ପେନ୍ସିଲଭାନିଆ, ୩ା୧୧:ଅଧିକାଂଶ ଲୋକଙ୍କ ପାଇଁ ଦିନକରେ ୩ଟି ଚଳଚ୍ଚିତ୍ର ଦେଖିବା ଏକ ବଡ଼ ମାରାଥନ ହେବ। ମାତ୍ର ଗ୍ଲେନୱୁଡ ହୋସ୍କିନ ଜୁନିଅରଙ୍କ ନିମନ୍ତେ ଏହା ସମ୍ପୂର୍ଣ୍ଣ ଏକ ବର୍ଷ ପାଇଁ ତାଙ୍କର ଦୈନିକ ଦିନଚର୍ଯ୍ୟାର ଏକ ଅଂଶ ପାଲଟିଯାଇଥିଲା। ପେନ୍ସିଲଭାନିଆର ଏହି ୬୦ ବର୍ଷୀୟ ଆମେରିକୀୟ ନାଗରିକ ଗିନିଜ୍ ୱାଲର୍ଡ ରେକର୍ଡ ସ୍ଥାପନ କରିବା ପାଇଁ ୧୨ ମାସ ମଧ୍ୟରେ ସିନେମା ହଲରେ ୧,୨୦୭ଟି ଚଳଚ୍ଚିତ୍ର ଦେଖିଛନ୍ତି, ଯାହା ଦୈନିକ ହାରାହାରି ୩.୩ ଚଳଚ୍ଚିତ୍ର ଅଟେ। ଗିନିଜ ୱାଲର୍ଡ ରେକର୍ଡସର ସରକାରୀ ୱେବ୍ସାଇଟ ଅନୁଯାୟୀ ହୋସ୍କିନ ଏପ୍ରିଲ ୨୦୨୪ ରୁ ଏପ୍ରିଲ ୨୦୨୫ ମଧ୍ୟରେ ପେନ୍ସିଲଭାନିଆର ୟର୍କ ହାଭେନରେ ଥିବା ତାଙ୍କର ସ୍ଥାନୀୟ ରେଗାଲ ସିନେମା ହଲ୍ରେ ଏହି ଚଳଚ୍ଚିତ୍ରଗୁଡ଼ିକ ଦେଖିଥିଲେ। ତାଙ୍କର ଏହି ସମୁଦାୟ ସଂଖ୍ୟା ଅନ୍ୟ ଜଣେ ଆମେରିକୀୟ ଜାକାରିଆ ସୱୋଫଙ୍କ ପୂର୍ବ ରେକର୍ଡ (୭୭୭ଟି ଫିଲ୍ମ)କୁ ଭାଙ୍ଗିଦେଇଛି, ଯିଏ କି ୨୦୨୩ରେ ଏହା ହାସଲ କରିଥିଲେ।
ଏହି ରେକର୍ଡ କରିବା ପାଇଁ କେବଳ ଚଳଚ୍ଚିତ୍ର ପ୍ରତି ଭଲପାଇବା ଯଥେଷ୍ଟ ନ ଥିଲା। ହୋସ୍କିନଙ୍କୁ ସିନେମାର ସମୟସୂଚୀ ଅନୁଯାୟୀ ନିଜ ଦିନର ଯୋଜନା କରିବାକୁ ପଡ଼ୁଥିଲା, ଏମିତି ଶୋ’ ବାଛିବାକୁ ପଡ଼ୁଥିଲା ଯାହାଦ୍ୱାରା ସେ ଯଥାସମ୍ଭବ ଅଧିକ ଚଳଚ୍ଚିତ୍ର ଦେଖିପାରିବେ ଏବଂ ତାଙ୍କୁ ଥିଏଟରରେ ଦୀର୍ଘ ସମୟ ବିତାଇବାକୁ ପଡ଼ୁଥିଲା। ଅନେକ ଦିନ ସେ ସକାଳୁ ଶୀଘ୍ର ପହଞ୍ଚୁଥିଲେ ଏବଂ ମଧ୍ୟରାତ୍ରି ପର୍ଯ୍ୟନ୍ତ ରହୁଥିଲେ। ହୋସ୍କିନ କହିଛନ୍ତି, ସେ ଗିନିଜ୍ ୱାଲର୍ଡ ରେକର୍ଡସ ୱେବ୍ସାଇଟ ବ୍ରାଉଜ କରୁଥିବା ସମୟରେ ଏହି ରେକର୍ଡ ବର୍ଗ ବିଷୟରେ ଜାଣିବାକୁ ପାଇଥିଲେ। ସେ ସିନେମା ସହ ଜଡ଼ିତ ଦୁଇଟି ରେକର୍ଡ ଦେଖିବାକୁ ପାଇଲେ: ଗୋଟିଏ ଚଳଚ୍ଚିତ୍ରର ସବୁଠାରୁ ଅଧିକ ଶୋ’ରେ ଯୋଗଦେବା ଏବଂ ଏକ ବର୍ଷ ମଧ୍ୟରେ ସିନେମା ହଲରେ ସବୁଠାରୁ ଅଧିକ ଚଳଚ୍ଚିତ୍ର ଦେଖିବା।
ପ୍ରତିଦିନ ଅନେକ ଚଳଚ୍ଚିତ୍ର ଦେଖିବା ବ୍ୟୟବହୁଳ ହୋଇପାରିଥାନ୍ତା, ମାତ୍ର ହୋସ୍କିନଙ୍କ ପାଖରେ ଖର୍ଚ୍ଚ ପରିଚାଳନା କରିବାର ଏକ ଉପାୟ ଥିଲା। ସେ ଏକ ‘ରେଗାଲ ଅନଲିମିଟେଡ୍’ ସଦସ୍ୟତା ବ୍ୟବହାର କରୁଥିଲେ, ଯାହାର ମୂଲ୍ୟ ପ୍ରତିମାସରେ ପ୍ରାୟ ୨୮ ଡଲାର ଥିଲା। ଫଳରେ ସେ ସଂଶ୍ଳିଷ୍ଟ ସିନେମା ହଲଗୁଡ଼ିକରେ ଅସୀମିତ ସଂଖ୍ୟକ ଚଳଚ୍ଚିତ୍ର ଦେଖିପାରୁଥିଲେ।
ସେ ଥିଏଟରରେ ପ୍ରତ୍ୟେକ ସମୟର ଖାଦ୍ୟ କିଣିବା ପରିବର୍ତ୍ତେ ଘରୁ ପ୍ରସ୍ତୁତ ଖାଦ୍ୟ ସାଙ୍ଗରେ ନେଉଥିଲେ ଏବଂ ଶୋ’ ମଧ୍ୟବର୍ତ୍ତୀ ସମୟରେ ତାହା ଖାଉଥିଲେ। ସେ ସାରାଦିନ ନିଜ ସିଟରେ ବସି ରହୁ ନ ଥିଲେ। ହୋସ୍କିନ ଚଳଚ୍ଚିତ୍ରଗୁଡ଼ିକ ମଧ୍ୟରେ ସିନେମା ହଲ ଭିତରେ ଏବଂ ବାହାରେ ଚାଲୁଥିଲେ। ସେ ଏହି ବିରତିଗୁଡ଼ିକୁ ନିଜର ଦୈନିକ ବ୍ୟାୟାମ ଭାବରେ ବ୍ୟବହାର କରୁଥିଲେ। ୧,୨୦୦ ରୁ ଅଧିକ ଚଳଚ୍ଚିତ୍ର ଦେଖିବା ସତ୍ତ୍ୱେ ହୋସ୍କିନ କୌଣସିଟିକୁ ନାପସନ୍ଦ କରନ୍ତି ବୋଲି କହିନାହାନ୍ତି। ଆନିମେଟେଡ ଚଳଚ୍ଚିତ୍ରଗୁଡ଼ିକ ତାଙ୍କର ସବୁଠାରୁ ପ୍ରିୟ ଥିଲା, କାରଣ ସେଗୁଡ଼ିକ ପ୍ରାୟତଃ ଛୋଟ ଥାଏ ଏବଂ ତାଙ୍କ ସମୟସୂଚୀରେ ସହଜରେ ଫିଟ ହୋଇଯାଏ।