚନାଯୋଗ୍ୟ, ଲେଡି ଡନ ନାମକ ଟୁଇଟର ହ୍ୟାଣ୍ଡେଲରୁ ଗୋଟିଏ ପରେ ଗୋଟିଏ ଟୁଇଟ୍ କରାଯାଇଛି । ପ୍ରଥମ ଟୁଇଟରେ ଲେଖାଯାଇଛି ବିଧାନସଭା, ଲକ୍ଷ୍ନୌ ରେଲୱେ ଷ୍ଟେଶନ ଓ ବସଷ୍ଟାଣ୍ଡରେ ବୋମା ଲଗାଇ ଦିଆଯାଇଛି । ଯୋଗୀ ଆଦିତ୍ୟନାଥଙ୍କୁ ବି ହତ୍ୟା କରାଯିବ । ଏକ ଘଣ୍ଟା ପରେ ଭୀମ ସେନାର ଅଧ୍ୟକ୍ଷ ସୀମା ସିଂ ମାନବ ବୋମା ହୋଇ ଯୋଗୀ ଆଦିତ୍ୟନାଥଙ୍କୁ ମାରିବେ । ଶହୀଦ ବୋମା ଲଗାଇ ଦେଇଛନ୍ତି । ଏହାକୁ ଦେଖିବା ପରେ ପୋଲିସର ନିଦ ହଜିଯାଇଛି । ପୁଣିଥରେ ଟୁଇଟ୍ କରାଯାଇଛି କି ଗୋରଖନାଥ ମଠରେ ୮ଟି ସ୍ଥାନରେ ସୁଲେମାନ ଭାଇ ବୋମା ଲଗାଇ ଦେଇଛି । ଏଥିରେ ଯୋଗୀ ଆଦିତ୍ୟନାଥଙ୍କ ଖପୁରି ଉଠିଯିବ । ଟୁଇଟ୍ରେ ପୁଣିଥରେ ସୀମା ସିଂଙ୍କ ନାମ ବ୍ୟବହାର କରାଯାଇଛି । ଏକ ଘଣ୍ଟା ପରେ ପୁଣିଥରେ ଟୁଇଟରେ ଲେଖାଯାଇଛି କି ମିରଠରେ ୧୦ଟି ସ୍ଥାନରେ ବୋମା ଲଗାଇ ଦିଆଯାଇଛି । ପୋଲିସ ତତ୍କ୍ଷଣାତ୍ ଯାଞ୍ଚ କରିଥିଲେ ବି କୌଣସି ଆପତ୍ତିଜନକ ଜିନିଷ ମିଳି ନାହିଁ । ତଥାପି ପୋଲିସ ଯାଞ୍ଚ କାର୍ଯ୍ୟ ଜାରି ରଖିଛି ।
