ଆଇପିଏଲ୍ ମଝିରେ ନିଜ ନାଁ ପରିବର୍ତ୍ତନ କରିଦେଲେ ଏହି କ୍ରିକେଟର୍: ପଛରେ ରହିଛି ଏମିତି କାରଣ
07 ଲଣ୍ଡନ,୧।୪: ଇଂଲଣ୍ଡ ଅଧିନାୟକ ତଥା ଆଇପିଏଲରେ ରାଜସ୍ଥାନ ରୟାଲ୍ସର ଏକ ଅଂଶ ଥିବା ଜୋସ ବଟଲର ଆନୁଷ୍ଠାନିକ ଭାବରେ ତାଙ୍କ ନାମ ପରିବର୍ତ୍ତନ କରିଛନ୍ତି। ସେ ତାଙ୍କ ନାମ ଜୋସ (Jos)ରୁ ଜୋଶ (Josh)କୁ ପରିବର୍ତ୍ତନ କରିବାକୁ ସ୍ଥିର କରିଛନ୍ତି। ବର୍ତ୍ତମାନ ଏହିପରି ଭାବରେ ଇଂଲଣ୍ଡର ସୀମିତ ଓଭର ଦଳର ଅଧିନାୟକ ଜୋଶ ବଟଲର ଭାବରେ ଜଣାଶୁଣା ହେବେ। ଇଂଲଣ୍ଡ କ୍ରିକେଟ ବୋର୍ଡ ଏହାର ସୋସିଆଲ ମିଡିଆ ଆକାଉଣ୍ଟରୁ ଏହି ଭିଡିଓ ଷେୟାର କରିଛି। ଏହି ଭିଡିଓରେ ଜୋଶ ବଟଲର ବ୍ୟାଖ୍ୟା କରିଛନ୍ତି ଯେ, ସେ କାହିଁକି ତାଙ୍କ ନାମ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି।
ଜୋଶ ବଟଲର ଭିଡିଓରେ କହୁଛନ୍ତି ଯେ ତାଙ୍କୁ ସାରା ଜୀବନ ଭୁଲରେ ‘ଜୋସ’ କୁହାଯାଉଛି। ଯଦିଓ ୩୦ ବର୍ଷରୁ ଅଧିକ ସମୟ ପାଇଁ ଏହାର ଉନ୍ନତି ପାଇଁ ପ୍ରୟାସ କରାଯାଇଥିଲା, କିନ୍ତୁ ତାହା ହୋଇପାରିଲା ନାହିଁ । ତେଣୁ ବର୍ତ୍ତମାନ ନାମକୁ ଆନୁଷ୍ଠାନିକ ଭାବେ ପରିବର୍ତ୍ତନ କରିବାକୁ ନିଷ୍ପତ୍ତି ନିଆଯାଇଛି। ଏହି ଭିଡିଓରେ ସେ କହୁଛନ୍ତି ଯେ, ମୁଁ ଜୋଶ ବଟଲର, ଇଂଲଣ୍ଡ ସୀମିତ ଓଭର ଦଳର ଅଧିନାୟକ, କିନ୍ତୁ ମୋତେ ସାରା ଜୀବନ ଭୁଲ ନାମରେ ଡକାଯାଇଛି।
ଜୋସ ବଟଲର୍ ଭିଡିଓରେ ଆହୁରି ମଧ୍ୟ କହିଛନ୍ତି, ରାସ୍ତାରେ ଥିବା ଲୋକଙ୍କ ଠାରୁ ମୋ ମା ପର୍ଯ୍ୟନ୍ତ, ମୋର ଜନ୍ମଦିନ କାର୍ଡରେ … ‘ଜୋସ’ ସବୁଆଡେ ବ୍ୟବହୃତ ହେଉଥିଲା। ମୁଁ ୧୩ ବର୍ଷ ପାଇଁ ମୋ ଦେଶକୁ ପ୍ରତିନିଧିତ୍ୱ କରିଥିଲି, ୨ଟି ବିଶ୍ୱକପ ଜିତିଥିଲି, କିନ୍ତୁ ବର୍ତ୍ତମାନ ସମୟ ଆସିଛି ମୋ ନାମରେ ଆବଶ୍ୟକୀୟ ପରିବର୍ତ୍ତନ ଆଣିବା ପାଇଁ … ତେଣୁ, ମୁଁ ବର୍ତ୍ତମାନ ଆନୁଷ୍ଠାନିକ ଭାବରେ ମୋର ନାମ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛି। ବର୍ତ୍ତମାନ ମୁଁ ଆନୁଷ୍ଠାନିକ ଭାବରେ ଜୋଶ ବଟଲର।