ଭାରତର ବିଭିନ୍ନ ସହର ଅଧୀନ ବସ୍ତିରେ ରହୁଥିବା ପିଲାମାନେ ଶିକ୍ଷାରୁ ବଞ୍ଚତ୍ତ ହେଉଛନ୍ତି। ସେମାନେ ପ୍ରାୟତଃ ଶ୍ରମିକ ଶ୍ରେଣୀ ପରିବାରର ହୋଇଥିବାରୁ ସେମାନଙ୍କ ଶିକ୍ଷା ଉପରେ ମାତାପିତା ସେତେଟା ଗୁରୁତ୍ୱ ଦେଇପାରନ୍ତିନାହିଁ। ଅନେକ ପିଲା ଅଧାରୁ ପାଠ ଛାଡ଼ି ଶିଶୁ ଶ୍ରମିକ ଭାବେ କାମ କରନ୍ତି। ରାଜସ୍ଥାନର ଜୟପୁର ସହରର ବସ୍ତିଗୁଡ଼ିକରେ ଏଭଳି ଅନେକ ପିଲା ରହିଛନ୍ତି, ଯେଉଁମାନଙ୍କ ଶିକ୍ଷାର ଆବଶ୍ୟକତାକୁ ଉପଲବ୍ଧିକରି ରାମ ରାଇକା ଓ ରାହୁଲ ସିଂ ସେମାନଙ୍କୁ ମାଗଣାରେ ପଢ଼ାଉଛନ୍ତି। ରାମ ଓ ରାହୁଲ ଉଭୟ ପେସାରେ ଇଞ୍ଜିନିୟର। ସେମାନେ ଦିନବେଳା ଡ୍ୟୁଟି ସାରିବାପରେ ସନ୍ଧ୍ୟା ସମୟରେ ରାସ୍ତାକଡ଼ରେ ସେହି ପିଲାମାନଙ୍କୁ ପଢ଼ାଉଛନ୍ତି। ରାମ ଓ ରାହୁଲ ‘ଅନ୍ଷ୍ଟପେବଲ୍-୨୦’ ନାମରେ ଏକ ସଂସ୍ଥା ଗଠନ କରି ତା’ ମାଧ୍ୟରେ ଏହି ଶିକ୍ଷାଦାନ ବ୍ୟବସ୍ଥାକୁ ଗତିଶୀଳ କରିଛନ୍ତି। ଏହି ଦୁଇଜଣ ପ୍ରଥମେ ୭ ପିଲାଙ୍କୁ ପଢ଼ାଇବା ଆରମ୍ଭ କରିଥିଲେ। ହେଲେ ଏବେ ୫୦୦ ପିଲା ମାଗଣାରେ ପଢୁଛନ୍ତି। ଜୟପୁର ସହରର ୨୦ଟି କେନ୍ଦ୍ରରେ ଏହି ପିଲାମାନେ ପଢୁଛନ୍ତି। ୭୦ରୁ ଊର୍ଦ୍ଧ୍ୱ ସ୍ବେଚ୍ଛାସେବୀ ଏବଂ ୨୫ରୁ ଅଧିକ ଶିକ୍ଷକ ଏହି ଇଞ୍ଜିନିୟରଦ୍ୱୟଙ୍କୁ ଏପରି ଏକ ମହାନ୍ କାର୍ଯ୍ୟରେ ସହଯୋଗ କରୁଛନ୍ତି।