ଏକଦା ଯାହାଙ୍କୁ ଢାବା ମାଲିକ ବୋଲି ଭାବୁଥିଲେ ଲୋକେ, ଏବେ ସେ ସବୁଠୁ ଧନୀ ଟିମ୍‌ର ଅଧିନାୟକ

ନୂଆଦିଲ୍ଲୀ,୧୬।୧୨: ଜୀବନରେ କୌଣସି ଉପଲବ୍ଧି ହାସଲ କରିବା ଲାଗି ଭାଗ୍ୟ ଯେତିକି ଗୁରୁତ୍ୱପୂର୍ଣ୍ଣ, ପରିଶ୍ରମ ମଧ୍ୟ ଅନୁରୂପ ଭାବେ ଆବଶ୍ୟକ। କ୍ରିକେଟରେ ଏହାର ଅନେକ ଉଦାହରଣ ଦେଖିବାକୁ ମିଳେ। ମଇଦାନରେ ନିଜ ପ୍ରଦର୍ଶନ ବଳରେ ଖେଳାଳିମାନେ ସଫଳତାର ଶୀର୍ଷକୁ ଛୁଇଁଛନ୍ତି। ଟିମ୍‌ ଇଣ୍ଡିଆର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ସେମାନଙ୍କ ମଧ୍ୟରୁ ଜଣେ। ଗରିବ ପରିବାରରୁ ଆସିଥିବା ହାର୍ଦ୍ଦିକ ଏବେ କ୍ରିକେଟଜଗତର ଏକ ବଡ଼ ନାମ। ଏବେ ସେ କ୍ରିକେଟର ସବୁଠାରୁ ବଡ଼ ଲିଗ୍‌ ଆଇପିଏଲ୍‌ର ଧନୀ ଟିମ୍‌ ମୁମ୍ବାଇ ଇଣ୍ଡିଆନ୍ସର ଅଧିନାୟକ ହୋଇଛନ୍ତି।

ଆଇପିଏଲ୍‌ର ୨ ସବୁଠାରୁ ସଫଳ ଦଳରୁ ଗୋଟିଏ ଥିବା ମୁମ୍ବାଇ ଶୁକ୍ରବାର ବଡ଼ ଘୋଷଣା କରି ସମସ୍ତଙ୍କୁ ଚମକାଇଛି। ଫ୍ରାଞ୍ଚାଇଜ ଗତ ୧୦ ବର୍ଷ ଧରି ଦଳର ଅଧିନାୟକ ଥିବା ରୋହିତ ଶର୍ମାଙ୍କୁ ପଦରୁ ହଟାଇ ହାର୍ଦ୍ଦିକଙ୍କୁ ଦାୟିତ୍ୱ ଦେଇଛି। ଗତ ମାସରେ ମୁମ୍ବାଇ ହାର୍ଦ୍ଦିକଙ୍କୁ ଗୁଜରାଟରୁ ଟ୍ରେଡ୍‌ କରିଥିଲା। ସେବେଠାରୁ ସେ ଦଳର ନେତୃତ୍ୱ ନେଇପାରନ୍ତି ବୋଲି ଚର୍ଚ୍ଚା ହେଉଥିଲା।

ଗତ ୨ ସିଜନରୁ ଗୁଜରାଟ ଟାଇଟନ୍ସର ଅଧିନାୟକ କରିଆସୁଥିଲେ ହାର୍ଦ୍ଦିକ। ନିଜର ବଳିଷ୍ଠ ନେତୃତ୍ୱ ବଳରେ ସେ ଦଳକୁ ଡେବ୍ୟୁ ସିଜନରେ ବିଜେତା କରାଇଥିଲେ। ଏପରିକି ୨୦୨୩ରେ ଦଳ ଫାଇନାଲରେ ପ୍ରବେଶ କରି ରନର୍ସ ଅପ୍‌ ହୋଇଥିଲା। ତେବେ ହାର୍ଦ୍ଦିକଙ୍କ ଜୀବନ ଯାତ୍ରା ଦେଖିଲେ ଏଯାଏ ପହଞ୍ଚିବାର ରାସ୍ତା ତାଙ୍କପାଇଁ ସହଜ ନ ଥିଲା।

