ନୂଆଦିଲ୍ଲୀ,୧୦ା୪(ପି.ଟି.): ଚଳିତବର୍ଷର ମାର୍ଚ୍ଚ ବିଶ୍ୱରେ ସବୁଠୁ ଉତ୍ତପ୍ତ ମାସ ଭାବେ ଅନୁଭୂତ ହୋଇଛି। ଏଲ୍ ନିନୋ ସ୍ଥିତି ଏବଂ ମାନବକୃତ ଜଳବାୟୁ ପରିବର୍ତ୍ତନର ମିଳିତ ପ୍ରଭାବ ଯୋଗୁ ଗତବର୍ଷର ଜୁନ୍ରୁ କ୍ରମାଗତ ୧୦ ମାସ ତାପମାତ୍ରାରେ ନୂଆ ରେକର୍ଡ ସୃଷ୍ଟି ହୋଇଥିବା ୟୁରୋପୀୟ ସଂଘର ଜଳବାୟୁ ସଂସ୍ଥା କୋପରନିକସ୍ କ୍ଲାଇମେଟ ଚେଞ୍ଜ୍ ସର୍ଭିସ (ସି୩ଏସ୍) ପକ୍ଷରୁ କୁହାଯାଇଛି। ଚଳିତ ମାର୍ଚ୍ଚରେ ହାରାହାରି ତାପମାତ୍ରା ୧୪.୧୪ ଡିଗ୍ରୀ ସେଲ୍ସିୟସ୍ ଥିଲା। ତେବେ ୧୮୫୦ରୁ ୧୯୦୦ ମଧ୍ୟରେ ମାର୍ଚ୍ଚ ମାସଗୁଡ଼ିକର ହାରାହାରି ତାପମାତ୍ରାକୁ ଦେଖିଲେ, ଏହା ତା’ଠାରୁ ୧.୬୮ ଡିଗ୍ରୀ ସେଲ୍ସିୟସ୍ ଅଧିକ। ସେହିପରି ଏଥର ମାର୍ଚ୍ଚର ତାପମାତ୍ରା ୧୯୯୧ରୁ ୨୦୨୦ ମଧ୍ୟରେ ମାର୍ଚ୍ଚ ମାସଗୁଡ଼ିକର ହାରାହାରି ତାପମାତ୍ରାଠାରୁ ଏହା ୦.୭୩ ଡିିଗ୍ରୀ ସେଲ୍ସିୟସ ଅଧିକ ଥିବା ଜଣାପଡ଼ିଛି। ୨୦୧୬ ମାର୍ଚ୍ଚରେ ତାପମାତ୍ରା ସର୍ବାଧିକ ହୋଇଥିବାବେଳେ ଏଥର ମାର୍ଚ୍ଚ ତାକୁ ଟପିଯାଇଛି।
୨୦୨୩ ଏପ୍ରିଲରୁ ୨୦୨୪ ମାର୍ଚ୍ଚ ଗତ ୧୨ ମାସର ବୈଶ୍ୱିକ ହାରାହାରି ତାପମାତ୍ରା ସର୍ବାଧିକ ରେକର୍ଡ ହୋଇଛି, ଯାହା ୧୯୯୧-୨୦୨୦ ହାରାହାରିଠାରୁ ୦.୭୦ ଡିଗ୍ରୀ ସେଲ୍ସିଅସ୍ ଅଧିକ ଏବଂ ୧୮୫୦-୧୯୦୦ର ହାରାହାରି ତାପମାତ୍ରାଠାରୁ ୧.୫୮ ଡିଗ୍ରୀ ସେଲ୍ସିୟସ ବେଶୀ ବୋଲି ଜଳବାୟୁ ସଂସ୍ଥା କହିଛି। ଜାନୁଆରୀରେ ପ୍ରଥମ ଥର ପାଇଁ ସାରା ବର୍ଷରେ ହାରାହାରି ତାପମାତ୍ରା ବୃଦ୍ଧି ଧାର୍ଯ୍ୟ ସୀମା ୧.୫ ଡିଗ୍ରୀ ସେଲ୍ସିଅସ୍ ବଢ଼ିଥିବା ସି୩ଏସ୍ କହିଛି। ଜଳବାୟୁ ପରିବର୍ତ୍ତନର ଖରାପ ପ୍ରଭାବରୁ ମୁକ୍ତି ପାଇବାକୁ ହେଲେ ତାପମାତ୍ରା ବୃଦ୍ଧି ସୀମା ପ୍ରାକ୍ ଶିଳ୍ପ ଯୁଗର ତାପମାତ୍ରାଠାରୁ ୧.୫ ଡିଗ୍ରୀ ସେଲ୍ସିଅସ୍ ମଧ୍ୟରେ ସୀମିତ ରଖିବାକୁ ପ୍ୟାରିସ୍ ଚୁକ୍ତିନାମାରେ ସ୍ଥିର ହୋଇଥିଲା। ଉତ୍ତାପ ବଢ଼ିବା କାରଣରୁ ବିଶ୍ୱବ୍ୟାପୀ ଅନାବୃଷ୍ଟି, ବନାଗ୍ନି ଏବଂ ବନ୍ୟା ଆଦି ପ୍ରାକୃତିକ ଦୁର୍ବିପାକ ବୃଦ୍ଧି ପାଇଛି। ବାୟୁମଣ୍ଡଳରେ ସବୁଜ ଗୃହ ବାଷ୍ପର ଘନତା ବିଶେଷ କରି ଅଙ୍ଗାରକାମ୍ଳ ଏବଂ ମିଥେନ୍ ଦ୍ରୁତ ବୃଦ୍ଧି ଯୋଗୁ ହାରାହାରି ବୈଶ୍ୱିକ ତାପମାତ୍ରା ବଢ଼ିଚାଲିଛି। ଗତ ୧୦ ମାସରେ ଉଭୟ ସ୍ଥଳଭାଗ ଓ ଜଳଭାଗର ତାପମାତ୍ରାରେ ରେକର୍ଡ ବୃଦ୍ଧି ହୋଇଛି।
