ଚଣ୍ଡିଗଡ଼,୧୩।୧୦: ଭାରତୀୟ କ୍ରିକେଟ ଦଳରୁ ଦୀର୍ଘଦିନ ଧରି ବାହାରେ ଥିବା ଅଭିଜ୍ଞ ଦ୍ରୁତ ବୋଲର ଉମେଶ ଯାଦବ ରଣଜୀ ଟ୍ରଫି ୨୦୨୬-୨୭ ସରିଜ୍ରେ ଜବରଦସ୍ତ ଆରମ୍ଭ କରିଛନ୍ତି। ବିଦର୍ଭ ସହ ପ୍ରାୟ ୧୮ ବର୍ଷର ସମ୍ପର୍କ ଶେଷ କରି ପଞ୍ଜାବ ଦଳରେ ସାମିଲ ହୋଇଥିବା ଉମେଶ ନିଜର ପ୍ରଥମ ମ୍ୟାଚ୍ରେ ହିଁ ୫ ଉଇକେଟ ନେଇ ଚର୍ଚ୍ଚାକୁ ଆସିଛନ୍ତି। ନ୍ୟୁ ଚଣ୍ଡିଗଡ଼ରେ ଆସାମ ବିପକ୍ଷରେ ଚାଲିଥିବା ଏଲିଟ ଗ୍ରୁପ-ବି ମ୍ୟାଚ୍ରେ ଦ୍ୱିତୀୟ ଦିନରେ ସେ ନିଜ ବୋଲିଂରେ ପ୍ରତିପକ୍ଷ ବ୍ୟାଟର୍ଙ୍କୁ ଅଡ଼ୁଆରେ ପକାଇଥିଲେ।
ଆସାମ ବିପକ୍ଷରେ ଯୁବ ଦ୍ରୁତ ବୋଲର ଗୁରନୂର ବରାଡ଼ଙ୍କ ସହ ନୂଆ ବଲ୍ରେ ବୋଲିଂ ଆରମ୍ଭ କରିଥିଲେ ଉମେଶ ଯାଦବ। ଆରମ୍ଭରୁ ହିଁ ସେ ଆକ୍ରମଣାତ୍ମକ ଲାଇନ ଓ ଲେନ୍ଥରେ ବୋଲିଂ କରି ଆସାମ ବ୍ୟାଟରଙ୍କ ଉପରେ ଚାପ ସୃଷ୍ଟି କରିଥିଲେ। ୨୪ ଓଭର ବୋଲିଂ କରି ୭୦ ରନ ବ୍ୟୟରେ ୫ଟି ଉଇକେଟ ହାସଲ କରିଥିଲେ। ଏହା ସହ ଫାର୍ଷ୍ଟ କ୍ଲାସ କ୍ରିକେଟ୍ରେ ନିଜର ୧୬ତମ ପାଞ୍ଚ ଉଇକେଟ ସଫଳତା ହାସଲ କରିଛନ୍ତି।
ଆସାମର ଓପନର୍ ଋଷଭ ଦାସଙ୍କୁ ମାତ୍ର ୧୧ଟି ବଲ୍ରେ ଖାତା ଖୋଲିବାକୁ ନଦେଇ ବୋଲ୍ଡ କରି ଉମେଶ ପ୍ରଥମ ସଫଳତା ପାଇଥିଲେ। ପରେ ରାଜବୀର ସିଂହଙ୍କୁ ମାତ୍ର ୧୧ ରନ୍ରେ ଆଉଟ କରି ଆସାମ ଉପରେ ଚାପ ବଢ଼ାଇଥିଲେ। ପାଳିର ନିମ୍ନକ୍ରମରେ ମଧ୍ୟ ଉମେଶଙ୍କ ଘାତକ ବୋଲିଂ ଜାରି ରହିଥିଲା। ସେ ଅମ୍ଲାନଜ୍ୟୋତି ଦାସ, ମୁଖତାର ହୁସେନ ଓ ମୋହିତ ଠାକୁରଙ୍କୁ ଆଉଟ କରିଥିଲେ। ତାଙ୍କର ୫ଟି ଉଇକେଟ ମଧ୍ୟରୁ ୩ଟି ଉଇକେଟ ସିଧାସଳଖ ଷ୍ଟମ୍ପ ଉଡ଼ାଇ ଆସିଥିଲା। ଉମେଶଙ୍କ ଏହି ପ୍ରଦର୍ଶନ ତାଙ୍କ ଅଭିଜ୍ଞତା ଓ ଉଇକେଟ ନେବାର କ୍ଷମତାକୁ ପୁଣିଥରେ ପ୍ରମାଣିତ କରିଛି। ତାଙ୍କ ବୋଲିଂ ସତ୍ତ୍ୱେ ଆସାମ ଦଳ ପ୍ରଥମ ପାଳିରେ ୧୧୭ ଓଭର ଖେଳି ୩୭୩ ରନ କରିଥିଲା।
ଘରୋଇ କ୍ରିକେଟ୍ରେ ବିଦର୍ଭ ସହ ଦୀର୍ଘ ସମୟ ଧରି ଜଡ଼ିତ ଥିବା ଉମେଶ ଯାଦବଙ୍କ ଦଳ ପରିବର୍ତ୍ତନ ଚର୍ଚ୍ଚାର ବିଷୟ ହୋଇଥିଲା। ୧୨୪ଟି ଫାର୍ଷ୍ଟ କ୍ଲାସ ମ୍ୟାଚ୍ର ଅଭିଜ୍ଞତା ରଖିଥିବା ଏହି ଦ୍ରୁତ ବୋଲର ନୂଆ ଦଳ ସହ ଖେଳିବା ପଛର କାରଣ ମଧ୍ୟ ସ୍ପଷ୍ଟ କରିଥିଲେ।
ଉମେଶଙ୍କ କହିବା ଅନୁଯାୟୀ, ସେ ଘରୋଇ କ୍ରିକେଟ୍ରେ ଏକ ଶକ୍ତିଶାଳୀ ଦଳର ଅଂଶ ହେବାକୁ ଚାହୁଁଥିଲେ। ପଞ୍ଜାବ ଭଲ ପ୍ରଦର୍ଶନ କରୁଛି ଏବଂ ଉଚ୍ଚମାନର କ୍ରିକେଟ ଖେଳୁଛି। ବିଦର୍ଭ ଛାଡ଼ିବା ପରେ ତାଙ୍କୁ କେବଳ ଛୋଟ ଦଳରେ ଖେଳିବାର ସୁଯୋଗ ମିଳିବ ବୋଲି ଚର୍ଚ୍ଚା ହୋଇଥିଲା। କିନ୍ତୁ ସେ ଏକ ଶକ୍ତିଶାଳୀ ଓ ଭଲ ପ୍ରଦର୍ଶନ କରୁଥିବା ଦଳକୁ ବାଛିବାକୁ ନିଷ୍ପତ୍ତି ନେଇଥିଲେ।
ନୂଆ ଦଳ ପାଇଁ ପ୍ରଥମ ମ୍ୟାଚ୍ରେ ହିଁ ପାଞ୍ଚ ଉଇକେଟ ନେଇ ଉମେଶ ଯାଦବ ନିଜ ଅଭିଯାନକୁ ସ୍ମରଣୀୟ କରିଛନ୍ତି। ତାଙ୍କର ଏହି ପ୍ରଦର୍ଶନ ପଞ୍ଜାବ ଦଳ ପାଇଁ ଉତ୍ସାହଜନକ।