ବ୍ରାସିଲିଆ:ଗିନିଜ ୱାଲର୍ଡ ରେକର୍ଡସ୍ ସଂଗଠନ କ୍ରମାଗତ ବିଭିନ୍ନ ଉଲ୍ଲେଖନୀୟ ମାନବୀୟ ସଫଳତାକୁ ସ୍ବୀକୃତି ଦେଇଥାଏ। ନିକଟରେ ଏହା ବ୍ରାଜିଲର ଏକ ଦମ୍ପତିଙ୍କୁ ବିଶ୍ୱର ସବୁଠାରୁ କମ୍ ଉଚ୍ଚତା ବିଶିଷ୍ଟ ଦମ୍ପତି ଆଖ୍ୟା ପ୍ରଦାନ କରିଛି, ଯାହା ଅନେକ ସୋସିଆଲ ମିଡିଆ ୟୁଜର୍ସଙ୍କର ଦୃଷ୍ଟି ଆକର୍ଷଣ କରିପାରିଛି।
୧୭ ସେପ୍ଟେମ୍ବର ୨୦୧୬ରେ ବିବାହ କରିଥିବା ବ୍ରାଜିଲର ୩୧ ବର୍ଷୀୟ ପାଓଲୋ ଗାବ୍ରିଏଲ୍ ଦା ସିଲ୍ଭା ବାରୋସ ଓ ତାଙ୍କ ସ୍ତ୍ରୀ କଟ୍ୟୁସିଆ ଲି ହୋଶିନୋ(୨୮) ବିଶ୍ୱର ସବୁଠାରୁ କମ୍ ଉଚ୍ଚତା ବିଶିଷ୍ଟ ଦମ୍ପତି ଭାବେ ମାନ୍ୟତା ପାଇଛନ୍ତି। ଗାବ୍ରିଏଲଙ୍କ ଉଚ୍ଚତା ୯୦.୨୮ ସେମି(ପ୍ରାୟ ୨.୯୬ଫୁଟ୍) ହୋଇଥିବା ବେଳେ ତାଙ୍କ ସ୍ତ୍ରୀ କଟ୍ୟୁସିଆଙ୍କ ଉଚ୍ଚତା ୯୧.୧୩ ସେମି(ପ୍ରାୟ ୨.୯୯ ଫୁଟ୍) ରହିଛି। ଏହି ଦମ୍ପତିଙ୍କର ମିଳିତ ଉଚ୍ଚତା ୧୮୧.୪୧ ସେମି ରହିଛି, ଯାହା ଏକ ବିଶ୍ୱ ରେକର୍ଡ ହୋଇଥିବା ଗିନିଜ ୱାଲର୍ଡ ରେକର୍ଡସ ପକ୍ଷରୁ କୁହାଯାଇଛି।
ପ୍ରଥମଥର ପାଇଁ ୨୦୦୬ରେ ଭର୍ଚୁଆଲ୍ ଯୋଗେ ଉଭୟ ଗାବ୍ରିଏଲ୍ ଓ କଟ୍ୟୁସିଆ ପରସ୍ପରକୁ ଜାଣିବାକୁ ପାଇଥିଲେ। ଗିନିଜ ରେକର୍ଡସ୍ରେ ସ୍ଥାନ ପାଇ ଗାବ୍ରିଏଲ୍ କହିଛନ୍ତି, ” ଆମେ ଉଚ୍ଚତାରେ ଛୋଟ ହୋଇପାରୁ, କିନ୍ତୁ ଆମର ହୃଦୟ ବଡ଼ ଏବଂ ଆମେ ପରସ୍ପରକୁ ବହୁତ୍ତ ଭଲ ପାଉ। ଆମ ଜୀବନରେ ଅନେକ ସମସ୍ୟା ଥିଲେ ମଧ୍ୟ ମୁଁ ଏବଂ କଟ୍ୟୁସିଆ ଖୁସିର ସହ ଏସବୁକୁ ଏକାଠି ମିଶି ସାମ୍ନା କରୁ “। ସାମାଜିକ ଚାପର ସମ୍ମୁଖୀନ ହେବା ପରିବର୍ତ୍ତେ ଉଭୟେ ଗାବ୍ରିଏଲ୍ ଓ କଟ୍ୟୁସିଆ ନିଜ ନିଜର ଶାରୀରିକ ଗୁଣକୁ ଗ୍ରହଣ କରି ପରସ୍ପର ମଧ୍ୟରେ ଏକ ସ୍ଥାୟୀ ସହଭାଗିତା ସୃଷ୍ଟି କରି ଅନ୍ୟମାନଙ୍କ ପାଇଁ ଉଦାହରଣ ପାଲଟିଥିବା ସୋସିଆଲ ମିଡିଆରେ ଅନେକ ୟୁଜର୍ସ ମତ ଦେଇଛନ୍ତି।