ବଡୋଦାରୁ ଆସିଥିବା ହାର୍ଦ୍ଦିକ ଏବଂ ତାଙ୍କ ଭାଇ କୃଣାଳ ଅତି ଗରିବ ପରିବାରରୁ ଆସିଛନ୍ତି। ପାଠପଢ଼ାରେ ଦୁହେଁ ସେତେଟା ଭଲ ନ ଥିଲେ। କେବଳ କ୍ରିକେଟ ହିଁ ସେମାନଙ୍କ ପାଇଁ ସବୁକିଛି ଥିଲା। ୫୦୦ ଟଙ୍କା ଲାଗି ସେ ଗୋଟିଏ ସ୍ଥାନରୁ ଆଉ ଏକ ସ୍ଥାନକୁ ଖେଳିବା ଲାଗି ଯାଉଥିଲେ। କେବଳ ଏତିକି ନୁହେଁ, ନିଜର କଳା ରଙ୍ଗ ଯୋଗୁ ତାଙ୍କୁ ସମାଲୋଚନାର ଶିକାର ହେବାକୁ ପଡ଼ୁଥିଲା।

କିଛି ବର୍ଷ ପୂର୍ବେ ହାର୍ଦ୍ଦିକ ଏକ ସାକ୍ଷାତକାରରେ କହିଥିଲେ ଯେ ପିଲାଦିନେ ତାଙ୍କୁ ନିଜ ଚୁଟିରେ ରଙ୍ଗ ଲଗାଇବାକୁ ପସନ୍ଦ ଥିଲା। ସେଥିଲାଗି ମା’ ତାଙ୍କୁ ପାଟି କରୁଥିଲେ। ତଥାପି ସେ ନିଜର ସଉକ ପୂରଣ କରିବା ଲାଗି ସବୁକିଛି କରୁଥିଲେ। କଳା ରଙ୍ଗ ଏବଂ ରଙ୍ଗୀନ ଚୁଟି ଯୋଗୁ ତାଙ୍କୁ କେହି କେହି ଢ଼ାବାରେ ମାଲିକ ବୋଲି ଭାବୁଥିଲେ। ଏଣୁ ଭୟରେ ସେ ନିଜ ମା’ଙ୍କୁ ନନେଇ କୌଣସି ଢ଼ାବାକୁ ଯାଉ ନ ଥିଲେ।

ପିଲାଦିନ ଅତି ସଂଘର୍ଷରେ ବିତିଥିଲେ ହେଁ କ୍ରିକେଟ ଲାଗି ତାଙ୍କର ଭଲପାଇବା କମ୍‌ ହୋଇ ନ ଥିଲା। ୨୦୧୫ରେ ମୁମ୍ବାଇ ତାଙ୍କୁ ସୁଯୋଗ ଦେଇଥିଲା। ସେବେଠାରୁ ତାଙ୍କ ଭାଗ୍ୟ ପରିବର୍ତ୍ତନ ହେବା ଆରମ୍ଭ ହୋଇଥିଲା। ଧିରେଧିରେ ସେ ନିଜର ଖେଳକୁ ନେଇ ପ୍ରଶଂସକଙ୍କ ଗହଣରେ ପରିଚିତ ହୋଇଥିଲେ। ମୋଟା ଅଙ୍କର ରୋଜଗାର ମଧ୍ୟ କରି ବିଳାସମୟ ଜୀବନଯାପନ କରୁଛନ୍ତି।

୨୦୨୧ ଯାଏ ହାର୍ଦ୍ଦକ ମୁମ୍ବାଇ ଟିମ୍‌ରେ ଖେଳାଳି ଭାବେ ରହିଥିଲେ। ହେଲେ ୨୦୨୨ ସିଜନ ଲାଗି ତାଙ୍କୁ ଅଧିନାୟକ ଭାବେ ନିଯୁକ୍ତ କରିଥିଲା ଗୁଜରାଟ ଟିମ୍‌। ଏବେ ୨୦୨୪ ଆଇପିଏଲ୍‌ ପୂର୍ବରୁ ହାର୍ଦ୍ଦିକ ପୁଣି ନିଜ ଟିମ୍‌କୁ ଫେରିଥିଲେ। ନଭେମ୍ବର ୨୭ରେ ଏନେଇ ଘୋଷଣା ହେବା ପରେ ହାର୍ଦ୍ଦିକଙ୍କୁ ଅଧିନାୟକ ପଦ ମିଳିପାରେ ବୋଲି ଚର୍ଚ୍ଚା ହେଉଥିଲା। ଏବେ ତାହା ସତ ହୋଇଛି। ସେ ଆଇପିଏଲ୍‌ର ସବୁଠାରୁ ଧନୀ ଟିମ୍‌(୭୨୫ କୋଟି ବ୍ରାଣ୍ଡ ମୂଲ୍ୟ)ର ନେତୃତ୍ୱ ନେବେ। ୩ ବର୍ଷ ଧରି ଟିମ୍‌ ଟୁର୍ନାମେଣ୍ଟ ଜିତି ପାରି ନ ଥିବା ବେଳେ ଏବେ ସେ କିଭଳି ନେତୃତ୍ୱ ନେଉଛନ୍ତି ତାହା ଦେଖିବାକୁ ବାକି ରହିଲା।