ନୂଆଦିଲ୍ଲୀ, ୧୪।୭- ମହାମାରୀ କରୋନା ଭାଇରସ ଲାଗି ବିଶ୍ୱରେ କ୍ରୀଡ଼ା ପ୍ରତିଯୋଗିତା ବିଶେଷ ଭାବେ ପ୍ରଭାବିତ ହୋଇଛି। ଦୀର୍ଘ ୪ ମାସର ବ୍ୟବଧାନ ପରେ ନିକଟରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଟେଷ୍ଟ ସିରିଜ ଆରମ୍ଭ ହୋଇଛି। କରୋନା ସମୟରେ କ୍ରିକେଟ୍ ପ୍ରତିଯୋଗିତା ବନ୍ଦ ରହିଥିବାରୁ ଅମ୍ପାୟରମାନେ ମଧ୍ୟ ଚୌକା, ଛକା, ଆଉଟ୍ ସିଗ୍ନାଲ ଦେବାରୁ ବିରତି ପାଇଥିଲେ। ଏଥିରୁ ବାଦ୍ ପଡ଼ି ନ ଥିଲେ ଆଇସିସି ପ୍ୟାନେଲ ଅମ୍ପାୟର ଅନିଲ ଚୌଧୁରୀ। ଭାରତୀୟ ଅମ୍ପାୟର ଅନିଲ ପଡ଼ିଆରେ ସିନା ସିଗ୍ନାଲ ଦେବାରୁ ବିରତି ପାଇଥିଲେ କିନ୍ତୁ ନିଜ ଗ୍ରାମର ଲୋକଙ୍କ ନିକଟରେ ମୋବାଇଲ୍ ନେଟ୍ଓ୍ବର୍କ ସିଗ୍ନାଲ ପହଞ୍ଚାଇବାରେ ସଫଳ ହୋଇଛନ୍ତି। କରୋନା ଲାଗି ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଖେଳାଯିବାକୁ ଥିବା ଦିନିକିଆ ସିରିଜ ସ୍ଥଗିତ ରଖାଯିବା ପରେ ଅନିଲ ସମୟ ଅତିବାହିତ କରିବା ପାଇଁ ନିଜ ଗ୍ରାମ ଉତ୍ତର ପ୍ରଦେଶର ଶାମଲି ଜିଲା ଅନ୍ତର୍ଗତ ଡାଙ୍ଗରୋଲକୁ ପଳାଇଥିଲେ। ଯାହାକି ଜାତୀୟ ରାଜଧାନୀଠାରୁ ୮୦ କିଲୋମିଟର ଦୂର। ଗ୍ରାମରେ ପହଞ୍ଚତ୍ବା ପରେ ଅନିଲ ଏକ ବଡ଼ ସମସ୍ୟାର ସମ୍ମୁଖୀନ ହୋଇଥିଲେ। ଗ୍ରାମକୁ ମୋବାଇଲ ଟାଓ୍ବାର ଆସୁ ନ ଥିବାରୁ ସେ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲେ। ଏପରିକି ଆଇସିସିର କେତେକ କର୍ମଶାଳାରେ ମଧ୍ୟ ଯୋଗ ଦେଇପାରି ନ ଥିଲେ। ଗ୍ରାମବାସୀମାନେ ବଡ଼ ବଡ଼ ଗଛରେ ଚଢ଼ି କଥା ହେଉଥିବାର ଅନିଲ ଦେଖିବାକୁ ପାଇଲେ। ଯାହା ତାଙ୍କୁ ଅଧିକ ବିସ୍ମିତ କରିଥିଲା। ଏହି ସମସ୍ୟାକୁ ଅନିଲ ଏକ ଖବର ସରବରାହ ସଂସ୍ଥାକୁ ଜଣାଇଥିଲେ। ଏହା ଜଣାପଡ଼ିବା ପରେ ଏକ ଟେଲିକମ୍ କମ୍ପାନୀ ତାଙ୍କ ସହ ଯୋଗାଯୋଗ କରି ଗ୍ରାମରେ ମୋବାଇଲ୍ ଟାଓ୍ବାର ସ୍ଥାପନ କରିବା ନେଇ ପ୍ରତିଶ୍ରୁତି ଦେଇଥିଲା। ଶେଷର କମ୍ପାନୀ ଏହାର ପ୍ରତିଶ୍ରୁତି ରକ୍ଷା କରି ଅନିଲଙ୍କ ଗ୍ରାମରେ ମୋବାଇଲ ଟାଓ୍ବାର ସ୍ଥାପନ କରିଛି। ଫଳରେ ଗ୍ରାମବାସୀଙ୍କ ବହୁ ବର୍ଷର ସମସ୍ୟା ଅନିଲ ସମାଧାନ କରିପାରିଛନ୍ତି। ଅନିଲ ଏହି ଅବସରରେ କହିଛନ୍ତି, ‘ମୁଁ ବହୁତ ଖୁସି ଯେ ଗ୍ରାମବାସୀମାନେ ବର୍ତ୍ତମାନ ନିରବଚ୍ଛିନ୍ନ ଭାବେ ମୋବାଇଲରେ କଥା ହୋଇପାରିବେ। ସେହିଭଳି ଯେଉଁ ପିଲାମାନେ ଏକାଡେମୀ କାର୍ଯ୍ୟ ପାଇଁ ମୋବାଇଲ ବ୍ୟବହାର କରନ୍ତି ସେମାନେ ମଧ୍ୟ ଏହାର ସୁବିଧା ପାଇପାରିବେ।’
